Ukrayna ordusu ilə ölkənin şərqindəki rusiyapərəst separatçılar tank və kiçik çaplı silahları Donetsk vilayətindəki təmas xəttindən çıxarmağa başlayıblar.
Bunu oktyabrın 20-də Ukrayna ordusunun sözçüsü Leonid Matyukhin bəyan edib.
İlin əvvəllərində Donetsk, Luqansk və Debaltsevedə tərəflər arasında ağır döyüşlər gedirdi.
Debaltseve hazırda separatçıların nəzarətindədir.
Donetsk separatçılarının lideri Eduard Basurin Frans-Press agentliyinə bildirib ki, Debaltsevedən silahların çıxarılmasına başlayıb və digər ərazilərdə də bu davam etdiriləcək.
Son vaxtlar demək olar ki, Ukraynanın şərqində atəşkəs rejiminə tam əməl edilir.