Həbsdə olan və 24 gün öncə, noyabrın 5-də aclıq aksiyasına başladığını açıqlayan Gədəbəy rayonunun keçmiş icra başçısı Saleh Rüstəmovun səhhətinin pisləşməyə davam etdiyi bildirilir.

Bu barədə onun vəkili Bəhruz Bayramov məlumat verib. Onun sözlərinə görə, S.Rüstəmov artıq sümük ağrılarının şiddətləndiyini deyib: "Bu gün, noyabrın 29-da Saleh bəylə görüşdüm. Dedi ki, sümük ağrısından gecə yata bilməyib, artıq ağrıya dözə bilmir. Ancaq aclığı dayandırmaq təklifimlə razılaşmadı".

Vəkilin sözlərinə görə, həkimlər də S.Rüstəmovun vəziyyətinin ağır olduğunu deyir: "Analizlərin cavabı gəldi. Həkimlər deyir ki, vəziyyəti ağırdır".

Vəkil sonra da əlavə edib: "Çox güclə yeriyir. Dedim çəlikdən istifadə etsin. 58 yaşı var. Deməsinə görə, gecə ağrılardan yata bilməyib. Mənə söz verdi ki, sabaha qədər quru aclığa keçməyəcək. Sabah da görüşəcəyəm onunla".

Bu deyilənlərə, hələlik, Penitensiar Xidmətdən, bu qurumun tibbi müəssisəsindən və başqa rəsmi qurumlardan münasibət almaq mümkün olmayıb.

'Saleh Rüstəmov dediklərimi dərhal başa düşmürdü'

Bu gün, noyabrın 26-da vəkil Bəhruz Bayramov Gədəbəy rayonunun həbsdə olan keçmiş icra başçısı Saleh Rüstəmova baş çəkib.

Vəkil AzadlıqRadiosuna bildirib ki, S.Rüstəmovun vəziyyəti həddindən artıq ağır olaraq qalmaqdadır ( O, 21 gün öncə, noyabrın 5-də aclıq aksiyasına başladığını açıqlayıb): "Saleh Rüstəmovla şüşə arxasından görüşdük. O, çox zəifdir və güclə dayanırdı, ona görə çox az danışdıq".

B.Bayramovun sözlərinə görə, S.Rüstəmovun nitqi dolaşıq olub, dediklərini dərhal başa düşməyib: "Ailə üzvlərinin israrla aclığı dayandırmağı xahiş etdiklərini ona çatdırdım. Saleh etiraz etdi. Lakin sudan imtina etməmək xahişləri ilə razılaşdı".

Vəkil qeyd edib ki, həkimlər S.Rüstəmovun vəziyyətini həddindən artıq ağır qiymətləndirirlər və məcburi qidalandırmaya başlamaq məcburiyyətində olduqlarını deyirlər.

Bu deyilənlərə, hələlik, Penitensiar Xidmət, onun müalicə müəssisəsi və başqa rəsmi qurumlardan münasibət almaq mümkün olmayıb.

+++

Vəkil Bəhruz Bayramov bu gün, noyabrın 23-də Gədəbəy rayonunun hazırda həbsdə olan keçmiş icra başçısı Saleh Rüstəmovla görüşüb.

Bu barədə AzadlıqRadiosuna vəkil Bəhruz Bayramovun özü məlumat verib: "Şüşə arxasından cəmi 5-6 dəqiqə görüşdük".

Vəkil qeyd edib ki, S.Rüstəmovun vəziyyəti pisdir: "Güclə yeriyir, sözlərini unudur. Həkim vəziyyətinin pis olduğunu və müdaxilə etməyə məcbur olduqlarını dedi. Saleh Rüstəmov isə buna qəti etiraz bildirdi".

Saleh Rüstəmov 18 gün öncə, noyabrın 5-də aclıq aksiyasına başladığını açıqlayıb.

Bu deyilənlərə, hələlik, Penitensiar Xidmətindən, qurumun müalicə müəssisəsindən və başqa rəsmi qurumlardan münasibət öyrənmək mümkün olmayıb.

Vəkil Saleh Rüstəmovla danışıb

Gədəbəy rayonunun hazırda həbsdə olan keçmiş icra başçısı Saleh Rüstəmovun səhhətinin günlər keçdikcə ağırlaşdığı bildirilir.

Bu barədə AzadlıqRadiosuna onun ailə üzvləri məlumat verib. Onların sözlərinə görə, bu gün, noyabrın 22-də Penitensiar Xidmətinin Müalicə Müəssisəsində artıq 17-ci gündür aclıq aksiyası keçirən S.Rüstəmova vəkil Bəhruz Bayramov baş çəkib: "Onlar şüşə arxasından telefonla danışıblar. Saleh bəy son dərəcə halsız olub, qırıq-qırıq səslə, güclə danışıb. Cəmi 10 dəqiqə dayana bilib. Deyib ki, aclığı davam etdirəcək…".

Bu deyilənlərə, hələlik, Penitensiar Xidmətdən münasibət öyrənmək mümkün olmayıb.

Son günlər bir sıra hüquq müdafiəçiləri, vətəndaş cəmiyyətinin təmsilçiləri S.Rüstəmovun azadlığa buraxılması xahişi ilə Prezident İlham Əliyevə müraciət ediblər. Onlar qeyd ediblər ki, S.Rüstəmovun ölkənin müstəqilliyi və ərazi bütövlüyünün qorunmasında xidmətləri olub. Hələlik, bu müraciətlərə də Prezident Administrasiyasından hər hansı münasibət bildirilməyib.

Yaxınları Saleh Rüstəmovdan narahatdır

Gədəbəy rayonunun hazırda həbsdə olan keçmiş icra başçısı Saleh Rüstəmovun keçirdiyi aclıq aksiyasının artıq onun orqanizmində fəsadları verməyə başladığı bildirilir.

