Keçid linkləri

2024, 28 Mart, Cümə axşamı, Bakı vaxtı 19:14

Rusiya Suriyada ABŞ-ın dəstəklədiyi qüvvələrə zərbə endirib


Rusiyanın Su-34 zərbə təyyarəsi (Arxiv)
Rusiyanın Su-34 zərbə təyyarəsi (Arxiv)

ABŞ-ın F-18 təyyarələri havaya qaldırılıb və pilotlar Rusiyanın iki Su-34 təyyarəsi ilə vizual kontaktda olublar

“Los Angeles Times” qəzetinin verdiyi məlumata görə Rusiyanın hərbi təyyarələri Suriyada Pentaqon tərəfindən dəstəklənən qiyamçılara hava zərbələri endirib.

ABŞ hərbiyyəsi bu insidenti Suriyada hava kampaniyasına başlayandan bəri Moskvanın ən böyük təxribatı adlandırıb.

Hava zərbələri İordaniya sərhədi yaxınlığında, Rusiya təyyarələrinin əvvəllər uçmadığı ərazidə endirilib.

Sözü gedən qiyamçı bazasında ABŞ hərbçiləri olmasa da, Pentaqon təcili olaraq qaynar xətlə Moskvadan zərbələrin dayandırılmasını tələb edib.

Bundan əlavə ABŞ-ın F-18 təyyarələri havaya qaldırılıb və pilotlar Rusiyanın iki Su-34 təyyarəsi ilə vizual kontaktda olublar.

Rusiya təyyarələri əvvəlcə ərazini tərk etsələr də, az sonra ikinci zərbəni endirmək üçün qayıdıblar. Artıq bu vaxt ABŞ təyyarələri yanacaq doldurmaq üçün öz bazalarına qayıtmışdılar.

ABŞ rəsmiləri bildiriblər ki, Rusiya ya öz qüvvələri üzərində tam nəzarətə malik deyil, ya da bilərəkdən təxribat törədir. Vaşinqton bütün hallarda Moskvadan izahat gözləyir.

Səudiyyənin ürəyincə?

Siyasi təhliçilər diqqəti belə bir məqama çəkirlər ki, bu insident 51 ABŞ diplomatının imzaladığı memo açıqlanandan az sonra baş verib.

Bu məktubda faktiki olaraq Dövlət Departamentinin tabeçiliyində olan diplomatlar prezident Obamanın Suriyadakı siyasətini kəskin tənqid edir, hökuməti Suriya rejiminə münasibətdə sərt mövqe tutmağa çağırırlar.

Dövlət Departamentinin sözçüsü John Kirby bu sənədi “qeyri-adi” adlandırıb.

CNN isə bildirir ki, ABŞ administrasiyasında çaşqınlığa səbəb olmuş müraciət dərhal Səudiyyə Ərəbistanı tərəfindən dəstəklənib.

Səudiyyənin xarici işlər naziri Adel al-Jubeir “biz bunları münaqişə başlanandan deyirik” bəyanatını verib.

Rusiya təyyarələrinin vurduğu qiyamçı bazasında ABŞ hərbçiləri 180 döyüşçüyə İŞİD-lə mübarizə üçün təlim keçmişdilər.

“Los Angeles Times” yazır ki, Rusiyanın bu hərəkəti, onun Vaşinqtonu öz mövqeyinə yaxınlaşdırmaq istəyindən qaynaqlana bilərdi.

ABŞ rəsmiləri bildiriblər ki, insident Moskva ilə ciddi şəkildə müzakirə ediləcək.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG