Azərbaycan xəbərləri
Aksiya keçirən daşıyıcı və sürücülər həbs edildi
"Turan"ın xəbərinə görə, fevralın 17-də səhər Bakıda aeroport yolunda yolun bir hissəsini "R-Qrup Karqo" şirkətinin dörd yük maşını bağlayıb.
Agentliyin xəbərində vurğulandığına görə, şirkətin nümayəndəsi Rəşad Borçalı bildirib ki, aksiyanın səbəbi məmurların korrupsiyasıdır. Həmin şəxs deyib ki, yol vərəqəsinə görə artıq pul istənilir.
"R Qrup Kargo" ət məhsullarının daşınması ilə məşğuldur.
Daxili İşlər Nazirliyinin (DİN) Mətbuat xidmətinin rəhbəri Ehsan Zahidov “Turan” Agentliyinə isə yalnız bildirib ki, araşdırma aparılır və nəticədən asılı olaraq məsələyə hüquqi qiymət veriləcək
İki sürücüyə də inzibati həbs cəzası verilib
Fevralın 17-də Bakının Heydər Əliyev prospektində etiraz aksiyasında iştirak edən iki sürücüyə isə inzibati həbs cəzası verildiyi deyilir.
Nərimanov Rayon Məhkəməsindən “Turan” agentliyinə bildirildiyinə görə, onlara 30 sutka müddətində inzibati həbs cəzası verilib.
Məlumatda vurğulanır ki, sürücülər Elvin Məlikovla Mirələm Məmmədov İnzibati Xətalar Məcəlləsinin 535-ci (Polis işçisinin və ya hərbi qulluqçunun qanuni tələbinə qəsdən tabe olmama) və 510-cu maddəsi (Xırda xuliqanlıq) ilə təqsirli biliniblər.
Qərarlara, hələlik, hər üç sürücüdən və onların vəkillərindən ayrılıqda münasibət öyrənmək mümkün olmayıb.
Saxlanan başqa bir sürücünün isə sərbəst buraxıldığı deyilir.
Daşıycı həbs edildi
Dünən, fevralın 17-də Bakıda Heydər Əliyev prospektində yük maşını ilə aksiya keçirən (yolda yük maşınını saxlayaraq hərəkəti qismən bağlayan) sürücülərdən biri Rəmiş Cəfərov ( rəsmi açıqlamada o daşıycı kimi təqdim edilir) barəsində 2 aylıq həbs qətimkan tədbirinin seçildiyi bildirilir.
Bu barədə “Turan” Agentliyinə Nərimanov Rayon Məhkəməsindən məlumat verilib.
Məlumata görə, həmin məsələ barəsində Cinayət Məcəlləsinin 233-cü maddəsilə (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) cinayət işi açılıb.
Bu maddə ilə günahlandırılan şəxsə məhkəmədə beş min manatdan səkkiz min manatadək cərimə, iki ilədək islah işləri, yaxud eyni müddətə azadlığın məhdudlaşdırılması və ya üç ilədək azadlıqdan məhrum etmə cəzası verilə bilər.
Həmin aksiya ilə bağlı başqa bir neçə sürücünün də saxlandığı bildirilir
Bu maddə ilə günahlandırılan şəxsə məhkəmədə beş min manatdan səkkiz min manatadək cərimə, iki ilədək islah işləri, yaxud eyni müddətə azadlığın məhdudlaşdırılması və ya üç ilədək azadlıqdan məhrum etmə cəzası verilə bilər.
Həmin aksiya ilə bağlı başqa bir neçə sürücünün də saxlandığı bildirilir.
Hüquq müdafiəçiləri sərbəst buraxılıb
Fevralın 17-də saxlanan hüquq müdafiəçiləri, "Müdafiə xətti" İnsan Haqları Təşkilatının üzvləri Rüfət Səfərov və Zaur Əkbər sərbəst buraxılıblar.
Hüquq müdafiəçilərinin bildirməsinə görə, saxlanarkən olara fiziki müdaxilə edilib. Onlar qeyd ediblər ki, hüquq müdafiəçisi kimi fəaliyyət göstərdikləri bir vaxtda onların özlərini yerlə sürüyüblər.
Hüquq müdafiəçisi Zaur Əkbər vurğulayıb ki, onun idarədə qolunu buraraq yerə yıxıblar və təpikləyiblər.
DİN-dən cavab
Daxili İşlər Nazirliyinin Mətbuat xidmətinin rəhbəri Ehsan Zahidov isə “Turan” İnformasiya Agentliyinə bildirib ki, Rüfət Səfərova və Zaur Əkbərə fiziki təzyiq göstərilməyib:
"Rüfət Səfərov saxlanılan sürücünün atası ilə bərabər gedib Nərimanov Rayon Polis İdarəsinin qarşısına. Orada çəkiliş aparmaq istəyiblər. Onlara deyiblər ki, İdarənin qarşısında çəkiliş aparmaq olmaz. Bu məzmunda bir az aralarında anlaşılmazlıq yaranıb. Hazırda heç bir problem və anlaşılmazlıq yoxdur".
Azərbaycanda hüquq müdafiəçisi saxlanıb
Bu gün, fevralın 17-də axşam saatlarında hüquq müdafiəçisi Rüfət Səfərov Bakıda Nərimanov Rayon Polis İdarəsinin önündə saxlanıb. O, bölmənin qarşısında canlı yayım edərkən saxlanaraq aparılıb.
