İranlı rejissor Asghar Farhadi «Satıcı» adlı filminə görə «Oscar» mükafatına namizədlərin siyahısına düşüb. Film fars dilindədir, bir iranlı cütlüyün gərginləşən münasibətlərindən bəhs edir.
A.Farhadi 2012-ci ildə də «Ayrılıq» filminə görə bu mükafata layiq görülmüş, İrana ilk dəfə «Oscar» aparmışdı.
Hazırda İranda yaşayan və çalışan rejissor ölkəsində ciddi senzurayla üzləşmədiyini deyir. İranda rejissorlar tez-tez İslami dəyərlərə hörmətsizlikdə günahlandırılır. Amma «Reuters» agentliyinə müsahibəsində A.Farhadi «Filmimi çəkərkən mən senzura görmürəm», - deyib. «Əngəl olmağa çalışan az, çox az adamlar olur. Belələri hətta bu mükafatın gizli razılaşma əsasında verildiyini düşünənlərdir».
Amerika Kino Akademiyası namizədlərin siyahısını yanvarın 24-də açıqlayıb. Mükafatlandırma mərasimi fevralın 26-da Hollivudda olacaq.