Prezident Donald Trump deyib ki, Cənubi Koreyada yerləşdirilmiş ABŞ əsgərlərinin sayının azaldılması məsələsi Şimali Koreya lideri Kim Jong Unla qarşıdan gələn sammitdə əldə olunacaq hər hansı bir razılaşmaya daxil ola bilməz”.
Trump fevralın 22-də Cənubi Koreyadakı 28 min 500 ABŞ əsgərinin hər hansı ixtisarı planlarına dair suala cavab olaraq deyib ki, “bu, müzakirə masasının üstündə olmayan məsələlərdən biridir”.
Trump bildirib ki, o Kimlə danışıqlarda öz mövqeyini əvvəlcədən açmaq fikrində deyil, çünki Birləşmiş Ştatlar Pxenyanın öz nüvə silahlarından imtina etməsini istəyir.
Elə isə qarşı tərəfə nə təklif edəcəyi barədə sualın cavabında Trump deyib ki, “hər şey masa üstündədir”.
Trump son vaxtklar xaricdəki ABŞ əsgərlərinin sayının azaldılmasına dair bir neçə qərarlar qəbul edib və Seulu Cənubi Koreyada yerləşdirilmiş Amerika qüvvələrinə kifayət qədər maliyyə dəstəyi verməməkdə günahlandırıb.
ABŞ qoşunları Cənubi Koreyada 1950-1953-cü il Koreya müharibəsindən sonra saxlanıb. Şimali və Cənubi Koerya hələ də texniki baxımdan müharibədədirlər, çünki Pxenyanla Seul arasında rəsmi sülh sazişi imzalanmayıb.
Trump-ın Kim Jong Unla Hanoyda keçiriləcək sammiti fevralın 27-28-ə planlaşdırılıb. Bu onların ikinci zirvə görüşüdür.
Ötən iyunda Sinqapurda keçirilən birinci sammit Kimin Koreya yarımadasının nüvəsizləşdiriləcəyinə dair götürdüyü yayğın öhdəliklərlə nəticələnmişdi. Buna baxmayarqaq Trump bəyan etmişdi ki, sammit Şimali Koreya təhlükəsinə son qoyub.
Lakin Pxenyan hələlik Vaşinqtonun “konkret addımlar” adlandırdığı hərəkətlərə keçməyib.
ABŞ kəşfiyyat rəsmilərinin yanvarın 29-da Senat komitəsində Şimali Koreyanın nüvəsizləşdirməyə sadiqliyi barədə dedikləri Trump-ın bəyanatları ilə ziddiyyət təşkil edir.
Trump kəşfiyyat başçılarının bəyanatlarını “sadəlövh” adlandırıb.
