ABŞ kəşfiyyatının ən yüksək vəzifəlisi bəyan edib ki, Rusiyanın ABŞ seçkisinə iddia edilən müdaxiləsinin motiv və məqsədləri gələn həftə açıqlanacaq.
Milli Kəşfiyyat Agentliyinin baş direktoru James Clapper Konqres qarşısınsda etdiyi çıxışda bildirib ki, Vladimir Putinin motivləri tam şəkildə bəyan ediləcək.
ABŞ-ın kəşfiyyat agentlikləri bu qənaətdədirlər ki, Demokratik Partiyanın serverlərinə haker müdaxiləsini məhz Kreml əmr edib.
Moskva bu iddiaları rədd etsə də, Vaşiqnton Rusiyaya qarşı yeni sanskiyalarını elan edib.
ABŞ seçkisinə “xarici müdaxiləyə dair hesabat” yanvarın 5-də prezident Obamaya təqdim edilib.
Prezident seçilmiş Donald Trump hesabatla yanvarın 6-da tanış ediləcək və bundan sonra onun məxfi olmayan versiyası ictimaiyyət üçün açıqlanacaq.
Yanvarın 5-də ABŞ kəşfiyyatının ən yüksək vəzifəli rəsmiləri Senatın Silahlı Qüvvələr Komitəsinin qarşısında ifadə verirdilər.
Onların ümumi rəyinə görə Moskva seçkilərə Trump-ın Clinton üzərində qələbəsini təmin etmək məqsədilə müdaxilə edib.
Konqresmenlərdən birinin “siz müdaxilənin Putinin motivinə bağlılığını açmısınızmı” sualına cənab Clapper müsbət cavab verib.
Senat dinləməsi üçün hazırlanmlış ifadədə bildirilir ki, Rusiya ABŞ-ın maraqlarına ən geniş şəkildə təhlükə yarada biləcək təkmil kiberproqrama malikdir.
Seçkinin nəticəsi müzakirə olunmur
İfadədə qeyd olunur ki, “Rusiya ABŞ-ın hökumət, hərbi, diplomatik, kommersiya və mühüm infrastrukturuna tammiqyaslı təhlükə təşkil edir”.
İfadəni cənab Clapper-dən başqa müdafiə nazirinin kəşfiyyat üzrə müavini Marcel Lettre və Milli Təhlükəsizlik Agentliyinin direktoru admiral Michael Rogers imzalayıblar.
Dinləməni açan senator McCain xatırladıb ki, “biz bura prezident seçkisinin nəticəsini şübhə altına almaq üçün toplaşmamışıq”.
"Biz deyə bilmərik ki, onlar seçkinin heç bir nəticəsini dəyişməyiblər və sair…” – deyib Clapper Rusiya kəşfiyyatının əməliyyatı barədə.
O əlavə edib ki, bu məsələdə rusların bir çox motivləri ola bilərdi.
"Biz bu müdaxilənin elektoratın etdiyi seçimə təsir miqyasını ölçmürük” – deyib Clapper.
Cənab Clapper senator McCain-nin Rusiya müdaxiləsini “müharibə aktı” adlandırmasını bir qədər ağır yanaşma kimi qiymətləndirib.
Cənab Trump indiyədək Rusiyanın seçkiyə müdaxiləsinə dair bütün iddiaları rədd edib.