Həmin vaxt gündüz saxlandığı bildirilən sürücü Rəmiş Cəfərovun atası Zəkrəm Cəfərov idarənin qarşısına gələrək oğlunun taleyi ilə maraqlanırdı, Rüfət Səfərov da bu prosesi izləyirdi.
Məsələyə, hələlik, bölmədən və Daxili İşlər Nazirliyindən münasibət almaq mümkün olmayıb.
Daşıyıcı saxlanıb
Rəsmi açıqlamada adı gedən daşıyıcı Rəmiş Cəfərovun bugün, fevralın 17-də günorta saatlarında evindən aparıldığı bildirilir.
Bu barədə AzadlıqRadiosuna onun atası Zəkrəm Cəfərov məlumat verib.
Onun sözlərinə görə, hadisə saat 13:00 radələrində baş verib:
"10-15 nəfər qara paltarlı şəxs heç bir sənəd təqdim etmədən, çəpərdən tullandılar, oğlumu zorla saxlayıb aparıblar".
O, qeyd edib ki, 3-4 saat keçməsinə baxmayaraq oğlu haqqında xəbər ala bilməyiblər:
"Daxili İşlər Nazirliyinin 102 Xidmətinə də zəng vurmuşuq, amma nəticə yoxdur".
Zəkrəm Cəfərovun sözlərinə görə, gələnlər evdə olan müşahidə kamerasını da aparıblar:
"Bu mənim şəxsi mülkümdür, heç kəsin buna ixtiyarı yoxdur. Hətta bununla kifayətlənməyib qonşuların da kamerasını aparıblar".
O, vəziyyətlərinin ağır olduğnu, bankdan pul götürdüklərini əlavə edib.
Bu deyilənlərə, hələlik, Daxili İşlər Nazirliyindən münasibət öyrənmək mümkün olmayıb.
Nazirlik aksiya keçirənləri səhv sayır
Rəqəmsal İnkişaf və Nəqliyyat Nazirliyi Heydər Əliyev prospektində aksiya keçirən yük maşınları ilə bağlı açıqlama yayıb.
"Turan"ın xəbərinə görə, qurumdan bildirilib ki, icazələrin bölgüsü prosesində daşıyıcıların özlərinin də iştirakı təmin edilib: "Yalnız bir daşıyıcı - Rəmiş Cəfərov belə bölgüyə qarşı çıxaraq özünə əlavə imtiyazlar tələb edib…".
Vurğulanıb ki, bu il R.Cəfərov Dövlət Avtomobil Nəqliyyatı Xidmətindən (DANX) müvafiq icazələr almayıb: "Onun tərəfindən xarici ölkədən yüklənmiş nəqliyyat vasitəsi olduğu bildirildikdə icazəsi olmadan bunu necə etdiyi sorğulanıb. Məsələyə aydınlıq gətirmək və dövlət orqanı ilə əməkdaşlıq etmək əvəzinə Cəfərov Rəmiş tərəfindən nəqliyyat vasitələri şəhərin mərkəzi prospektinin ikinci zolağında saxlanılıb".
Qeyd edilib ki, R.Cəfərov beynəlxalq daşımalar sahəsində qüvvədə olan normativ hüquqi aktların tələblərini dəfələrlə pozmağa meylli daşıyıcı olduğundan bu il yanvarın 10-da "R Group Azerbaijan" MMC Azərbaycan Beynəlxalq Avtomobil Daşıyıcıları Assosiasiyası (ABADA) üzvlüyündən çıxarılıb.
Hələlik, rəsmi açıqlamaya R.Cəfərov və ya onun yaxınlarından münasibət almaq mümkün olmayıb.
Bakıda TIR sürücülərinin aksiya keçirdiyi bildirilir
Bəzi yerli kütləvi informasiya vasitələrinin xəbərinə görə, fevralın 17-də gecə saatlarında dörd yük maşınının sürücüsü Bakıda etiraz aksiyası keçirib.
Verilən məlumata görə, onlar öz maşınları ilə Heydər Əliyev prospektində avtomobillərin hərəkətini qismən bağlayıblar.
Bildirildiyinə görə, TIR-lardan birinin üzərinə bu sözlər yazılıb: "Bizi bu həddə çatdıran Dövlət Avtomobil Nəqliyyatı Xidmətinin rəisi Anar Rzayev və şöbə müdiri Malik Əliyev! İcazə vərəqələrini verin. Məhsullar xarab olmaq üzrədir. Müflis olmuşuq!".
Məlumatlara görə, fevralın 17-si, səhər saatlarında əraziyə polis qüvvələri cəlb olunub, yolda hərəkət tamamilə açılıb.
Məsələyə, hələlik, sürücülərdən, Daxili İşlər Nazirliyi və Dövlət Avtomobil Nəqliyyatı Xidmətindən münasibət öyrənmək mümkün olmayıb.
Amma Bakı Şəhər Dövlət Yol Polisi İdarəsindən "Turan"a bildirilib ki, tədbirlər həyata keçirilib, yollar açılıb.
Bütün xəbərləri izləyin
Lökbatanda anbar yanır [Video]
Mayın 12-də səhər saatlarında Bakının Qaradağ rayonu, Lökbatan qəsəbəsində yanğın baş verib.
