-
Mayın 19-da Monteneqro və NATO üzvlük sazişini imzalayacaqlar. Bu Balkan ölkəsi hərbi alyansın 29-cu üzvünə çevriləcək.
Monteneqronun Baş naziri Milo Djukanovic Brüsseldə NATO xarici işlər nazirlərinin ikigünlük görüşünə qatılacaq, imzalanma da həmin görüş çərçivəsində olacaq.
NATO-nun Baş katibi Jens Stoltenberg deyib ki, “alyans, Monteneqro və Qərbi Balkan ölkələrinin sabitliyindən ötrü tarixi bir gündür. NATO-nun genişlənməsi göstərir ki, alyansın qapısı açıqdır”.
Monteneqro Albaniya və Xorvatiyadan sonra Qərbi Balkanlardan NATO-ya qoşulan üçüncü ölkə olacaq.
Saziş imzalanandan sonra Monteneqro alyansın iclaslarına müşahidəçi kimi qatılacaq, çünki NATO-nun bütün üzvləri üzvlük protokolunu ratifikasiya etməlidir.