Bu barədə onun ailə üzvləri məlumat yayıb.

Onların sözlərinə görə, artıq 13 gündür aclıq aksiyasını davam etdirən S.Rüstəmovun qan təzyiqi aşağı düşüb, bədənində ağrılar var: "O, artıq 15 kilo çəki itirib, nəbzi yüksək sürətlə vurur, ağzı yara içindədir. Dünən, noyabrın 17-də qardaşları ilə görüş olub, artıq yanına gəlməməyi tapşırıb".

Bu deyilənlərə, hələlik, Penitensiar Xidmət və onun hazırda yerləşdirildiyi müalicə müəssisəsindən münasibət öyrənmək mümkün olmayıb.

+++

"Ombudsmanın tapşırığı əsasında Ombudsman Aparatının əməkdaşları Milli Preventiv Qrupunun həkim üzvlərinin iştirakı ilə noyabrın 14-də Saleh Rüstəmovla görüş keçirib".

Bunu "Turan"a Ombudsman Aparatının mətbuat xidmətindən deyiblər.

Məlumata görə, S.Rüstəmovun vəziyyəti diqqətdə saxlanılır, ailə üzvləri və vəkili ilə görüşləri təmin olunur.

Saleh Rüstəmovun yaxınları: 'Çox halsız idi, ağzı bütün yaradır…'

Gədəbəy rayonunun hazırda həbsdə olan keçmiş icra başçısı Saleh Rüstəmovun artıq 10 gündür aclıq aksiyası keçirdiyi bildirilir.

Bu barədə AzadlıqRadiosuna onun yaxınları məlumat verib.

Yaxınları noyabrın 14-ü və 15-də Penitensiar Xidmətin Müalicə Müəssisəsində onunla görüşüblər: "Dünən noyabrın 14-də vəziyyəti nisbətən stabil olsa da, bu gün çox pis idi. Çox halsız idi, çətinliklə danışırdı, ağzı bütün yaradır, bədənində şiddətli ağrılar əmələ gəlib ki, onlar da yatmağa qoymur".

Vəkil Bəhruz Bayramov isə deyib ki, S.Rüstəmov 10 kilodan artıq çəki itirib: "Dünən, noyabrın 14-də onunla görüşdüm. Hərəkət etməkdə çətinlik çəkir, nəbzi çox yüksəkdir, halsızdır".

S.Rüstəmovun yaxınları əlavə ediblər ki, görüşdə onu aclığı dayandırmağa razı sala bilməsələr də, bir xahişlərinə müsbət cavab alıblar: "Xahişlərimizi nəzərə alaraq, hələlik, quru aclığa keçmək fikrindən daşınıb".

Bu deyilənlərə, hələlik, Penitensiar Xidmətdən münasibət öyrənmək mümkün olmayıb.

Yaxınları bildirib ki, S.Rüstəmov aksiyaya səbəb kimi icrasına başlanan Amnistiya Aktına düşməməsi, qanunsuz olaraq üç ildən artıqdır həbsdə saxlanması və ailəsinin mülkünün müsadirəsini qeyd edib.

Azərbaycan Milli Məclisi noyabrın 5-də Amnistiya Aktı haqqında qərar qəbul edib. Aktın bütünlükdə 16 min civarında şəxsə şamil ediləcəyi, onlardan 3 minınin sırf həbsdən azadlığa buraxılacağı açıqlanıb.

Xatırlatma

S.Rüstəmov 2018-ci il mayın 8-də narkotik ittihamıyla tutulub. İki gün sonra onun qardaşı oğlu Vidadi Rüstəmli də eyni ittihamla saxlanıb. Sonra, mayın 25-dəAzərbaycan Xalq Cəbhəsi Partiyasının (AXCP) üç funksioneri (Aqil Məhərrəmov, Babək Həsənov və Ruslan Nəsirov) tutulub. Bundan sonra ittihamların dəyişdiyi bəlli olub. Onların saxlanılması ilə bağlı yayılan rəsmi açıqlamaya görə, AXCP funksionerləri və S.Rüstəmov çirkli pul vəsaitlərini leqallaşdırmaqda günahlandırılırlar.

AXCP ittihami yalanlamışdı. Bakı Ağır Cinayətlər Məhkəməsinin hökmü ilə S.Rüstəmov 7 il 3 ay, A.Məhərrəmov 4 il, B.Həsənov isə 3 il azadlıqdan məhrum edilib. V.Rüstəmli və R.Nəsirova şərti cəza verilib. Onların hamısı məhkəmədə ittihamları qəbul etməyiblər. B.Həsənov bu il martın 18-dəəfv sərəncamı ilə azadlığa buraxılıb.

Oktyabrın 5-də Azərbaycan xarici işlər naziri Ceyhun Bayramov ilə ABŞ dövlət katibi Marko Rubio arasında telefon danışığı olub.

Azərbaycan Xarici İşlər Nazirliyinin (XİN) məlumatına görə, telefon danışığı zamanı ikitərəfli strateji tərəfdaşlıq münasibətlərinin cari vəziyyəti, inkişaf perspektivləri, habelə Bakı-Yerevan normallaşma prosesi müzakirə edilib: "Azərbaycan-ABŞ strateji tərəfdaşlığı çərçivəsində 2026-cı ildə əldə olunmuş mühüm nəticələr, o cümlədən... enerji, karbohidrogen resurslarının kəşfiyyatı, işlənməsi və hasilatı, investisiya, rəqəmsal texnologiyalar, ticarət və digər sahələrdə imzalanmış sənədlərin ikitərəfli əməkdaşlığın praktiki məzmununu əhəmiyyətli dərəcədə genişləndirdiyi vurğulanıb".

Telefon danışığı zamanı qarşılıqlı maraq doğuran digər məsələlər ətrafında da fikir mübadiləsi aparılıb.