Fövqəladə Hallar Nazirliyinin (FHN) məlumatına görə, yanğın anbarda başlayıb. Əraziyə Aviasiya dəstəsinin helikopterləri cəlb olunub.
İlkin məlumatlara əsasən, hadisə zamanı xəsarət alan olmayıb.
Rəsmi məlumatda hələlik yanğının səbəbi və anbarın hansı quruma məxsus olduğu açıqlanmır.
MN: Kəlbəcərdə iki hərbçi minaya düşüb
Mayın 11-də Azərbaycan ordusunun iki hərbi qulluqçusu Kəlbəcər rayonu ərazisində xidməti vəzifələrini yerinə yetirərkən minaya düşüb. Bu barədə Müdafiə Nazirliyinin mətbuat xidməti məlumat yayıb.
Nazirlikdən bildirilib ki, xəsarət alan hərbçilər yaxınlıqdakı tibb müəssisəsinə təxliyə edilib: "Yaralıların vəziyyəti stabildir və hazırda hərbi tibb müəssisəsində müalicələri davam etdirilir. Faktla bağlı araşdırma aparılır".
Xəsarət alan hərbçilərin yaxınları ilə əlaqə saxlamaq mümkün olmayıb.
Azərbaycanın rəsmi qurumlarının açıqlamasına görə, 10 noyabr 2020-ci il tarixli atəşkəs bəyanatından sonra ölkənin 70-dən çox vətəndaşı minaya düşərək həlak olub, 350-dən çox şəxs isə müxtəlif xəsarətlər alıb. Onların bir qisminin hərbi qulluqçu olduğu bildirilir.
Rəsmi qurumlar dəfələrlə vurğulayıb ki, Ermənistan işğaldan azad olunan ərazilərdə minaların xəritələrini verməkdən imtina edir. Sonradan Azərbaycanda saxlanılan erməni hərbçilərinin bir hissəsinin geri təhvil verilməsi müqabilində bir sıra rayonların mina xəritələrinin alındığı bildirilib. Bununla belə, Azərbaycan rəsmiləri bu xəritələrin böyük ölçüdə reallığı əks etdirmədiyini vurğulayıblar. Buna cavab olaraq Ermənistanın baş naziri bəyan edib ki, əllərində olan bütün xəritələr Azərbaycana verilib.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olub. 1990-cı illərin əvvəllərində Azərbaycanın Qarabağ bölgəsi və ətrafdakı yeddi rayonu (o cümlədən Kəlbəcər) işğal edilib.
2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib. Elə bundan sonra Qarabağdan erməni əhali köç edib.
Ötən ilin avqustunda Vaşinqtonda prezident Donald Trampın vasitəçiliyi ilə 30 ildən çox münaqişədə olan Azərbaycan və Ermənistan arasında sülh sazişi paraflanıb. Paraflanmış mətndə tərəflər bir-birlərinin ərazi bütövlüyünü tanıyır, habelə qarşılıqlı iddiaların geri çəkiləcəyi vurğulanır.
Bakı Rusiya dövlət televiziyasından narazıdır
"Mayın 6-da Rusiyanın dövlət televiziyası olan "Birinci Kanal"ın "Vremya pokajet" verilişində Azərbaycanın təhrif olunmuş xəritəsinin nümayiş etdirilməsi, xəritədə mövcud olmayan qondarma "Dağlıq Qarabağ" ifadəsinin yer alması ciddi təxribat və qəbuledilməz siyasi manipulyasiyadır". Bunu Azərbaycan Xarici İşlər Nazirliyinin (XİN) mətbuat katibi Ayxan Hacızadə bildirib.
O xatırladıb ki, Azərbaycanın suverenliyi və ərazi bütövlüyü tam şəkildə bərpa olunub və bu reallıq Rusiya Federasiyası daxil olmaqla, beynəlxalq ictimaiyyət tərəfindən tanınır.
"Dövlət televiziyasında köhnəlmiş, saxta, separatizmi təşviq edən narrativlərin tirajlanması Azərbaycan-Rusiya münasibətlərinin ruhuna, qarşılıqlı hörmət və mehriban qonşuluq münasibətlərinə açıq şəkildə ziddir", – XİN sözçüsü vurğulayıb.
"Dövlətə məxsus media resurslarının məsuliyyətsiz, qərəzli yanaşması yolverilməzdir və qarşı tərəfdən bu məsələyə aydın izah verilməsi, eləcə də belə halların təkrarlanmaması üçün zəruri tədbirlərin görülməsi gözlənilir", – o əlavə edib.
Hələlik bu açıqlamaya Rusiyanın cavabdeh qurumlarından münasibət almaq mümkün olmayıb.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi və ətrafındakı 7 rayon işğal edilmişdi. Bölgədə dünyanın heç bir ölkəsinin tanımadığı "Dağlıq Qarabağ Respublikası"nın mövcudluğu elan edilmişdi.
2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Son illər iki ölkə arasında müxtəlif formatlarda sülh danışıqları aparılıb. Nəhayət, ötən il avqustun 8-də Azərbaycan və Ermənistanın xarici işlər nazirləri Vaşinqtonda sülh sazişini paraflayıblar. Sənəddə tərəflər bir-birinin ərazi bütövlüyünü və suverenliyini dəstəkləyir, qarşılıqlı iddiaların dayandırılması vacib sayılır.
