Gürcüstanda apellyasiya məhkəməsi keçmiş prezident Mikheil Saakashvili barəsində 2005-ci ildə baş vermiş insident zamanı səlahiyyətlərini aşdığına görə azadlıqdan məhrumedilmə cəzası hökmünü qüvvədə saxlayıb.
Tbilisi Şəhər Məhkəməsi Saakashvilini ötən iyul ayında qiyabi olaraq 6 il müddətinə azadlıqdan məhrum edib. O 2005-ci ildə ovaxtkı millət vəkili Valery Gelashvilini döydürmək üçün xüsusi qüvvələri göndərməkdə ittiham edilirdi.
Prokuror Archil Tkeshelashvili noyabrın 22-də deyib ki, apellyasiya məhkəməsi həmin hökmü qüvvədə saxlasa da, prokurorluğun cəzanın sərtləşdirilməsinə dair vəsatətini rədd edib.
Məhkəmənin qərarında deyilir ki, 2004-2013-cü illərdə Gürcüstanın prezidenti olmuş Saakashvili onu tənqid etdiyinə görə millət vəkili Gelashviliyə hücum təşkil edib. Gelashvili Saakashvilin-i dövlət mülkiyyətindən sui-istifadədə ittiham edirdi.
Saakashvili yanvar ayında yenə də qiyabi olaraq gürcü bankir Sandro Girgvlianinin 2006-cı ildə qətlinə dair sübutların ört-basdır edilməsi ittihamı ilə üç il müddətinə azadlıqdan məhrum edilmişdi.
Hazırda Hollandiyada yaşayan keçmiş prezident bütün ittihamları siyasi motivli adlandıraraq rədd edir.