Bu ilin iyununda keçirilən Bakı Enerji Həftəsi, həmçinin 1-ci Azərbaycan–ABŞ İqtisadi Dialoqu zamanı İqtisadiyyat Nazirliyi və SOCAR ABŞ, Türkiyə, Serbiya, San-Marino, Fransa qurumları ilə investisiya, enerji və rəqəmsal texnologiyalara dair sazişlər və anlaşma memorandumları imzalayıb. İmzalanan müqavilələrin ümumi maliyyə dəyəri 7.5 milyard ABŞ dolları təşkil edib. Bu sənədlər arasında Azərbaycan ilə ABŞ arasında imzalanan "Kritik mineralların və nadir torpaq elementlərinin hasilatı və emalında təchizatın təmin edilməsi" üzrə çərçivə sazişi də yer alıb.

Xatırlatma

Ötən il avqustun 8-də Vaşinqtonda Azərbaycan ilə ABŞ arasında Strateji Tərəfdaşlıq Xartiyasının hazırlanması məqsədilə İşçi Qrupun yaradılması haqqında Anlaşma Memorandumu imzalanmışdı. Bu ilin fevralında isə Bakıda iki ölkə arasında strateji əməkdaşlığa dair xartiya imzalandı.

Ötən ilin avqustunda Vaşinqtonda prezident Donald Trampın vasitəçiliyi ilə 30 ildən çox münaqişədə olan Azərbaycan və Ermənistan arasında sülh sazişi paraflanıb. Həmin sənəddə tərəflərin bir-birlərinin ərazi bütövlüyünü tanıdıqları və qarşılıqlı iddialara son qoyduqları bəyan edilib. Orada habelə "Beynəlxalq Sülh və Rifah naminə Tramp Marşrutu" (TRIPP) layihəsi ilə bağlı da razılıq əldə edilib. TRIPP Ermənistandan keçməklə Azərbaycanın əsas hissəsi ilə Naxçıvan Muxtar Respublikası arasında maneəsiz bağlantını təmin etməlidir.

Türkiyənin "Boğaziçi Savunma Teknolojileri Ve Ticaret Anonim Şirketi"nin Azərbaycandakı filialı ləğv olunduğunu elan edib.

Filialın bağlanması ilə bağlı oktyabrın 4-də İqtisadiyyat Nazirliyi yanında Dövlət Vergi Xidmətinin rəsmi "Vergilər" qəzetində elan dərc olunub. Elanda qeyd edilib ki, kreditorlar iki ay ərzində tələblərini AZ1014 Bakı şəhəri, Nəsimi rayonu, Səməd Vurğun küçəsi, ev 34 ünvanına bildirə bilərlər.

Türkiyənin Ankara şəhərində yerləşən "Boğaziçi Savunma Teknolojileri" pilotsuz uçuş aparatlarının (dron) aşkarlanması, təqibi və məhv edilməsi (antidron) sistemləri, həmçinin avtomatik yanğınsöndürmə texnologiyalarının istehsalı üzrə ixtisaslaşıb. Şirkətin Azərbaycandakı filialı 2024-cü ildən etibarən fəaliyyət göstərirdi.

30 sentyabr – 2 oktyabr 2026-cı il tarixlərində Bakıda keçirilən "ADEX-2026" 6-cı Beynəlxalq Müdafiə Sərgisi çərçivəsində Türkiyə müdafiə sənayesi şirkətləri ilə Azərbaycan arasında 500 milyon ABŞ dolları dəyərində müqavilələr imzalanmışdı.
Sözügedən şirkətin Azərbaycandakı filialının ləğv edilmə səbəbi rəsmən açıqlanmır.

Bununla belə, son günlər iki ölkə arasında xüsusilə sosial şəbəkələr və bəzi media platformalarında qarşılıqlı tənqidlər eşidilir.
Türkiyədə bəzi dairələr ötən ay BMT Baş Assambleyasının sessiyasında İsrail baş nazirinin çıxışı zamanı, bəzi dövlətlərdən fərqli olaraq, Azərbaycan nümayəndəsinin zalı tərk etməməsini mənfi hal kimi dəyərləndirirlər. Eyni zamanda, Azərbaycan məktəblərində hicaba icazə verilməməsi ilə bağlı da tənqidi fikirlər səsləndirilir.

Azərbaycanda isə bu tənqidləri qərəzli sayırlar. Üstəlik, bəzi ekspertlər və cəmiyyət nümayəndələri hesab edir ki, torpaqlar işğal altında olan zaman və müharibə dövründə Türkiyənin verdiyi dəstək əsassız yerə şişirdilir. Onlar vurğulayırlar ki, Azərbaycan Qarabağ savaşında qələbəni öz hərbi gücü sayəsində qazanıb.

Bu gün, oktyabrın 5-i Beynəlxalq Müəllimlər Günüdür.
AZƏRTAC-ın xəbərinə görə, hazırda Azərbaycanın dövlət ümumi təhsil müəssisələrində 121 min 424 müəllim fəaliyyət göstərir.

Son illər Azərbaycanda müəllimlərin sayında ciddi azalma var. Dövlət Statistika Komitəsinin (DSK) məlumatına görə, 10 il əvvəl ölkənin ümumtəhsil müəssisələrində ümumilikdə 158 min müəllim çalışırdısa, ötən il bu rəqəm 144 minə düşüb.

Son 10 ildə 14 minlik azalmanın 9 mindən çoxu sertifikasiya imtahanlarının payına düşür. Bu il elm və təhsil naziri Emin Əmrullayev "Sertifikatlaşdırma: səriştəli müəllim – keyfiyyətli təhsil" mövzusunda keçirilən hesabat tədbirində demişdi ki, sertifikasiya imtahanlarının hər iki cəhdində uğursuz nəticə göstərən ümumilikdə 9 min 334 müəllimin əmək müqaviləsinə xitam verilib.

