“Tərtər işində”, vətənə xəyanət ittihamı ilə həbs olunan hərbi qulluqçuların yaxınları etiraz etməkdə davam edirlər.
İki gün əvvəl, mayın 27-də onlar növbəti dəfə Bakıya gəliblər, Hərbi Prokurorluğun qarşısına toplaşıb aksiya keçiriblər.
Valideynlər deyirlər ki, övladları sübutsuz, dəlilsiz həbs ediliblər, onlara işgəncə verilib.
Belə valideynlərdən biri Altay Quliyev bildirir ki, oğlu Natiq Quluzadəyə hansı qurumun işgəncə verdiyini aydınlaşdıra da bilməyib:
“Bizim kəndə elə bir vahimə salmışdılar ki, elə bilirdik ki, gedib öz oğlumuzdan xəbər tutsaq öldürəcəklər bizi. İki ay beş gün o döyülüb. Beş gün komada qalıb. Vallah düz deyirəm, mənim oğlumun zərrə qədər günahı varsa, bizi gəlin ailəlikcə asın ki, dövlətimizdən bir də belə xain çıxmasın. Mənim oğlumun günahı yoxdursa, oğlumu orda niyə saxlayırlar?!”
Altay Quliyev iddia edir ki, oğlu vətənini sevən, vicdanlı adamdır və vətənə xəyanət ittihamını heç cür qəbul etmir.
Adları açıqlanmayan həmin şəxslər
Baş Prokurorluq, Müdafiə, Daxili İşlər nazirlikləri və Dövlət Təhlükəsizliyi Xidməti 2017-ci ilin mayında birgə bəyanat yaymışdı.
Bəyanatda deyilirdi ki, xarici xidmət orqanları ilə məxfi əməkdaşlığa cəlb edilmiş bir qrup hərbi qulluqçu, mülki şəxs həbs olunub.
Rəsmi bəyanata görə, adları açıqlanmayan həmin şəxslər maddi maraqları naminə hərbi sirr təşkil edən məlumatları əldə edərək, Ermənistan tərəfinə ötürüblər.
Açıqlamada Hərbi Prokurorluqda Cinayət Məcəlləsinin dövlətə xəyanət maddəsi ilə cinayət işi başlandığı vurğulanırdı. Amma həbs edilənlərin sayı açıqlanmırdı.
Hökmdən narazı azı 24 hərbi qulluqçu var. Onların ailələri bir neçə dəfə Prezident Administrasiyası qarşısına toplaşıb, etiraz aksiyası keçiriblər.
Hərbi qulluqçuların hüquqlarını müdafiə edən Oqtay Gülalıyev deyir ki, məhkəməyə yetərli qədər sübut təqdim olunmayıb.
“Məhkəmə araşdırması düzgün aparılmayıb, dəlil sübutlar təqdim olunmayıb. Daha çox şahid ifadəsindən və işgəncələr nəticəsində əldə olunmuş ifadələrdən istifadə olunub. Halbuki, “vətənə xəyanət” ittihamı ağır ittihamdır. Buna görə başqa sənəd-sübutlar təqdim olunmalıdır. Ən azından Müdafiə Nazirliyi və ölkə rəhbərliyi deyir ki, sərhədboyu kameralar quraşdırılıb və orda xüsusi cihazlar var ki, nəinki Azərbaycan tərəfini, hətta sərhədi və düşmən tərəfini də qeydə ala bilirik. Əgər bu qeydlər varsa, valideynlər də haqlı olaraq tələb edirlər ki, nəyə görə bu qeydlər və digər sənədlər təqdim olunmur”.
Bəs hökumət bu şikayətləri necə araşdırır? Etirazlar nəzərə alına bilərmi?
Adətən prezident administrasiyasının qarşısında aksiya keçirən valideynlərə deyilir ki, bu işlə administrasiya yox, hərbi prokurorluq məşğuldur, ora getsinlər. Hərbi prokurorluqdan isə valideynlərə Ali Məhkəməyə müraciət etməyi məsləhət görürlər.
Yenə işgəncə iddiaları
“Dövlətə xəyanət”də ittiham olunan azı 24 hərbi qulluqçunun ailəsi işin ədalətli aparılmadığını, hərbçilərin işgəncə altında ifadə verdiklərini deyirlər.
Deyilənlərə baş prokurorluğun münasibətini öyrənmək istəsək də, əlaqə cəhdimiz gün ərzində alınmadı, telefon zəngimizə cavab verən olmadı.
Azərbaycan rəsmiləri polisdə və ümumilikdə istintaq altında tutulan şəxslərə işgəncə verilməsi ilə bağlı iddiaları bir qayda olaraq rədd edirlər.
Ombudsman Aparatının şöbə müdiri Rəşad Rumzadə AzadlıqRadiosuna deyir ki, onların məsələdən xəbərləri var və bu istiqamətdə işlər görüblər.
“Biz həmin şəxslərin özünü də qəbul etmişik. Onların valideynlərini də qəbul etmişik. Aidiyyatı üzrə məsələlər qaldırmışıq. Məhkəmə istintaqı gedişində xahişləri məhkəmələrə ünvanlamışıq. Aidiyyatı üzrə sorğular Hərbi Prokurorluğa, Baş Prokurorluğa göndərilib”.
Həbsdəki hərbçi Natiq Quluzadənin atası Altay Quliyev isə deyir ki, neçə vaxtdır etdiyi müraciətlərə dövlət baxmır, ailənin qalan üzvləri bu stressdən ürək-damar xəstəlikliyinə tutulublar.
Azərbaycanda həbs edilənlərə işgəncə verilməsi iddiası başqa işlərdə də səslənib. Son vaxtlar "Gəncə işi"ndə, "Nardaran işi"ndə tutulanların yaxınları da onların işgəncəyə məruz qaldıqlarını deyirlər. Hökumət bu iddiaları da rədd edir.