Bir ay sonra, iyunun 7-də Ermənistanda parlament seçkiləridir. Azərbaycanda və Ermənistanda bir sıra müstəqil ekspertlər düşünürlər ki, Kreml bu seçkilərdə hazırkı baş nazir Nikol Paşinyana alternativ sayılan, bölgədə separatizmi qızışdıra biləcək bəzi qüvvələrin qələbəsini istəyir . Hərçənd Rusiya rəsmiləri belə dəyərləndirmələri qəbul etmirlər.
'BakuBus' və taksi xidməti Metropolitenə birləşdirilir
"Bakı Metropoliteni" Qapalı Səhmdar Cəmiyyəti (QSC) yenidən təşkil ediləcək. Bununla bağlı Prezident İlham Əliyev bu gün, mayın 7-də fərman imzalayıb.
Fərmana əsasən, “BakuBus” və “Bakı Taksi Xidməti” Məhdud Məsuliyyətli Cəmiyyətləri “Bakı Metropoliteni” QSC-nin tərkibinə birləşdirilir.
Fərmana görə, "Bakı Metropoliteni" QSC ictimai nəqliyyatda sərnişindaşmanın keyfiyyətini və təhlükəsizliyini yüksəltməlidir. Xidmətlərin təşkili və gediş haqqının ödənilməsi üçün yeni, rəqəmsal həllər tətbiq etməlidir. Həmçinin bu sahəni vahid mərkəzdən idarə etməli və əlaqələndirməlidir.
QSC-nin fəaliyyətinə ümumi rəhbərlik və nəzarət üçün sədr daxil olmaqla, beş üzvdən ibarət Müşahidə Şurası yaradılır.
"Bakı Taksi Xidməti" 2015-ci ildə Nəqliyyat Nazirliyinin, "BakuBus" isə 2014-cü ildə Bakı Şəhər İcra Hakimiyyətinin tabeçiliyində yaradılıb.
Xatırlatma
Son illərdə taksi fəaliyyəti sahəsində qəbul edilmiş qərarlar və qanunvericilik dəyişiklikləri, rəsmi olaraq, xidmətin keyfiyyətinin artırılması məqsədi daşıyıb. Lakin nəticədə taksilərin sayında azalma və qiymət artımı müşahidə olunub. Müstəqil iqtisadçılar bu prosesi taksi xidmətinin inhisara alınması kimi dəyərləndiriblər.
Ötən il oktyabrın 1-də metro və bəzi marşrutlarda gediş haqqı 60 qəpiyə qaldırılıb. Halbuki, metro və bir sıra marşrutlarda gediş haqqı ondan bir il əvvəl də 10 qəpik artırılmışdı. Bəzi müstəqil ekspertlər hesab edir ki, hökumət bu fərmandan sonra yenidən qiymət artımına gedə bilər.
Mərkəzi Bank inflyasiya gözləntisini yüksəldib
Azərbaycan Mərkəzi Bankı (AMB) inflyasiya gözləntisini yüksəldib. Qurumun 6 may tarixli açıqlamasına əsasən, illik inflyasiyanın 2026-cı ildə 5.9 faiz, 2027-ci ildə isə 4.5 faiz olacağı proqnozlaşdırılır. Halbuki, bundan üç ay əvvəl, fevral proqnozlarına görə, illik inflyasiyanın 2026-cı ildə 5.5 faiz, 2027-ci ildə isə 4 faiz olacağı gözlənilirdi.
AMB inflyasiya təzyiqinin artmasını əsasən xarici mənşəli xərc amilləri ilə əlaqələndirir. Bankın rəyinə görə, qlobal ərzaq qiymətlərinin yüksəlməsi, ticarət tərəfdaşlarındakı inflyasiya və nominal effektiv məzənnənin möhkəmlənmə tempinin zəifləməsi bu artımda həlledici rol oynayır.
Qurum əlavə edir ki, 2026-cı ilin martında illik inflyasiya 5.6 faiz təşkil edib.
Lakin müstəqil iqtisadçılar rəsmi rəqəmləri sual altına alaraq real inflyasiyanın son bir ildə ikirəqəmli həddə çatdığını iddia edirlər. Ekspertlər inflyasiyanın yalnız xarici amillərlə izah edilməsi ilə razılaşmırlar. Onlar daxili qiymət artımlarına diqqət çəkərək ilin əvvəlindən yanacağın bahalaşmasını, vergi və rüsumların artırılmasını inflyasiyanı tətikləyən əsas daxili səbəblər kimi vurğulayırlar.
Həbsdəki Xalq Cəbhəsi fəalına dərmanların çatdırılmadığı deyilir
Azərbaycan Xalq Cəbhəsi Partiyasının (AXCP) İmişli rayon şöbəsinin hazırda həbsdə olan fəalı, ikinci qrup əlil Vüqar Qədirlinin ona lazım olan dərmanların verilməməsi səbəbindən aclıq aksiyasına başladığı bildirilir.