Üstəlik, ötən illər ərzində bağlanan və birləşdirilən məktəblər də bu azalmaya təsir göstərib.

Rəsmi açıqlamalara görə, sertifikasiya imtahanlarından uğurla keçən müəllimlərin əməkhaqqı 10 faizdən 35 faizədək artıb və hazırda onların orta aylıq əməkhaqqı 1030 manata çatıb.

Xatırlatma

Ümumdünya Müəllimlər Günü hər il oktyabrın 5-də dünyanın bir çox ölkəsində qeyd olunur. Bu əlamətdar gün 1994-cü ildə Beynəlxalq Əmək Təşkilatı və UNESCO tərəfindən təsis edilib. Tarixin məhz 5 oktyabr seçilməsi isə həmin qurumların 1966-cı ildə müəllimlərin hüquq və iş şəraitini qoruyan mühüm sənəd imzalaması ilə bağlıdır.

Həbsdə olan keçmiş deputat, iqtisadçı Nazim Bəydəmirli ədliyyə nazirinə müraciət edərək hüquqlarının əsassız olaraq məhdudlaşdırıldığını bildirib.

O vurğulayıb ki, bilmədiyi səbəbdən ayrıseçkiliyə məruz qalır.

"Videogörüntülərin bərpa edilməsi ilə bağlı müraciətlərimə müsbət cavab verilmir, həyat yoldaşıma baş etibarnamənin rəsmləşdirilməsi mümkün olmur, həmçinin lazımi tibbi yardımla və həkimlə təmin olunmuram", - o şikayətlənib.

Keçmiş deputat əlavə edib ki, 13 saylı Cəzaçəkmə Müəssisəsindən 6 saylı Cəzaçəkmə Müəssisəsinə etap olunduğu gündən (5 aydır karantində saxlanıldığını bildirir) videogörüntü hüququndan məhrum edilib.

N.Bəydəmirli bildirib ki, bu problemlərlə bağlı xanımı Penitensiar Xidmətin rəisi Mirsaleh Seyidovun və Baş Tibb İdarəsinin rəisi Cəmil Kamillinin qəbulunda olub, amma indiyədək heç bir tədbir görülməyib.

Müraciətə sözügedən rəsmi qurumların münasibətini almaq mümkün olmayıb. Amma bundan əvvəl Penitensiar Xidmətdən oxşar şikayətlərə cavab olaraq bildirilmişdi ki, cəzaçəkmə müəssisələrində məhbuslar üçün qanunvericilikdə nəzərdə tutulan bütün zəruri imkanlar yaradılır.

N.Bəydəmirli 2023-cü ilin iyulundan həbsdədir. O, hədə-qorxu ilə əmlak tələb etməkdə təqsirli bilinərək 8 il müddətinə azadlıqdan məhrum olunub. Keçmiş deputat ittihamları "uydurma" adlandırır.

2005-2010-cu illərdə Gədəbəy rayonundan Milli Məclisin üzvü olmuş N.Bəydəmirli vurğulayır ki, 2023-cü ilin yayında Gədəbəyin Söyüdlü kəndində yerli əhalinin etirazları ilə bağlı kimisə "qurban vermək" lazım gəldiyindən məhz onu seçiblər. Bu səbəbdən o, özünü "ekologiya məhbusu" adlandırır.

Xatırlatma

2023-cü ilin iyununda Söyüdlü sakinləri ərazidəki qızıl zavodunun tullantı sularının kənddəki gölü zəhərlədiyini və bunun sağlamlığa ciddi mənfi təsir göstərdiyini bildirərək etiraz aksiyası keçirmişdilər. Hadisələr zamanı və sonradan saxlanılan 8 nəfərə 20 günlük inzibati cəza verilib, 4 kənd sakini isə narkotik ittihamı ilə həbsxanaya göndərilib.

Həmin qızıl zavodunun işi müvəqqəti dayandırılsa da, sonradan rəsmi komissiya yenidənqurma və modernləşdirilmə ilə bağlı müəyyən tövsiyələr verməklə müəssisənin fəaliyyətinin bərpasını mümkün sayıb. Zavodun istismarçısı olan "Anglo Asian Mining" şirkətinin qarşısında yerli icmalarla münasibətlərin yaxşılaşdırılması, Söyüdlü kəndində korporativ tibbi və sosial layihələrin icrası kimi tələblər də qoyulurdu.

Müəssisənin son durumu ilə bağlı yaxın tarixdə ictimaiyyətə hər hansı açıqlama verilməyib.

Azərbaycan baş nazirinin müavini Şahin Mustafayevin rəhbərlik etdiyi nümayəndə heyəti İrana səfəri çərçivəsində bu ölkənin rəsmiləri ilə geniştərkibli görüşlər keçirib.

AZƏRTAC-ın Nazirlər Kabinetinə istinadən sentyabrın 30-da yaydığı məlumata görə, səfər zamanı Ş.Mustafayevin rəhbərlik etdiyi nümayəndə heyəti İranın neft naziri Möhsin Paknejad və energetika naziri Abbas Aliabadi ilə də "məhsuldar" müzakirələr aparıb.

"Hər iki ölkənin iqtisadiyyatı üçün önəmli olan layihələr nəzərdən keçirilib və əməkdaşlıq perspektivləri dəyərləndirilib", - məlumatda bildirilir.

Müzakirələrin detalları açıqlanmasa da, digər yerli media qurumları İrandakı mənbələrinə əsasən Tehranın Azərbaycandan elektrik enerjisi idxalını artırmaq istədiyini bildirir.

Son aylarda iki ölkə arasında elektrik alqı-satqısına dair statistik göstəricilər ictimaiyyətə açıqlanmayıb.

