ABŞ prezidentliyinə Respublikaçılar Partiyasından namizəd Donald Trump ona «qadın düşməni» deyən Venesuela əsilli dünya gözəli Alicia Machado-nu «iyrənc» adlandırıb.
Machado bundan əvvəl demişdi ki, kökəldiyi üçün Trump onu ələ salıb. Həm də latın amerikalı olduğuna görə ünvanına «xadimə xanım» deyib. Alicia Machado-nun bu açıqlamalarını Demokratlar Partiyasından prezidentliyə namizəd Hillary Clinton rəqibinə qarşı istifadə etmişdi.
Trump Clinton-a sosial şəbəkədən cavab verərək bildirib ki, «get, iyrənc Machado-nun keçmişini və seks kasetlərini araşdır».
Clinton bu mesaja «kim səhərə yaxın saat 3-də durub Twitter-dən keçmiş dünya gözəlinə hücum edər? Bu hərəkət onun kimi bir adam üçün belə anormaldır» cavabını verib.
Aparılan son sorğulara görə, Hillary Clinton 5 faiz səslə Donald Trump-ı geridə qoyur.
ABŞ-da prezident seçkisi noyabrın 8-də keçiriləcək.