Kuba lideri Fidel Castro ilə vida mərasimi bu gün—noyabrın 28-də başlayır, dekabrın 4-nə qədər davam edəcək.
90 yaşlı liderin ölümü şənbə günü açıqlanıb və ölkədə 9-günlük matəm elan olunub, bayraqlar endirilib, konsert proqramları təxirə salınıb. Paytaxtın İnqilab meydanında F.Castro-nun nəhəng portreti asılıb.
Bazar günü rəsmi tədbir keçirilməsə də, tələbələr F.Castro-nun Havana Universitetindəki portreti önünə gül dəstələri, şamlar düzüblər.
F.Casto-nun meyiti yandırılıb, külü yığılan qutu bütün ölkəni gəzdiriləndən sonra, dekabrın 4-də cənubda, Santyaqo şəhərində basdırılacaq.
F.Castro Kubanı 1959-cu ildən, kommunist inqilabının qələbəsindən bu yana idarə edib, onun hakimiyyəti, az qala, yarım əsr çəkib.