Azərbaycan-İran münasibətləri 2023-cü ilin yanvarında Azərbaycanın Tehrandakı səfirliyinə silahlı hücumdan sonra kəskin gərginləşmişdi. Həmin hücumda bir nəfər həlak olmuşdu. Sonrakı dövrdə əlaqələrdə müəyyən yumşalma yaranıb, tərəflər birgə hərbi təlimlər keçiriblər.

Amma regional geosiyasi gərginlik fonunda yeni böhranlar yaşanıb. Xüsusilə 2026-cı ilin martında İsrail və ABŞ-nin İranla hərbi toqquşmaları zamanı Azərbaycanın Naxçıvan bölgəsinə dronların düşməsi münasibətləri yenidən sınağa çəkib. Prezident İlham Əliyev bu hadisəni "terror aktı" kimi pisləyərək İrandan rəsmi üzrxahlıq tələb edib. Tehran isə qonşu dövlətləri hədəf almadığını bəyan edərək araşdırma aparılacağını bildirib. Bu gərginlik səbəbindən dayandırılan yük daşımaları iki ölkə liderinin telefon danışığından sonra bərpa edilib. Ardınca Azərbaycan İrana humanitar yardım göndərib.

Son vaxtlar ABŞ İrana qarşı illərlə davam edən sanksiyaları daha da sərtləşdirib. Vaşinqton İranın nüvə proqramını dünya üçün təhdid sayır, Tehran isə bu proqramdan geri addım atmayacağını bildirir.

İqtisadçı alim Qubad İbadoğlu bu gün, sentyabrın 29-u səhər Azərbaycanı tərk edərək Almaniyaya gedib.

"Azadlıq" qəzetinə açıqlamasında o, səhhəti ilə əlaqədar olaraq xaricə çıxış qadağasının ləğv edildiyini bildirib. "Müayinə, müalicə və zərurət yaranarsa, ürəyimdən açıq tibbi əməliyyat olunmaq üçün Almaniyaya gəldim", –İbadoğlu bildirib.

Hazırda onun barəsində iltizam qətimkan tədbiri qüvvədədir.

Məsələ ilə bağlı rəsmi qurumlardan münasibət öyrənmək mümkün olmayıb.

Q.İbadoğlu 2023-cü il iyulun 23-də Azərbaycanda həbs edilmişdi. O, əvvəlcə mütəşəkkil qrup halında saxta pul və ya qiymətli kağızlar hazırlamaq və yaymaqda, sonradan isə dini ekstremist materiallar saxlamaq və yaymaqda təqsirləndirilib.

Səhhətindəki problemlərə görə 2024-cü ilin aprelində ev dustaqlığına buraxılan iqtisadçının qətimkan tədbiri sonradan polis nəzarəti ilə əvəzlənib. Həmin ilin avqustunda isə onunla bağlı cinayət işi ümumi icraatdan ayrılıb.

Q.İbadoğlu həbsdən çıxandan bir müddət sonra rəhbərlik etdiyi Azərbaycan Demokratiya və Rifah Partiyasının fəaliyyətinin dayandırılması barədə qərar qəbul olunub. İdarə Heyəti partiyanın fəaliyyətinə xitam verilməsini qurumun rəsmi qeydiyyata alınmaması ilə əsaslandırıb.

Azərbaycandakı avtobusların 87 faizinin yaşı 10 ildən, 61 faizinin yaşı isə 20 ildən yuxarıdır. Bu barədə Dövlət Statistika Komitəsinin (DSK) hesabatında bildirilir.

DSK-nın məlumatına görə, 2025-ci ildə ölkədəki avtobusların ümumi sayı 33 min 186 ədədə çatıb. Bu göstərici 2024-cü ildə 32 min 107 ədəd təşkil edirdi.

Artıma baxmayaraq, avtobus parkında köhnə nəqliyyat vasitələrinin payı yüksək olaraq qalır. 2025-ci ilin sonuna olan məlumata görə, istismar müddəti 10–20 il olan avtobusların sayı 8 min 776, yaşı 20 ildən yuxarı olanların sayı isə 20 min 274 ədəd təşkil edib. Nəticədə ölkənin avtobus parkındakı nəqliyyat vasitələrinin 87.5 faizinin yaşı 10-u, 61 faizindən çoxunun yaşı isə 20-ni keçib.

Xatırlatma

Son illər Azərbaycanda, xüsusilə paytaxt Bakıda vətəndaşlar həm tıxaclardan, həm də sərnişin avtobuslarının durumundan şikayətlənirlər. Xüsusilə isti havada bəzi avtobuslarda kondisionerin olmamasından gileylər eşidilir. Rəsmi açıqlamalara görə isə, son illər paytaxtın bir sıra marşrut xətlərinə müasir avtobuslar cəlb edilib. Bu müasir avtobuslarda gediş haqqı digərlərindən 10 qəpik bahadır.

"Xural TV" internet televiziyasının rəhbəri Əvəz Zeynallı uzun sürən xəstəlikdən sonra bu gün, sentyabrın 28-də vəfat edib.

O, bir ildən çox idi ki, xərçəng xəstəliyindən müalicə olunurdu. Məhz bu səbəbdən də həbsdən vaxtından əvvəl azad edilmişdi. Ötən il aprelin 25-də Penitensiar Xidmətin Müalicə Müəssisəsindən buraxılan jurnalist elə həmin gün Nizami rayon Məhkəməsinin qərarı ilə səhhətinə görə azadlığa buraxılmışdı.

Yaxınları deyirdi ki, Ə.Zeynallının xəstəliyi daha tez müəyyən edilsə də, səhhəti ilə əlaqədar azadlığa buraxılması yubadılıb. Vəkilləri də səhhətinə görə azad olunması üçün məhkəməyə müraciət etmişdi. Rəsmi qurumlar bu iddialara münasibət bildirməyiblər.