Bu barədə mayın 5-də onun mənsub olduğu AXCP-dən məlumat yayılıb. Məlumatda vurğulanır ki, o, Lənkəran Penitensiar Kompleksində saxlanılır. "Vüqar Qədirli Qarabağ müharibəsində başından ciddi xəsarət alıb. Başında hələ də çıxarılmayan qəlpələr var. Bu da ona dözülməz ağrılar verir. Artıq iki aya yaxındır ki, Lənkəran Penitensiar Kompleksi Vüqar Qədirlinin evindən gətirilən dərmanları qəbul etmir. Bu barədə Vüqar Qədirlinin ailəsi Ombudsman Aparatına məlumat versə də, heç bir nəticə yoxdur. Dərmanların verilməməsi Vüqar Qədirliyə həyatı təhlükəsi yaradır", –partiyadan iddia edilib.
Lakin aksiyaya nə vaxt başlanıldığı açıqlanmayıb.
Bu məlumata münasibət almaq üçün Penitensiar Xidmət və Ombudsman Aparatına müraciət edilsə də, cavab alına bilməyib.
V.Qədirlinin yaxınları martın sonunda da oxşar şikayəti ictimaiyyətə açıqlamışdılar.
V.Qədirli ötən il dekabrın 12-də İmişli rayonunda saxlanılıb. Dekabrın 13-də isə onun barəsində qanunsuz silah saxlama ittihamı ilə həbs-qətimkan tədbiri seçilib. O, ittihamı qəbul etmir.
Xatırlatma
Müxalifətdə olan AXCP-nin, sədr Əli Kərimli də daxil, 20-dək fəalı hazırda həbsdədir. Partiya müxtəlif ittihamlarla üzləşən bu şəxslərin həbsini siyasi sayır. Amma rəsmilər ölkədə siyasi həbslərin olması ilə bağlı fikirləri əsassız sayırlar. Onların vurğulamasına görə, siyasi məhbus siyahılarında yer alan şəxslər sırf törətdikləri əmələ görə mühakimə ediliblər.
Yerli hüquq müdafiəçilərinə görə, hazırda Azərbaycan həbsxanalarında 300 civarında siyasi məhbus var.
Gömrük borcu olanların ölkədən çıxışı bağlana bilər
Dövlət Gömrük Komitəsinin (DGK) səlahiyyətlərinin artırılması nəzərdə tutulur.
Aprelin 29-da Milli Məclisin İqtisadi siyasət, sənaye və sahibkarlıq komitəsinin iclasında Gömrük Məcəlləsinə dəyişiklik edilməsi haqqında qanun layihəsi müzakirəyə çıxarılıb.
Yeni təklifə əsasən, gömrük borcunu ödəməyən şəxslərin və ya şirkət rəhbərlərinin ölkədən çıxışına qadağa qoyula bilər. Belə ki, gömrük orqanlarına borcu olan şəxslərin ölkədən çıxışına müvəqqəti məhdudiyyət qoyulması üçün məhkəməyə müraciət etmək hüququ verilir.
Bundan başqa, gömrük təmsilçiliyi institutunun yenidən qurulması və bu sahədə imkanların liberallaşdırılmasından bəhs edilir. Bu çərçivədə "gömrük brokeri" anlayışı "dolayı gömrük təmsilçiliyi" termini ilə əvəz edilir.
Layihə Milli Məclisin plenar iclasına çıxarılmadan ictimaiyyət arasında tənqidlərə səbəb olub.
İqtisadçı Natiq Cəfərli Facebook səhifəsində xatırladır ki, uzun müddətdir DGK-nın müstəqil və hərbi rütbəli bir qurum kimi fəaliyyətinə ehtiyac olmadığı müzakirə edilir. Onun sözlərinə görə, çoxdan təklif var ki, qurum ya Maliyyə, ya da İqtisadiyyat nazirliyinə birləşdirilsin, hərbi rütbələr ləğv edilsin.
İqtisadçı vurğulayıb ki, amma hazırda bu islahatların əvəzinə DGK-nın səlahiyyətlərini kəskin artıran yeni qərarların qəbulu gündəmdədir.
N.Cəfərli sözügedən dəyişiklikləri məqbul saymır.
Azərbaycanda problemli kreditlərin artımı sürətlənib
Bu il aprelin 1-nə ölkə banklarında vaxtı keçmiş kreditlərin məbləği 619.6 milyon manat təşkil edib.
Mərkəzi Bankın məlumatına görə, bu, martın 1-i ilə müqayisədə 10.25 faiz çoxdur. Ölkədə vaxtı keçmiş kreditlərin məbləği ilin əvvəlindən bəri 18.1 faiz, son bir ildə isə 28.65 faiz artıb.
Rəsmilər bu artımı hələlik şərh etməyiblər. Bununla belə, hazırda qanunvericilikdə bank borclarını vaxtında ödəməyənlərə qarşı tədbirlər sərtləşdirilir.
Müstəqil ekspertlər isə problemli kreditlərin artmasını ölkə vətəndaşlarının maddi durumunun getdikcə pisləşməsi kimi izah edirlər.
Xatırlatma
Azərbaycanda 2015-ci ildə iki devalvasiya baş vermiş, manat iki dəfədən çox dəyər itirmişdi. Onda problemli kreditlərin 2 milyard manata yaxınlaşdığı açıqlanmışdı. 2019-cu il fevralın 19-da isə prezident fiziki şəxslərin xarici valyutada olan problemli kreditlərinin həlli ilə bağlı fərman verdi. Onda 10 min dollara qədər kredit götürən fiziki şəxslərin borclarında 2015-ci ildə baş vermiş devalvasiyalardan sonra yaranmış fərq dövlət hesabına ödənildi. Bundan sonra problemli kreditlər azaldı. Amma 2021-ci ilin əvvəlində yenidən vaxtı keçmiş kreditlərin artdığı açıqlanmışdı. Bu, onda koronavirus pandemiyası ilə izah edilirdi. 2022-ci ildə isə yenidən problemli kreditlərin azaldığı vurğulanırdı. Lakin bu ildən əks proses müşahidə edilir.
