Fevralın 14-də Taliban “Amerika xalqını” öz hökumətinə Əfqanıstandan çıxması üçün təzyiq göstərməyə çağıran məktubu dərc edib.
Məktubda xatırladılır ki, Əfqanıstan müharibəsi Amerikanın tarixində ən uzun müharibə olmaqla yanaşı, ölkəyə “trilyonlarla dollar xərc bahasına başa gəlir”.
3 min sözlük bu məktub “Amerika xalqına, müstəqil QHT-lərin rəsmilərinə və sülhsevər konqresmenlərə” ünvanlanıb.
Məktubda Talibanın ABŞ-a uzun müddətdən bəri təklif etdiyi birbaşa danışıqlar yada salınır.
Vaşinqton indiyədək Talibanla hər hansı danışıqların mümkünlüyünü istisna edib.
Birləşmiş Ştatların mövqeyinə görə danışıqlar yalnız Əfqanıstan hökuməti ilə yaraqlılar arasında ola bilər.
Taliban məktubda daha açıq rejim yaradacağını, qadınlar da daxil hamıya təhsil və başqa haqlar tanıyacağını vəd edir, lakin belə görünür ki, hakimiyyəti heç bir başqa qüvvə ilə bölüşmək istəmir.
Məktubda prezident Donald Trump-ın avqust ayında elan etdiyi Əfqanıstan strategiyası tənqid olunur.