Ə.Zeynallı 2022-ci il sentyabrın 9-da həbs olunmuşdu. Ona qarşı əvvəlcə rüşvət ittihamı irəli sürülsə də, sonradan cinayət işinə dələduzluq və nüfuz alveri kimi yeni ittihamlar da əlavə edilmişdi. O, özünü təqsirli bilmir, susdurulması üçün siyasi sifarişlə həbs olunduğunu deyirdi.

Məhkəmənin hökmü ilə 9 il azadlıqdan məhrum edilən jurnalistin cəza müddəti sonradan 2 ay azaldılmışdı.

Bu, Ə.Zeynallının ikinci həbsi idi. Birinci həbsi zamanı isə o, Milli Məclisin keçmiş deputatı Gülər Əhmədovanın şikayəti əsasında 2011-ci il oktyabrında saxlanmış və 9 il müddətinə azadlıqdan məhrum edilmişdi. Həmin vaxt baş redaktor külli miqdarda rüşvət almaq, məhkəmə qərarlarını icra etməmək və vergidən yayınmaqda ittiham olunurdu. O, bütün ittihamları rədd edirdi. 2014-cü ildə prezidentin əfv sərəncamı ilə azadlığa çıxmışdı.

Xatırlatma

Hazırda Azərbaycanda 20 civarında jurnalist həbsxanadadır. Onlar əsasən qaçaqmalçılıq və digər qanunsuz əməllərdə ittiham olunurlar. Amma özləri ittihamları qəbul etmir, bunu peşə fəaliyyətləri və siyasi qərarlarla əlaqələndirirlər.

Beynəlxalq insan haqları təşkilatları hökuməti haqsız yerə tutulan şəxsləri azad etməyə çağırır.

Müxalifətdə olan Azərbaycan Xalq Cəbhəsi Partiyası (AXCP) Nizami rayon şöbəsinin fəalı Tərlan Baxışlının 20 sutka müddətinə həbs edildiyi bildirilir.

Partiyadan yayılan açıqlamaya görə, sentyabrın 25-də səhər saatlarında o, kirayə yaşadığı evdən çıxıb, daha sonra onunla əlaqə qurmaq mümkün olmayıb: "Ailəsinin verdiyi məlumata görə AXCP Nizami rayon Şöbəsinin fəalı Tərlan Baxışlıya 20 sutka inzibati həbs cəzası verilib".

Partiyadan onun şərləndiyini düşünürlər.

Hələlik məsələnin detallarını öyrənmək və AXCP-nin açıqlamasına rəsmi qurumlardan münasibət öyrənmək mümkün olmayıb.

Xatırlatma

Son illər AXCP-nin bir çox üzvləri vaxtaşırı inzibati qaydada həbs edilir. Hazırda partiyanın 20-dən çox fəalı isə uzunmüddətli həbsdədir. Onların arasında AXCP sədri Əli Kərimli də var. Həmin şəxslər müxtəlif ittihamlarla üzləşsələr də, partiya onların siyasi sifarişlə həbs olunduğunu bəyan edir.

Hüquq müdafiəçilərinin hazırladığı siyahıya görə, Azərbaycan həbsxanalarında hazırda ümumilikdə 328 siyasi məhbus var. Amma rəsmilər, bir qayda olaraq, ölkədə siyasi fəaliyyətə görə həbslərin olması ilə bağlı deyilənləri əsassız sayırlar. Onlar vurğulayırlar ki, həmin şəxslər sırf törətdikləri qanunazidd əmələ görə mühakimə olunublar.

2026-cı ilin yanvar-avqust aylarında Azərbaycana dünyanın 191 ölkəsindən 1 milyon 586 min xarici və vətəndaşlığı olmayan şəxs gəlib.

Dövlət Statistika Komitəsinin (DSK) sentyabrın 25-də yaydığı məlumata görə, bu göstərici əvvəlki ilin müvafiq dövrü ilə müqayisədə 7.8 faiz azdır.

Gələnlərdən ən çox- 27.9 faizini Rusiya, 19.4 faizini Türkiyə, 7.8 faizini İran, 4.8 faizini isə Gürcüstan vətəndaşları təşkil edib.

Ötən ilin eyni dövrü ilə müqayisədə Avropa İttifaqına üzv ölkələrdən gələnlərin sayı 6.6 faiz artaraq 77.8 min, MDB ölkələrindən gələnlərin sayı isə 3.1 faiz artaraq 619.5 min nəfərə çatıb. Bunun əksinə olaraq, Körfəz ölkələrindən gələnlərin sayı 33.3 faiz azalaraq 192 min nəfərə düşüb.

Bu ilin səkkiz ayında ötən ilin analoji dövrü ilə müqayisədə xarici ölkələrə gedən Azərbaycan vətəndaşlarının ümumi sayı da 2.4 faiz azalaraq 1 milyon 384.5 min nəfər olub. Onların 43.9 faizi Türkiyəyə (ötən ilin eyni dövrünə nisbətən 2.2 faiz çox), 14.8 faizi Rusiya Federasiyasına (2.2 faiz az), 12.8 faizi Gürcüstana (13.6 faiz çox), 5.3 faizi isə İrana (41.2 faiz az) gedib.

Rəsmi statistika son illər həm Azərbaycana gələnlərin, həm də ölkədən xaricə gedənlərin sayında davamlı azalma meylinin olduğunu göstərir.

Xatırlatma

Ekspertlərin fikrincə, ölkəyə gələn xaricilərin sayının azalmasına iki əsas amil təsir edir: quru sərhədlərinin hələ də bağlı qalması və Azərbaycanda istirahətin qonşu ölkələrə nisbətən baha olması. Quru sərhədləri 2020-ci ildə koronavirus səbəbindən bağlansa da, hökumət təhlükəsizlik amillərini əsas gətirərək bu məhdudiyyəti hələ də qüvvədə saxlayır.