Üç ayda xarici borcun faizlərinə 70 milyon dollar ödənilib
Bu ilin ilk üç ayında Azərbaycanın xarici dövlət borcu üzrə 71.9 milyon ABŞ dolları faiz ödənilib. Bu barədə Maliyyə Nazirliyinin hesabatında bildirilir.
Hesabata əsasən, 2026-cı ilin birinci rübünün yekununda ölkənin ümumi dövlət borcu 24 milyard 464 milyon manat təşkil edib. Bu məbləğin 4 milyard 689,3 milyon dolları (32.6 faiz) xarici, 16 milyard 493 milyon manatı (67.4 faiz) isə daxili dövlət borcunun payına düşüb.
Rüblük hesabatların təhlili göstərir ki, ölkənin dövlət borcu ilin əvvəli ilə müqayisədə azalıb. İlin əvvəlində bu məbləğ 25 milyard 987 milyon manat açıqlanmışdı.
Keçən il xarici borc üzrə faiz ödənişlərinə 225 milyon dollar vəsait sərf olunub.
Xatırlatma
Hesabat dövründə Azərbaycanın dövlət borcu azalsa da, rəsmi hesabatlarda onun qarşıdakı illərdə artacağı proqnozlaşdırılır. Halbuki bir neçə il öncə rəsmilər çıxışlarında, bir qayda olaraq, dövlət borcunu azaltmağı əsas məqsədlərdən biri kimi vurğulayırdılar.
Ekspertlər bunu, əsasən, son illər Azərbaycanın əsas ixrac məhsulları olan neft və qazın ucuzlaşması ilə izah edirdilər. Hərçənd son aylarda ABŞ, İsrail-İran münaqişəsi dünya neftinin və maye qazının 20 faizinin nəql edildiyi Hörmüz boğazının bağlanmasına, nəticədə "qara qızıl"ın 70 faiz bahalaşmasına səbəb olub.
Sel və daşqınların fəsadları üçün 85 milyon manat ayrıldı
Prezident İlham Əliyev aprelin 28-də sel və daşqınların təhlükəli təsirlərinə qarşı mübarizə tədbirləri haqqında sərəncam imzalayıb. Sərəncama əsasən, Bakıda və ölkənin müxtəlif bölgələrində güclü leysan yağışları nəticəsində dəymiş zərərin aradan qaldırılması üçün Prezidentin ehtiyat fondundan 85 milyon 869 min 260 manat vəsait ayrılıb.
Ayrılan maliyyənin bir hissəsi rayonlarda yeni fərdi evlərin tikintisinə, zərərçəkənlərin mənzil təmiri və kirayə xərclərinə yönəldiləcək.
Bu proses çərçivəsində bəndlərin inşası, kollektorlardakı çökmələrin aradan qaldırılması, nasos stansiyalarının mühərriklərinin yenilənməsi, körpülərin bərpası və yolların təmiri də nəzərdə tutulur.
Xatırlatma
Son aylarda yağan yağışlar Bakıda və ölkənin bir çox bölgəsində ciddi fəsadlara yol açıb. Küçə, həyət və evlərin su altında qaldığı bir sıra ərazilərdə etirazlar baş verib; sakinlər hökumətdən yardım və kompensasiya tələb ediblər.
Əslində, son illər Bakıda və paytaxtətrafı qəsəbələrdə güclü yağışlar zamanı eyni problemlər mütəmadi olaraq təkrarlanır. Hətta 2024-cü ilin oktyabrında Sabunçu rayonundakı tuneli su basması nəticəsində iki nəfər həyatını itirmişdi.
Ekspertlər mövcud vəziyyəti, əsasən, son illərdə paytaxt və ətraf yaşayış məntəqələrində tikinti işlərinin plansız aparılması ilə əlaqələndirirlər. Mütəxəssislər vurğulayırlar ki, son 20 ildə ölkədə su və kanalizasiya sistemlərinin yenilənməsinə külli miqdarda vəsait ayrılıb. Onların fikrincə, əgər həmin vəsaitlərdən səmərəli istifadə olunsaydı, problem bu dərəcədə kəskinləşməzdi.
Müəllimlərin işə qəbulu imtahanında ödəniş təsdiq edildi – 60 manat
Müəllimlərin işə qəbulu ilə bağlı müsabiqədə iştirak etmək üçün ödənişin məbləği rəsmən təsdiqlənib.
Bu barədə aprelin 24-də baş nazir Əli Əsədov qərar imzalayıb.
Qərara əsasən, müəllimlərin işə qəbulu üzrə müsabiqədə iştirak haqqı 60 manat müəyyən edilib.
Bu ilin əvvəlində qanunvericiliyə bu məsələ ilə bağlı dəyişiklik təsdiqlənib. Həmin vaxt müəllimlərin işə qəbul müsabiqəsinin pullu olacağı tənqidlərə səbəb olmuşdu.
