«AVRO-2020-nin oyunları Bakıda da keçiriləcək. Azərbaycan da final mərhələsinə vəsiqə qazansa, yaxşı olar».
«Report»un xəbərinə görə, bunu Bakıda səfərdə olan UEFA-nın yeni prezidenti Aleksander Čeferin keçirdiyi brifinqdə deyib.
O, AVRO-2020-nin hazırlanan loqosunu çox bəyəndiyini bildirib: «Loqonun arxasındakı ideya millətləri birləşdirir».
A.Čeferin Bakının futbol infrastrukturu barədə də fikirlərini bildirib: «24 saatdan azdır ki, Bakıdayam. Bakı Olimpiya Stadionunu kənardan görmüşəm. Çox gözəl stadiondur. Dünən «Qəbələ» - «Mainz» görüşünü izlədim. Həmin arena da gözəldir».
UEFA prezidenti Avropa kuboklarının final matçının Bakıda keçirilmə ehtimalından da danışıb. O bildirib ki, bundan ötrü yerli assosiasiyadan müraciət olmalıdır: «Ən yaxşı təkliflər qəbul edilir. Bu məsələ UEFA tərəfindən geniş müzakirə olunur. Düşünürəm ki, Azərbaycanın da şansı var».
İLHAM ƏLİYEV UEFA PREZİDENTİNİ QƏBUL EDİB
Azərbaycan dövlət başçısı İlham Əliyev sentyabrın 30-da UEFA prezidenti Aleksander Ceferin-i qəbul edib.
Prezidentin mətbuat xidmətinin yaydığı xəbərdə görüşün detalları haqqında, hələlik, bilgi verilmir.
Aleksander Ceferin sentyabrın 29-da Azərbaycana gəlib.
Verilən xəbərlərə görə, bu səfər Avro-2020-nin dörd oyununa ev sahibliyi edəcək Bakıda yeni loqonun təqdimat mərasimində iştirak məqsədi daşıyır.
Qitə futbol qurumunun rəsmisini Azərbaycan paytaxtına AFFA-nın prezidenti Rövnəq Abdullayev dəvət edib. Mərasim sentyabrın 30-da Bakı Olimpiya Stadionunda keçirilməlidir.
Aleksander Ceferin bu il sentyabrın 14-də Yunanıstanın paytaxtı Afinada keçirilmiş növbədənkənar konqresdə UEFA-nın prezidenti seçilib.
2020-ci il futbol üzrə Avropa Çempionatının oyunları 13 müxtəlif şəhərlərdə keçiriləcək. Həmin şəhərlərdən biri də Bakıdır.