Ermənistanın keçmiş prezidenti Serzh Sargsyanın vəkili keçmiş prezidentin “1 mart” işi ilə bağlı şahid qismində dindirilməsini təsdiqləyib.
Amram Makinyan bunu AzadlıqrRadiosunun erməni xidmətinə müsahibəsində deyib.
Amma o, keçmiş prezidentin neçə dəfə dindirilməsi barədə heç nə deməyib və bunu istintaqın məxfiliyi ilə izah edib.
Amma yerli kütləvi informasiya vasitələri (KİV) Sargsyanın bir neçə dəfə dindirildiyini yazırlar. KİV-lərin yazdıqlarına görə bu ifadələr çox uzun, 6 saatadək sürüb.
Xüsusi İstintaq Xidməti artıq xeyli vaxtdır ki, bu məlumatı təkzib etmir, amma ətraflı məlumat da vermir.
İstintaq Komitəsinin mətbuat katibi Marina Ogancanyan AzadlıqRadiosunun erməni xidmətinə təkcə onu deyib ki, Sargsyanın adı komitədə araşdırılan hansısa işdə təqsirləndirilən şəxs kimi keçmir.
Sargsyanın vəkili ona hansı sualların verilməsinə də aydınlıq gətirmir.
Amma o, Sargsyanın hazırda həbsdə olan digər keçmiş prezident Robert Kocharianın əleyhinə ifadə verməsi barədə KİV-lərdə gedən məlumatları tamamilə yalan adlandırırb.
Qeyd edək ki, keçmiş prezident Robert Kocharian, 2008-ci il martin 1-də baş verən qanlı hadisələrə görə hazırda həbsdədir.
Həmin vaxt keçirilən prezident seçkisində Serzh Sargsyanın qalib gəldiyi elan ediləndə, seçkinin saxtalaşdırıldığını iddia edən müxalifət tərəfdarları küçələrə axışdı.
Robert Kocharian həmin vaxt Sargsyanı dəstəkləyirdi.
Sonda etirazlar zorakılıqla yatırıldı və nəticədə azı 10 nəfər öldü.
İndi Yeni Ermənistan hakimiyyəti həmin hadisələrə görə Robert Kocharianı günahlandırır və ona qarşı cinayət işi açılıb.