Fəalların çağırışlarından sonra Tacikistan hakimiyyəti gənc qadının döyülməsi iddiaları üzrə araşdırmaya başlayıb. Hazırda ağır vəziyyətdə olan Mədinə Məmmədcanovanın Megafon mobil kommunikasiyalar şirkəti rəhbərinin həyat yoldaşı tərəfindən döyüldüyü iddia olunur.
Əvvəl itkin düşüb...
Düşənbə şəhər administrasiyasının noyabrın 1-də yaydığı açıqlamada deyilir ki, Əzizə Dövlətova və həyat yoldaşı Lütfulla (Pərviz) Dövlətova qarşı istintaq başladılıb. Dövlətovun yüksək rütbəli məmurlarla əlaqələri olduğu güman edilir. Cütlüyə hansı ittihamların irəli sürüləcəyi bəlli deyil.
Mədinə Məmmədcanovanın Dövlətovla sevgi münasibətlərinin olduğu deyilir. O, avqustun 25-də itkin düşüb, bir neçə saat sonra ağır bədən xəsarətləri ilə tapılıb. Hazırda qadının vəziyyəti ağırdır, həkimlər onun həmişəlik iflic vəziyyətində qala biləcəyini deyirlər.
Dövlətova Məmmədcanovaya hücum şübhəsilə saxlansa da, ölkənin müstəqilliyinin 30 illiyi münasibətilə verilən kütləvi amnistiya ilə azad olunub.
Mer işi şəxsi nəzarətinə götürüb
İnsan haqları sosial şəbəkələrdə narahatlıq bildirəndən sonra Düşənbənin meri Rüstəm Emomali işi şəxsi nəzarətinə götürdüyünü deyib, şəhər polisi və prokurorluğa təhqiqat aparmaq göstərişi verib. O, Tacikistan Prezidenti Emomali Rahmonun oğludur.
Tacikistanda, eləcə də Orta Asiyanın digər postsovet ölkələrində nüfuzlu ailələrə, yüksək rütbəli rəsmilərə bağlı cinayətkarların cəzasız qalması halları çox olub.
Bu ilin əvvəlində Rahmonun həyat yoldaşının bacısı oğlu dörd nəfərin bıçaqla yaralandığı davada təqsirli bilinsə də həbs cəzasından yayına bilib.
