►"Bakıdan rayona 10 manata gəlirik, rayondan kəndə isə 6 manata..."
Şəkinin Nuxa kəndinin sakinləri kənddən kənara çıxa bilmirlər. Çıxmalı olanda da kəndlə rayon arasındakı yolu az qala Şəki-Bakı yolunun qiymətinə gedib-gəlirlər.
Elə onları kənddə dustaq edən də budur. Deyirlər, “avtobus yoxdur, taksi xidməti bahadır, əlimizi-ayağımızı yığışdırıb oturmuşuq kənddə”.
Kənd sakini Fariz Mustafayev deyir, qəflətən ictimai nəqliyyatın kənddən yoxa çıxmasının səbəbləri onlara bəlli deyil:
“Bir ildən yuxarıdır avtobus yoxdur. Rayona taksi ilə gedib-gəlirik. Niyə yoxdur, səbəbini bilmirik, gah deyirlər, qiymətlər qalxır, gah deyirlər, vergini qaldırıblar”.
RAYONDAN KƏNDƏ 6 MANATA
Qurban Mirzəyev isə taksi xidmətinin bahalığından gileylənir:
“Bir gün avtobus olur, 5 gün olmur, kiçik maşınların ümidinə qalırıq. Rayondan, şəhərdən qonağımız olur, gəlib kəndə çıxa bilmirlər. Bakıdan rayona 10 manata gəlirik, rayondan kəndə 6 manata”.
Kəndli nəqliyyatsız qalmalarına görə kənd bələdiyyəsini qınayır:
“Şəkidən bura taksilər baha gətirir – baxır vaxtına. Gündüz 5-6, qaş qaraldısa, hətta 12 manata gətirirlər. Bir sözlə, bələdiyyə cibimizə, büdcəmizə zərər vurur. Avtobusla 40 qəpiyə gediriksə, marşrutla 2 manata, taksi ilə ondan da baha gedirik”.
Buna da bax: Avropa Şurasında Azərbaycanın məsələsinə baxılır
AYDA BİRCƏ DƏFƏ KƏNDDƏN ÇIXA BİLMİR
Qurban Mirzəyev deyir, vaxtilə kənddən rayon mərkəzinə işləyən avtobus kənd adamlarının əlindən tuturdu. Avtobus gündə dörd dəfə rayona gedib-gəlirdi. İndi gedişhaqqı ciblərinə uyğun olmadığına görə, elə vaxt olur ki, ay ərzində bircə dəfə də kənddən çıxa bilmir. Çünki aldığı cüzi təqaüd heç gedişhaqqını da ödəmir:
“Əvvəllər yaxşı işləyirdi. Balaca kənd deyil axı. Heç olmasa, gündə iki dəfə gətirib aparsın. Marşrut gündüz 1 manata, yük olsa, 2 manata aparır. O qədər də pul verib geri qayıdırıq. Təqaüdçü adamam. Aldığım heç yeməyimə çatmır”.
Ancaq bələdiyyədən kənddə nəqliyyat problem olması ilə bağlı deyilənləri təkzib ediblər.
