BMT-nin Təhlükəsizlik Şurası Ukrayna böhranına görə 26-cı dəfə təcili iclas çağırıb. BMT rəsmiləri xəbərdarlıq edib ki, Ukraynanın şərqində “tammiqyaslı döyüşlər” bərpa oluna bilər.
Təhlükəsizlik Şurasının iclası noyabrın 12-də keçirilib. Ondan bir neçə saat öncə NATO-nun yüksək rütbəli rəsmisi deyib ki, alyans noyabrın 10-dan Rusiyadan Ukraynanın şərqinə rus tankları, artilleriyasından ibarət “çoxsaylı karvanların” keçdiyini təsdiqləyir.
Rusiya bu iddiaları təkzib edib və Ukraynanın şərqində silahlı qüvvələrinin olmasına dair dəlil olmadığını bildirib.
Hələlik BMT-də Rusiyaya qarşı qətnamə təklif olunmayıb. Rusiyanın qurumda veto hüququ var.