İranla Səudiyyə Ərəbistanı arasındakı fikir ayrılığı neftin bir az da ucuzlaşmasına səbəb olub. Sentyabrın 27-də neft karteli OPEC-in toplantısında İran Səudiyyə Ərəbistanının istehsalın dondurulmasıyla bağlı təklifini rədd edib. Hazırda İran gündə 3.6 milyon barrel neft istehsal edir. İran istehsalı dondurarsa, Səudiyyə Ərəbistanı da neft istehsalını azaldacağını bildirib.
OPEC rəsmilərinin dediyinə görə, Rusiya da bu ideyaya tərəfdardır. Amma İran istehsalı sanksiyalardan əvvəlki səviyyəyə çatdırmaqda sərbəst olduğunu deyir. 2012-ci il sanksiyalarından əvvəl İran gündə 4 milyon barrelə yaxın neft istehsal edirdi. Narazılıqlara baxmayaraq, Rusiya və Səudiyyə Ərəbistanı təmsilçiləri İranın, eləcə də digər OPEC ölkələrinin neft istehsalının dondurulması barədə razılaşmaya qatılacağına ümid edirlər.