Körfəz ölkələrindən gələnlərin sayındakı azalma isə bu il Yaxın Şərqdə artan hərbi gərginliklə izah olunur.

Azərbaycan vətəndaşlarının xaricə səfərlərindəki geriləməni isə mütəxəssislər əhalinin maddi vəziyyəti ilə əlaqələndirirlər.

Almaniyadan Azərbaycana readmissiya edildikdən sonra həbs olunan Samir Aşurovun saxlandığı 1 saylı Kürdəxanı Təcridxanasında döyüldüyü bildirilir.
Bu barədə onun yaxınları məlumat yayıb.

Yaxınlarının açıqlamasına görə, Samir Aşurov bunun səbəbini təcridxananın bir əməkdaşına adı ilə müraciət etməsini göstərib. Onların vurğulamasına görə, o, Samir Aşurova “Mənə müəllim deyə müraciət etməlisən” söyləyib.

Yaxınları əlavə edib ki, artıq sentyabrın 22-də baş vermiş hadisə ilə bağlı Penitensiar Xidmətin rəisinə, Ombudsman Aparatına, prokurorluğa şikayət ərizələri yazılıb.

Hələlik, bu iddialara sözgedən təcridxananın cavabdeh şəxslərindən və başqa rəsmi qurumlardan münasibət alamq mümkün olmayıb.

Amma Penitensiar Xidmətdən bir qayda olaraq cəzaçəçəkmə müəssisələri və təcridxanalarda saxlanan şəxslərə işgəncə verilməsi ilə bağlı iddiaları yalanlayırlar.

17.09.2026

Ali Məhkəmə də Samir Aşurovu vaxtından əvvəl azadlığa buraxmadı

Sentyabrın 17-də Ali Məhkəmədə Almaniyadan Azərbaycana readmissiya edildikdən sonra həbs olunan Samir Aşurovun kassasiya şikayətinə baxılıb.

Yaxınlarının yaydığı məlumata görə, şikayət Bakı Apellyasiya Məhkəməsinin S.Aşurovun vaxtından əvvəl azadlığa buraxılması barədə müraciətini təmin etməməsi ilə bağlı olub.

Ali Məhkəmənin hakimi Vidadi Cəfərov Bakı Apellyasiya Məhkəməsinin qərarını qüvvədə saxlayıb.

"Samirə verilən haqsız cəzanın 2/3 hissəsini çəkdikdən sonra vaxtından əvvəl azadlığa buraxılması üçün müraciət etmişdi. Amma Xəzər rayon Məhkəməsi bu müraciəti rədd edib, Apellyasiya Məhkəməsi isə həmin qərarı dəyişdirmədən qüvvədə saxlayıb", – onda S.Aşurovun xanımı Nuranə Aşurova demişdi.

Samir Aşurovun həbsi

2023-cü il martın 29-da Almaniyadan deportasiya olunan S.Aşurov bundan 20 gün sonra saxlanıb. O, Elşən Nəbiyev adlı şəxsə bıçaqla xəsarət yetirməkdə ittiham olunub. Aşurov əvvəlcə Cinayət Məcəlləsinin 126.2.4 (ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma) maddəsi ilə həbsdə saxlanıb. Bir neçə ay sonra isə ona qarşı Cinayət Məcəlləsinin daha bir - 221.3-cü (silahdan və ya silah qismində istifadə olunan əşyalardan istifadə etməklə xuliqanlıq törətmək) maddəsi ilə ittiham irəli sürülüb. 2023-cü il dekabrın 18-də Bakı Ağır Cinayətlər Məhkəməsi onu təqsirli bilərək 6 il 6 ay azadlıqdan məhrum edib.

Hüquq müdafiəçiləri S.Aşurovu siyasi məhbus kimi tanıyıblar. O, ittihamı qurama sayır.

Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus siyahılarına daxil edilənlər sırf törətdikləri əmələ görə məsuliyyətə cəlb olunublar.

Xatırlatma

Son dörd il ərzində Avropa ölkələrindən (əsasən, Almaniyadan) Azərbaycana readmissiya edilən şəxslərdən ən azı beş nəfərin (S.Aşurov daxil) narkotik və başqa ittihamlarla həbsi diqqət çəkib. Onlar həbslərini mühacirətdə olarkən Azərbaycanla bağlı etiraz aksiyalarında fəallıqları ilə izah ediblər. Amma rəsmilər, bir qayda olaraq, insanların tənqidi mövqelərinə görə əsassız yerə təqib olunmaları ilə bağlı deyilənləri qəbul etmirlər.

Azərbaycandan ixrac olunan vintlər (boltlar və qaykalar) üçün gömrük rüsumu kəskin artırılıb.

Nazirlər Kabinetinin sentyabrın 22-də qəbul etdiyi yeni qərara əsasən, bu məhsulların hər 1000 kiloqramı üçün gömrük haqqı 15 dollardan 300 dollara qaldırılıb. Yeni qayda 2029-cu ilin sonuna qədər qüvvədə olacaq.

Qərar dərc olunduqdan 30 gün sonra qüvvəyə minir.

Hökumət bu addımın səbəbini rəsmi olaraq açıqlamayıb.

Son bir ildə Azərbaycanda bir çox sahələrdə rüsum və cərimələr artırılıb.

Həbsdə olan Azərbaycan Xalq Cəbhəsi Partiyası (AXCP) üzvü Razi Alışovun səhhətində ciddi problemlər yarandığı bildirilir.

Partiyadan ailəsinə istinadən yayılan məlumata görə, o, bir müddətdir hərəkət etməkdə çətinlik çəkir, son günlər isə ayaqları tamamilə tutulub: "O bildirib ki, yaxın vaxtlarda həkim müayinəsindən keçib və həkim onun belində yırtıq (qrija) olduğu qənaətinə gəlib. Amma diaqnozun təsdiqlənməsi üçün aparat müayinəsi və müalicə aparılmayıb, ona görə də durumu xeyli ağırlaşıb".

