İraq parlamentinin etnik yezidi üzvü bu azlıq qrupunun üzvlərini İslam Dövləti (İD) yaraqlı qrupundan qorumaq cəhdlərinə görə beynəlxalq mükafat alıb.
Vian Dakheel-ə Anna Politkovskaya mükafatı verilib. Mükafatı Londonda mənzillənən RAW in WAR (Reach All Women in War – Müharibədə Bütün Qadınları Əhatə etmək) təşkilatı verib. Bu qurum münaqişədə əziyyət çəkənlərə kömək edən qadınları mükafatlandırır.
Avqustda İraqın şimalında yezidilərə yardım çatdıran vertolyot qəzasında Dakhil-in ayağı sınıb. Ancaq o, fəaliyyətini davam etdirəcəyini deyib.
Vian Dakhil Thomson Reuters fonduna deyib:
“Biz dinc adamlarıq, ancaq kişilərimizi öldürürlər, qadınlara və qızlarımıza işgəncə verilir və əsir götürülür”.
Bu mükafat rusiyalı jurnalist Anna Politkovskaya-nın adını daşıyır. O, Çeçenistanda insan haqları pozuntularını ifşa edib, 2006-cı il oktyabrın 7-də öldürülüb.