23 dekabr
Müəllimlərin işə qəbulu müsabiqəsi pullu olacaq
"Ümumi təhsil haqqında" Qanuna dəyişiklik edilir.
Qanun layihəsi parlamentin bu gün, dekabrın 23-də keçirilən iclasının gündəliyinə daxil edilib.
Sənəd layihəsinə əsasən, "Ümumi təhsil haqqında" Qanuna yeni məzmunda 27.4-cü maddə əlavə edilir. Həmin maddə belədir: "27.4. Dövlət ümumi təhsil müəssisələrinə müəllimlərin işə qəbulu və yerdəyişməsi... müsabiqə yolu ilə həyata keçirilir. Müəllimlərin işə qəbulu ilə bağlı müsabiqədə iştirak ödənişlidir. (ilk dəfə müsabiqədə iştirak edənlər, əlilliyi olan şəxslər, ünvanlı dövlət sosial yardımı alan ailələrin üzvləri, şəhid ailəsinin üzvləri və Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə "Müharibə veteranı" adı almış şəxslər istisna olmaqla)".
Ödənişin məbləğini müvafiq icra hakimiyyəti orqanının müəyyən etdiyi qurum açıqlayacaq.
Xatırlatma
Müəllimlərin müsabiqəsi bu vaxta qədər ödənişli olmayıb. Müsabiqə dörd mərhələdən ibarətdir: elektron ərizədəki göstəricilərin yoxlanılması, test imtahanı, vakant yerlərin seçilməsi və müsahibə mərhələsi.
Gələn il Azərbaycanda bir sıra sahələrdə vergilər də artırılacaq. Müstəqil təhlilçilər bunu ölkədə neft hasilatının ildən-ilə azalması və son bir ildə "qara qızıl"ın qiymətinin düşməsi ilə izah edirlər. Ölkə iqtisadiyyatında ixracın 90 faizə yaxını neft və qazın payına düşür.
Azərbaycanda İkinci Dünya müharibəsinin 13 iştirakçısı qalıb – birdəfəlik yardım alacaqlar
Azərbaycanda İkinci Dünya müharibəsinin iştirakçılarına, onların dul həyat yoldaşlarına, habelə həmin dövrdə Leninqradın (Sankt-Peterburq) müdafiəsində və arxa cəbhədə fədakarlıq göstərmiş şəxslərə birdəfəlik maddi yardım veriləcək.
Bu barədə aprelin 24-də prezident İlham Əliyev sərəncam imzalayıb.
Sərəncama əsasən, müharibə iştirakçılarına 2 min 750 manat, digər kateqoriyadan olan şəxslərə isə 1 min 500 manat birdəfəlik yardım ödəniləcək.
Yardımların maliyyələşdirilməsi üçün Azərbaycan Prezidentinin ehtiyat fondundan 3 milyon manat vəsait ayrılıb.
Əmək və Əhalinin Sosial Müdafiəsi Nazirliyinin məlumatına görə, sərəncamın ümumilikdə 2 minə yaxın şəxsə şamil olunacağı gözlənilir. Onlardan yalnız 13 nəfəri İkinci Dünya müharibəsinin birbaşa iştirakçılarıdır.
Ötən il bu say 21 nəfər olaraq açıqlanmışdı. Həmin şəxslərə isə bundan az – 2 min 500 manat mükafat verilmişdi.
Sərəncam sosial şəbəkələrdə müzakirələrə səbəb olub. Bir çox istifadəçi narazılıq edir ki, son aylar Bakı və ətrafında yağıntılar ciddi fəsadlar törədib, lakin sel nəticəsində ziyan çəkənlərə kompensasiya verilməyib.
Xatırlatma
Hər il mayın 9-da Azərbaycanda, eləcə də Rusiya və dünyanın bir çox digər ölkələrində faşizm üzərində Qələbə Günü rəsmi şəkildə qeyd olunur. Bu il həmin tarixi qələbədən 81 il ötür."
İkinci Dünya müharibəsi 1939-cu ildə faşist Almaniyasının Polşaya hücumu ilə başlayıb. 1941-ci il iyunun 22-də isə Hitler Almaniyası SSRİ-yə – o cümlədən Azərbaycana (1991-ci ildə müstəqilliyini bərpa edib) hücum edib.
1945-ci ildə başa çatan müharibə ilə əlaqədar Qələbə Günü Avropa ölkələrində mayın 8-də qeyd olunsa da, Ukrayna istisna olmaqla keçmiş SSRİ məkanında mayın 9-na üstünlük verilir.
Bu müharibədə Azərbaycandan SSRİ ordusu sıralarında 660 min nəfər iştirak edib. Onlardan təqribən yarısının geri dönmədiyi bildirilir.
Problemli kreditlər artıb, icra məmurlarının səlahiyyətləri genişləndirilir
Azərbaycanda bank borclarını vaxtında ödəməyənlərə qarşı tədbirlərin sərtləşdirilməsi gözlənilir. Qanunvericiliyə dəyişiklik edilərək icra məmurlarının səlahiyyətlərinin genişləndirilməsi nəzərdə tutulur.
Bu məsələ Milli Məclisin bugünkü iclasında müzakirə olunacaq "Dövlət icra məmurları haqqında" Qanuna dəyişikliklər layihəsində öz əksini tapıb.
