2026, 17 Noyabr, çərşənbə axşamı, Bakı vaxtı 22:35

Uitkoff və Kuşner Berlində Ukrayna, Avropa təmsilçiləri ilə görüşəcəklər

Cared Kuşner, Volodimir Zelenski və Stiv Uitkoff noyabrın 12-də Baldonneldəki Keyzment aerodromunda (Dublin) keçirilən görüşdən sonra mediaya açıqlama verirlər.
Cared Kuşner, Volodimir Zelenski və Stiv Uitkoff noyabrın 12-də Baldonneldəki Keyzment aerodromunda (Dublin) keçirilən görüşdən sonra mediaya açıqlama verirlər.

ABŞ prezidentinin xüsusi elçiləri Stiv Uitkoff və Cared Kuşner noyabrın 19-da Berlində Ukrayna və Avropa təmsilçiləri ilə görüşməyi planlaşdırırlar. Görüşdə Ukraynaya veriləcək təhlükəsizlik zəmanətləri və ölkənin müharibədən sonrakı bərpa planı müzakirə olunacaq. Bu barədə "Axios" nəşri ABŞ rəsmisinə istinadla məlumat yayıb.

Nəşrin müsahibinin sözlərinə görə, Donald Trampın xüsusi elçiləri Ukrayna və Avropa rəsmiləri ilə müntəzəm əlaqə saxlayır, eyni zamanda Rusiya ilə danışıqlar aparırlar. Mənbə Berlin görüşünü və Trampın Çinə səfərini əlaqələndirilmiş diplomatik səylər kimi dəyərləndirib.

"Axios"un mənbəsi bildirib ki, Çində Trampa qoşulacaq dövlət katibi Marko Rubio, maliyyə naziri Skot Bessent və Ağ Evin aparat rəhbəri Stiven Millerə Ukrayna ilə bağlı danışıqlar barədə məlumat verilib.

Uitkoff və Kuşner noyabrın 12-də Əbu-Dabidə keçirilən üçtərəfli danışıqlardan sonra Kremldə Rusiya prezidenti Vladimir Putinlə görüşüblər. Bu görüşdən sonra Kuşner deyib ki, Ukrayna və ABŞ Avropa nümayəndələrinin danışıqlarda iştirakını dəstəkləyir.

Noyabrın 16-da Trampın xüsusi elçisi Rusiya prezidentinin köməkçisi Yuri Uşakovla danışıb. Onun sözlərinə görə, tərəflər danışıqlarda əldə olunan irəliləyişi, növbəti addımları, eləcə də Brüssellə Moskva arasında birbaşa təmasların qurulmasına yardım yollarını müzakirə ediblər.

Uşakov vurğulayıb ki, Avropa təmsilçilərinin Ukrayna ilə bağlı danışıqlara qoşulması üçün "üçtərəfli danışıqların daha bir, ola bilsin ki, bir neçə raundu" keçirilməlidir.

Məlumata görə, Ukraynadakı müharibənin nizamlanması ilə bağlı gələcək texniki səviyyəli danışıqlarda Avropanı Avropa İttifaqı, Almaniya, Fransa, Böyük Britaniya, İtaliya və Polşanın milli təhlükəsizlik üzrə müşavirləri təmsil edəcəklər. Avropa ölkələri hələlik öz siyasi nümayəndələrini müəyyənləşdirməyiblər.

"Bloomberg" agentliyi danışıqların növbəti raundunun dekabrın 14–15-də ABŞ-də keçiriləcək G20 sammitindən əvvəl baş tutacağının gözlənildiyini yazır. Amma buna qədər daha bir neçə görüşün keçiriləcəyi bildirilir.

​
XS
SM
MD
LG