Avropa Şurasının prezidenti Donald Tusk, onun təbirincə deyilərsə, ABŞ prezidenti Donald Trump-ın “özünə arxayın şiltaqlığını” pisləyib. Digər tərəfdən onun sözlərinə görə bu, “Avropanı bütün xülyalardan azad edib”.
Tusk bu bəyanatı mayın 16-da Bolqarıstan paytaxtı Sofiyada verib. Burada keçirilməsi planlaşdırılan Avropa İttifaqı sammitində ABŞ-ın İranla nüvə sazişindən çıxmaq qərarı və Trump-ın alüminium və polad idxalına qoyduğu əlavə rüsumlar məsələsi müzakirə ediləcək.
Tusk deyib ki, “Çinin yüksəlişi və Rusiyanın təcavüzkar mövqeyi kimi ənənəvi problemlərlə yanaşı indi də yeni fenomen peyda olub: “Amerika administrasiyasının özündən razı şıltaqlığı””.
Donald Tusk deyib : "Prezident Trump-ın son qərarlarına diqqət yetirərkın hətta düşünməli olursan: belə dostu olana düşmən lazımdlırmı? Amma səmimi danışsam, deməliyəm ki, Avropa prezident Trump-a minnətdar olmalıdır. Çünki biz onun sayəsində xülyalardan azad olmuşuq. O bizi inandırdı ki, sənə kömək əli lazım olanda öz əllərinə baxmalısan”.
Bununla yanaşı keçmiş Polşa baş naziri deyib ki, “Avropa transatlantik bağların qorunub saxlanması üçün bügünkü əhval-ruhiyyəyə baxmayaraq əlindən gələn hər şeyi etməlidir”.
Bundan bir gün əvvəl bu bağların saxlanmasının zəruriliyi barədə Almaniya kansleri Angela Merkel bəyanat vermişdi:
"Transatlantik bağlar hazırda və gələcəkdə ali mühümlüyünü saxlayır”.
Almaniya kansleri Trump-ın nüvə sazişindən çıxmaq qərarını “narahatedici xəbər” adlandırıb.
Mayın 15-də Brüsseldə İranın xarici işlər naziri Mohammad Javad Zariflə görüşən Britaniya, Fransa və Almaniya nazirləri 2015-ci il sazişinin saxlanmasına tərəfdar olduqlarını bildiriblər.
Zarif mayın 16-da deyib ki, bu görüşlər çox güclü siyasi mesaj göndərir, lakin indi sözdən hərəkətə keçmək vaxtıdır.
