-
Azərbaycandan Həcc ziyarətinə gedəcək zəvvarlardan ziyarətdə vəfat edənlərin ailələrinə və ya ağır xəsarət alanlara kompensasiya ödənəcək. Bu haqda Qafqaz Müsəlmanları İdarəsindən məlumat veriblər.
APA-nın xəbərinə görə, kompensasiyalar zəvvarların seçdikləri ziyarət xidməti növlərinə görə, 5 və 6 min manata qədərdir.
Zəvvarlardan VİP ziyarət növünü seçənlər üçün kompensasiya 6 min, nisbətən ucuz ziyarət növünü seçənlər üçün isə 5 min manat nəzərdə tutulub. Bundan başqa, ağır xəsarət alanlara müalicənin xərcinə görə, kompensasiya veriləcək. Bu, sənədlərin qəbulu zamanı zəvvarla bağlanan müqavilədə əksini tapır.
Aprelin 1-dən Azərbaycanda Həcc ziyarətinə sənəd qəbulu başlayıb. Bu il Azərbaycandan gedəcək zəvvarlar üçün say limiti ötən ilkindən az - 1500 nəfər müəyyənləşib.
Həcc ziyarətinə sənəd qəbulunu yalnız QMİ aparır.