ABŞ prezidenti Donald Trump iyulun 4-də keçiriləcək Müstəqillik Günündə Vaşinqtonda “misli görünməmiş şou” vəd edib.
O adətən partiyasız gün kimi qeyd edilən bu bayramda rəsmi nitq söyləməklə illərlə davam edən ənənəni pozmaq niyyətindədir.
Tədbir ərəfəsində Vaşinqton küçələri boyunca döyüş tanklarının daşındığı müşahidə edilib.
Trump 2017-ci ilin yanvarından bəri ABŞ paytaxtında hərbi paradın keçirilməsi ideyasını təbliğ edirdi.
Müxalifət siyasətçiləri prezidenti adətən çalıb-oynamaq, yeyib-içmək və atəşfəşanlıqla qeyd olunan bayramı siyasiləşdirməkdə ittiham ediblər.
1776-cı ildə Müstəqillik Bəyannaməsinin imzalanması günü kimi qeyd edilən 4 iyul hər il bütün Amerika boyunca piknik və atəşfəşanlıqla bayram edilir.
Trump habelə Lincoln xatirə kompleksində nitq etməyi planlaşdırır.
Ödənişli biletlərlə keçirilən bu tədbirə respublikaçı donorların, administrasiya və kampaniya rəmilərinin qatılacağı gözlənilir.
Bundan əvvəl 4 iyul günündə rəsmi nitqi 70 il əvvəl prezident Harry Truman edib.
O vaxt Müstəqillik Bəyannaməsinin 175-ci ildönümü qeyd olunurdu.