Mövcud qanunvericiliyə əsasən, icra məmuru tələbi borclunun hesabındakı pul vəsaitlərinə, qiymətli əşyalarına, habelə bank və digər kredit təşkilatlarındakı əmanətlərinə yönəldə bilər.
Layihədə isə tələbin dairəsinin genişləndirilməsi təklif olunur. Yeni sənədə əsasən, icra məmuru tələbi borclunun əmlakına, o cümlədən nağd vəsaitlərinə, bank, digər kredit və ya elektron pul təşkilatlarındakı hesab və əmanətlərinə, habelə saxlancda olan pul vəsaitlərinə yönəldə biləcək.
Ekspertlər bu dəyişiklikləri birmənalı dəyərləndirmirlər. Bir qrup ekspert hesab edir ki, icra məmurlarının səlahiyyətlərinin genişləndirilməsi icra prosesinin ümumi effektivliyini artırmağa xidmət edir. Onların fikrincə, əsas məqsəd bank borclarının qaytarılmasını daha operativ və real mexanizmlərlə təmin etməkdir. Xüsusilə, elektron pul hesablarına çıxış imkanı müasir maliyyə sisteminə uyğun addım kimi qiymətləndirilir.
Digər qisim ekspertlər isə hesab edir ki, bu addımlar bank borcu olan şəxslərə qarşı tədbirlərin hədsiz sərtləşdirilməsinə xidmət edir. Onların qənaətincə, icra məmurlarının səlahiyyətlərinin bu dərəcədə genişləndirilməsi sui-istifadə risklərini də özü ilə gətirir. Tənqidçilər vurğulayırlar ki, hökumət əhalinin sosial rifahını yaxşılaşdırmaq və borc yükünü azaltmaq əvəzinə, daha çox cəza mexanizmlərini gücləndirmək yolunu tutur.
Həmin ekspertlər xatırladırlar ki, Azərbaycanda bank faizləri bir çox ölkələrlə müqayisədə hədsiz dərəcədə yüksəkdir.
Mərkəzi Bankın məlumatına görə, 2026-cı il martın 1-nə Azərbaycanda vaxtı keçmiş kreditlərin məbləği 562 milyon manat təşkil edib. Bu göstərici fevralın 1-i ilə müqayisədə 0.8 faiz artıb.
Son bir ildə isə problemli kreditlərin məbləği 17 faiz çoxalıb.
Azərbaycanın xarici ticarəti azalsa da, Çinlə artıb
Bu ilin birinci rübündə Azərbaycanla Çin arasında ticarət dövriyyəsi ötən ilin eyni dövrü ilə müqayisədə 7.3 faiz artaraq 1 milyard 103 milyon ABŞ dollarını üstələyib.
Dövlət Gömrük Komitəsinin (DGK) statistikasına görə, Çindən Azərbaycana idxal 6.9 faiz artaraq 1 milyard 74 milyon dollar təşkil edib. Çin 2024-cü ildən etibarən Azərbaycanın idxal tərəfdaşları arasında Rusiyanı geridə qoyaraq birinci yerə yüksəlib.
Azərbaycandan Çinə ixrac edilən məhsulların dəyəri 25.2 faiz artaraq 29 milyon dollara çatıb.
Çinlə ticarət əməliyyatları ölkənin ümumi dövriyyəsinin 11.73 faizini təşkil edir.
Ümumilikdə isə Azərbaycanın xarici ticarət dövriyyəsi ötən ilin müvafiq dövründəki 12 milyard dollardan 9.4 milyard dollara qədər geriləyib.
Xatırlatma
Son illər Azərbaycan və Çin arasında həm iqtisadi, həm də siyasi baxımdan yaxınlaşma müşahidə olunur. 2024-cü il iyulun 3-də "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə" qəbul edilib. Ötən il də "Azərbaycan ilə Çin arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş" qüvvəyə minib.
Son aylar isə iki ölkə qurumları arasında birgə investisiya fondunun yaradılması ilə bağlı addımlar atılır.
Müxalifət hesab edir ki, Çin, Rusiya kimi ölkələrlə əlaqələri genişləndirməkdənsə, Qərbə inteqrasiya prosesini sürətləndirmək lazımdır.
Üstəlik, onların fikrincə, Çinlə yaxınlaşma ABŞ ilə əməkdaşlığa xələl gətirə bilər.
Bakıda məktəblinin sinif yoldaşını yandırdığı bildirilir
Bakıda IX sinif şagirdinin sinif yoldaşının üstünə spirt tökərək yandırdığı bildirilir. Hadisə aprelin 20-də paytaxtdakı 286 nömrəli tam orta məktəbdə baş verib.
Tibbi Ərazi Bölmələrini İdarəetmə Birliyindən (TƏBİB) verilən məlumata görə, 2011-ci il təvəllüdlü oğlan Nərimanov Tibb Mərkəzinin nəzdindəki Yanıq Mərkəzinə çatdırılıb. Ona "başın, üzün, boynun, gövdənin ön-yan səthlərinin və hər iki yuxarı ətrafların II-III dərəcəli termiki alov yanığı" diaqnozu qoyulub. Reanimasiya şöbəsində olan məktəblinin durumu ağır qiymətləndirilir.
Hadisəni törətməkdə şübhəli bilinən digər yeniyetmənin saxlanıldığı bildirilir.
Faktla bağlı araşdırma aparılır.