ABŞ prezidenti Donald Trump öz sözləri ilə deyilsə Şimali Koreya lideri Kim Jong Un-un ona yazdığı “çox nəzakətli” məktubun tərcümə mətnini açıqlayıb.
Trump iyulun 12-də Twitter-də yazıb ki, iyulun 6-da göndərilmiş bu məktub ötən ay iki lider arasında keçirilmiş sammitin Pxenyanla münasibətlərin bərpa olunmasındakı rolunu təsdiqləyir.
Bu məktubda Kim Trump-a yazır ki, o, iki liderin Şimali Koreya və Birləşmiş Ştatların münasibətlərində “yeni gələcək” uğrunda səylərinin “mütləq bəhrə verəcəyinə” inanır”.
Məktubda Kim habelə “zati-aliləri cənab prezidentin enerjili və fövqəladə səylərini” tərifləyir.
Kim bu məktubda Trump-la görüşünü “mənalı səfərin başlanğıcı” adlandırır.
Trump və Kim iyunun 12-də ABŞ rəsmilərinin təbirincə deyilərsə, “Koreya yarımadasının tam nüvəsizləşdirilməsi” məsələsini müzakirə etmək üçün görüşüblər. Hərçənd Vaşinqton və Pxenyan “nüvəsizləşdirməni” fərqli izah edirlər.
Məktub iyulun 6-da, dövlət katibi Mike Pompeo-nun Pxenayana səfəri günündə imzalanıb.
Buna baxmayaraq daha sonra Pxenyan Birləşmiş Ştatları nüvəsizləşdirməyə dair “birtərəfli və qanqstersayağı” tələblər irəli sürməkdə ittiham etmişdi.
İyulun 12-də Birləşmiş Ştatlar bildirib ki, Şimali Koreya iyulun 15-də ABŞ rəsmiləri ilə danışıqlar aparmağa razılıq verib.
Bu danışıqlarda 1950-1953-cü il Koreya müharibəsində həlak olmuş Amerika əsgərlərinin qalıqlarının ABŞ-a verilməsi məsələsi müzakirə olunacaq.
