Keçid linkləri

Təcili xəbərlər
2020, 28 Fevral, Cümə, Bakı vaxtı 15:49

Yol polisi vəkillə bağlı görüntülərə görə cərimələndi


B.Bayramovu sərxoşluq müayinəsindən keçmək üçün tibbi məntəqəyə gətirib, orada videoya çəkiblər

Bakı şəhər Dövlət Yol Polis İdarəsi vəkil Bəhruz Bayramova 1000 manat təzminat ödəməlidir. Çünki vəkilin sərxoş halda maşın sürdüyünə görə saxlanması haqda məlumatı, sərxoşluq müayinəsindən keçirildiyi görüntüləri saytlarda, telekanallarda yayıb.

Bu barədə fevralın 12-də Bakı Apellyasiya Məhkəməsində qərar çıxarılıb. Rauf Talışinskinin sədrlik etdiyi hakimlər kollegiyası belə nəticəyə gəlib ki, Yol Polisi İdarəsi bu məlumatları yaymaqla vəkilin şərəf və ləyaqətinə, işgüzar nüfuzuna zərbə vurub.

B.Bayramovun iddiası qismən təmin olunub. O, 300 min manat təzminat, həmin məlumatları yaymış media orqanlarında təkzib verilməsi və Bakı şəhər Dövlət Yol Polis İdarəsinin ondan üzr istəməsini tələb edirdi. Təzminat hissəsində iddiası qismən təmin olunsa da, üzr və təkzib hissəsində iddia rədd edilib. Ona görə də B.Bayramov deyir ki, qərar onu qane etmir. AzadlıqRadiosuna bildirib ki, qərardan Ali Məhkəməyə şikayət edəcək.

B.Bayramov məhkəməyə iddiasında da göstərib ki, restoranda ailə üzvlərindən birinin ad gününü qeyd ediblər. Az miqdarda spirtli içki qəbul etdiyinə görə restorandan çıxanda «Ayıq sürücü» xidmətindən sürücü çağırıb. Sürücü gəlib onun avtomobilini idarə edib, onu və yaxınlarını evə aparıb:

«Dedilər ki, çəkib telekanallarda...»

«Sürücü bizi ünvana çatdırıb gedəndə maşın məhəlləarası küçədə dayanmışdı. Evimə 70 metr qalmışdı. Avtomobilə yaxınlaşanda yol polisinin avtomobili dayandı. Bir nəfər özünü təqdim etmədən bütün sənədlərimi əlimdən zorakılıqla aldı. Ona bildirdim ki, ayıq sürücü ilə gəlmişəm və avtomobili də idarə etməmişəm. Məni zorakılıqla yol polisinin avtomobilinə əyləşdirdilər. Yolda zəng vurub çəkiliş kameralarının gəlməsini istədilər. Mənə də dedilər ki, çəkib telekanallarda, mətbuat orqanlarında biabır edəcəklər».

Vəkilin sözlərinə görə, onu sərxoşluq müayinəsindən keçmək üçün tibbi məntəqəyə gətirib, orada videoya çəkiblər. Daha sonra həmin görüntülər müxtəlif telekanal və saytlarda «Tanınmış vəkil sərxoş tutuldu» başlığı ilə yayımlanıb.


«Videogörüntüləri hissə-hissə montaj edib, çəkilişləri yaymaqda məqsəd məni biabır etmək, işgüzar nüfuzuma zərbə vurmaq olub», - vəkil belə hesab edir.

Bakı şəhər Dövlət Yol Polisi İdarəsinin şöbə rəisi, polkovnik Vaqif Əsədov isə mətbuata bu məsələni şərh edərkən bildirib ki, vəkil B.Bayramov Yol polisinin fəaliyyətinə kölgə salmaq məqsədilə müxtəlif üsullara əl atır.

B.Bayramovun sərxoş halda avtomobil idarə etməyə görə cəzalandırılması üçün Bakı şəhər Dövlət Yol Polis İdarəsi üç dəfə məhkəməyə müraciət etsə də, üçündə də ərizə geri qaytarılıb. Sonda inzibati xəta ilə bağlı işə xitam verilib.

B.Bayramov bir sıra ictimai-siyasi fəalların (ilahiyyatçı Taleh Bağırov, Gədəbəyin keçmiş icra başçısı Saleh Rüstəmov, keçmiş müstəntiq Rüfət Səfərov və s.) hüquqlarını müdafiə edir.

Günün bütün mövzuları

XS
SM
MD
LG