Keçid linkləri

Təcili xəbərlər
2019, 23 Noyabr, şənbə, Bakı vaxtı 01:20

'Putin Rusiyasını' tənqid edən jurnalistə ‘terror’ ittihamı


Svetlana Prokopyeva

Rusiya hakimiyyət orqanları Federal Təhlükəsizlik Xidmətinin regional ofisinin qarşısında törədilmiş bomba partlayışı ilə bağlı verdiyi şərhə görə müxbir Svetlana Prokopyevaya qarşı cinayət təhqiqatına başlayıb.

Polis ölkənin şimalındakı Pskov şəhərində Prokopyevanın mənzilinə və Moskvadakı Exo Moskvı radiosuna bağlı yerli radiostansiyanın studiyalarına reyd keçirib.

Fevralın 6-da keçirilmiş reyd zamanı redaksiyaya aid material və başqa sənədlər müsadirə edilib.

Prokopyevanın özü polis tərəfindən saxlansa da, az sonra sərbəst buraxılıb.

Prokopyeva Exo Moskvı radiosunun Pskov redaksiyası üçün reportajlar hazırlayır. O həm də AzadlıqRadiosu Rus xidmətinin ştatdankənar müxbiridir.

Prokopyevanın vəkili Tatyana Martynova bildirib ki, jurnalist “mediadan istifadə etməklə terrorizmə haqq qazandırılmasında” ittiham olunur.

Ona qarşı bu ittiham ötən noyabrda Exo Moskvı radiosunun yerli filialında səsləndirdiyi şərhə görə irəli sürülüb. Onun şərhi oktyabr ayında Arxangelsk şəhərində törədilmiş bomba partlayışı barədəydi.

Həmin hadisə zamanı 17 yaşlı bir nəfər FTX-nin regional ofisinin qarşısında əldəqayırma bomba partlatmışdı. Partlayışı törədənin özü həlak olmuş, daha üç zabit yaralanmışdı.

Rusiya mediası xəbər verirdi ki, partlayışı törədən şəxs ölümündən əvvəl sosial mediada FTX-ni cinayət işlərini saxtalaşdırmaqda ittiham etmişdi.

Bu hadisə barədə şərhində Prokopyeva olayı Vladimir Putinin Rusiyasında siyasi fəaliyyətin sərt məhdudlaşdırılması ilə bağlamışdı. O bildirmişdi ki, adamlar çarəsizlikdən belə ekstremal vasitələrə əl atırlar.

Şərh radiostansiyanın saytında və Pskov Newsfeed xəbər portalında dərc olunmuşdu.

Rusiya mediasına nəzarət edən dövlət qurumu – Roskomnadzor hər iki sayta xəbərdarlıq etdikdən sonra şərh internetdən silinmişdi.

Dekabrın 6-da Prokopyeva saxlanmış, Pskov məhkəməsi radiostansiyanı 2200 dollar, Pskov Newsfeedportalını isə 3000 dollar cərimə etmişdi.

İtithamı rədd edən Prokopyeva AzadlıqRadiosuna deyib ki, o verdiyi şərhin üstündə dayanır.

“Bu repressiv şəraitdə bütöv bir nəsil böyüyüb. Onların 18-yaşı var. Belə terror aktının elə bircəsi vahimə doğurur. Terrorçu hərəkətlər həmişə pisdir. Çox pisdir ki, gənclər belə vasitələrə əl atırlar....”

Prokopyeva bildirir ki, belə bir hissiyyat köməksizlik və ümidsizlikdən yaranır: “Gənclər təkcə terrora əl atmırlar. Onlar süstləşirlər və ölkəni tərk etmək istəyirlər”.

Human Rights Watch təşkilatı jurnalistə qarşı ittihamı pisləyib və bildirib ki, hakimiyyət orqanları antiterror qanunlarından legitim ifadəni boğmaq üçün istifadə edir.

Günün bütün mövzuları

XS
SM
MD
LG