Hazırda onun hazırda 13 saylı Cəzaçəkmə Müəssisəsində saxlandığı bildirilir.

Bu açıqlamaya müəssisənin rəhbərliyindən və Penitensiar Xidmətdən münasibət almaq mümkün olmayıb.

Son vaxtlar həbsdə olan bir çox ictimai fəal və müxalifətçi tez-tez səhhətlərinin pisləşməsi, amma lazımı müayinə və müalicədən kənarda qalmaları ilə bağlı şikayətlər yayırlar. Penitensiar Xidmətdən isə, bir qayda olaraq, məhbuslara qanunvericiliyə uyğun şəkildə bütün, o cümlədən tibbi xidmətlərin göstərildiyi bildirilir.

Xatırlatma

AXCP üzvü R.Alışov 2022-ci ildə həbs olunub. Məhkəmə ona 5 il 6 ay həbs cəzası kəsib. R.Alışov satış məqsədilə narkotik əldə etməkdə günahlandırılır. O, ittihamını qəbul etmir.

Hazırda müxalifətdə olan AXCP-nin sədri də daxil olmaqla, hazırda 20-yə yaxın üzvü müxtəlif ittihamlarla həbsdədir. Partiya onların hamısının siyasi sifarişlə həbs olunduğunu bəyan edib.

Bəzi hüquq müdafiəçilərinin hazırladıqları siyahıya görə, hazırda Azərbaycanda 328 nəfər siyasi məhbus var.

Azərbaycan rəsmiləri isə ölkədə siyasi məhbus olması barədə deyilənləri qəbul etmirlər. Onlar vurğulayırlar ki, adları siyasi məhbus siyahısında yer alan şəxslər törətdikləri konkret cinayətə görə mühakimə ediliblər.

Ermənistan Xarici Kəşfiyyat Xidmətinin rəhbəri Kristine Qriqoryan IV Bakı Təhlükəsizlik Forumunda iştirak edir.

Bu barədə AzadlıqRadiosunun erməni xidmətinə baş nazir Nikol Paşinyanın mətbuat katibi Melanya Arutyunyan məlumat verib.

Sentyabrın 22-də qlobal təhlükəsizliklə bağlı IV Bakı Təhlükəsizlik Forumu başlayıb.

Ötən il Ermənistan Milli Təhlükəsizlik Xidmətinin MTX direktoru Andranik Simonyan 19-21 sentyabr tarixlərində Bakıda "3-cü Beynəlxalq Təhlükəsizlik Forumu"nda iştirak edib.

Azərbaycan Nazirlər Kabineti dövlət məktəblərində şagirdlərin geyim formaları ilə bağlı qaydalara sentyabrın 21-də rəsmi dəyişikliklər edib.

Qərara əsasən, şagirdlərin məktəbli formasından fərqli və ya təhsilin dünyəvilik prinsipinə zidd olan geyimlərdən istifadə etməsi qadağandır.

Vurğulanır ki, Azərbaycan xalqının tarixi, mədəniyyəti və milli-mənəvi dəyərləri ilə bağlı tədbirlərdə şagirdlər milli geyim və ya onun elementlərindən istifadə edə bilərlər, amma bunun üçün məktəbin Pedaqoji Şurasının icazəsi mütləqdir.

Bildirilir ki, uşaqların məktəbə müəyyən olunmuş geyimdə gəlməsinə valideynlər məsuliyyət daşıyır.

"Bu sənədin tələblərinə təhsilalanlar tərəfindən riayət olunması ilə bağlı məsələləri məktəbin Pedaqoji Şurası həll edir", - qərarda yazılır.

Qərarda “dünyəvilik prinsipinə uyğun olmayan” geyim elementlərinin konkret olaraq nələri əhatə etdiyi açıqlanmır.Bir sıra təhlilçilər qərardakı “dünyəvilik prinsipinə uyğun olmayan" geyim elementləri ifadəsini hicab da aid edirlər.

4 il əvvəlki qərar və hicab şikayətləri

Azərbaycanda dövlət ümumi təhsil müəssisələrində vahid geyim forması Nazirlər Kabinetinin 17 mart 2022-ci il tarixli qərarı ilə təsdiq edilib və mərhələli şəkildə tətbiq olunmağa başlanılıb.

Məktəblərin daxili nizamnaməsi də bütün şagirdlərin dərsə vahid formada gəlməsini tələb edir. Amma tələblərdə hicabla bağlı hər hansı bir qeyd yox idi.

Bəzi ekspertlər bunu "bilərəkdən buraxılmış boşluq" kimi qiymətləndirirdilər.

Hər halda, istər 2022-ci il qərarından əvvəl, istərsə də sonra Azərbaycanda bir sıra valideynlər uşaqlarının məktəbə hicabla buraxılmamasından şikayət edirdilər. "Konstitusiyanın 42-ci maddəsinə əsasən, bizim təhsil haqqımız var. Amma dini inancımıza görə uşaqlarımız, övladlarımız məktəbə buraxılmır", - bu il Sumqayıtda yaşayan valideynlərdən biri AzadlıqRadiosuna bildirmişdi.

Hətta 2012-ci ildə Bakıda, Təhsil Nazirliyinin binası qarşısında hicabla bağlı icazəsiz aksiya keçirilmiş və polislə qarşıdurma yaranmışdı. Sonradan həmin hadisələrlə bağlı həbs edilənlər də oldu.

İndi bəzi ekspertlər hesab edirlər ki, qərara bu son dəyişikliklər sözügedən məsələ ilə bağlı hüquqi boşluğu aradan qaldıra bilər.