Xəbərlər
MN: Fərrux kəndi və ətraf yüksəkliklərdəki mövqelərdə heç bir dəyişiklik baş verməyib
Azərbaycan ordusunun Fərrux ərəzisindən çıxması barədə Rusiya Müdafiə nazirliyinin yaydığı məlumatdan bir qədər sonra Azərbaycan Müdafiə Nazirliyi bu məlumatı təkzib edib. Nazirliyin martın 27-də yaydığı məlumatda deyilir ki, Azərbaycan Ordusunun Fərrux kəndi və ətraf yüksəskliklərdəki mövqelərində heç bir dəyişiklik baş verməyib.
"Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir".
Nazirlik həmçinin Rusiya tərəfinin açıqlamasında atəşkəsin guya Azərbaycan tərəfindən pozulması barədə verilmiş məlumatın da həqiqətə uyğun olmadığını və Azərbaycan hərbçiləri arasında yaralanma halı qeydə alınmadğını bildirir.
"Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir"
Müdafiə Nazirliyi Rusiyanın Müdafiə Nazirliyinə xatırlafır ki, fevral ayında Azərbaycanla və Rusiya prezidentləri arasında Mütəfiqlik Bəyannaməsini yara salır.
"Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.”.
Nazirliyin açıqlamasında daha sonra bəyannamənin 18-ci bəndini də bir daha xatırladılır. Qeyd olunur ki, Rusiya Müdafiə Nazirliyinin bu açıqlamaları Rusiya prezidenti tərəfindən imzalanmış bəyannaməyə hörmətsizlikdir.
"...18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər. Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir"
Müdafiə Nazirliyi bir daha Rusiya Müdafiə nazirliyinə xatırladır ki, Azərbaycanın Xocalı rayonunda "Furux" adlı kənd yoxdur.
"Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir" Azərbaycan Müdafiə Nazirliyinin açıqlamasında vurğulanır.
***
Azərbaycan Fərruxdan öz bölmələrini çıxarıb-Rusiya Müdafiə Nazirliyi
"Danışıqların nəticələrinə əsasən, Azərbaycan tərəfi FURUX (Fərrux -AR.) yaşayış ərazisindən öz bölmələrinin çıxarılmasını həyata keçirib".
Martın 27-də Rusiya Müdafiə Nazirliyinin yaydığı məlumatda belə deyilir.
Nazirliyin məlumatında bir də atəşkəsin iki dəfə Azərbaycan silahlı qüvvələri tərəfindən pozulduğu vurğulanır. Həmçinin qeyd olunur ki, atışma nəticəsində hər iki tərəfdən iki nəfər yaralanıb.
Azərbaycan Müdafiə Nazirliyinin hələkə bu açıqlamaya münasibəti bəlli deyil.
***
"Azərbaycan Respublikası Müdafiə Nazirliyi Rusiya Federasiyası Müdafiə Nazirliyinin 2022-ci il 26 mart tarixli həqiqəti əks etdirməyən və birtərəfli açıqlaması ilə bağlı təəssüfünü bildirir".
Azərbaycanın müdafiə naziriyi Rusiya müdafiə nazirliyinin martın 26-da yaydığı məlumata verdiyi reaksiyada belə deyilir.
Məlumatda martın 25-də iki ölkənin müdafiə nazirləri telefon danışığı zamanı Rusiya sülhməramlı kontingentinin müvəqqəti yerləşdiyi Azərbaycan əraziləri boyunca yaranmış vəziyyət müzakirə edilib. Söhbət zamanı Azərbaycan tərəfi bəyan edib ki, məntəqələrdə mövqelərin və dislokasiya yerlərinin dəqiqləşdirilməsi aparılır.
"Lakin buna baxmayaraq martın 26-sı səhər saatlarında qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib".
Müdafiə Nazirliyi bildirir ki, Azərbaycan 2020-ci il 10 noyabr tarixli üçtərəfli bəyanata sadiqdir və onun heç bir müddəasını pozmayıb.
"Təəssüflə qeyd edirik ki, həmin bəyanatın 4-cü bəndinə uyğun olaraq, Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən tam olaraq çıxarılması indiyə qədər icra edilməmişdir. Buna görə bəyanatın müddəalarını pozan Azərbaycan deyil, məhz Ermənistandır".
Nazirliyin açıqlamasında bildirir ki, Rusiya Federasiyası Müdafiə Nazirliyinin bu açıqlaması ikitərəfli əlaqələrin mahiyyətinə və 2022-ci il 22 fevral tarixində iki ölkə arasında imzalanmış müttəfiqlik qarşılıqlı fəaliyyəti haqqında Bəyannaməyə ziddir.
Azərbaycan ərazisində “Dağlıq Qarabağ” adlı inzibati ərazi vahidi yoxdur. Açıqlamada qeyd edilən kəndin adı Furux deyil, Fərruxdur".
Nazirlik bildirir ki, "yuxarıda qeyd edilənlərlə əlaqədar Azərbaycan Respublikası Müdafiə Nazirliyi Rusiya Federasiyası Müdafiə Nazirliyini üçtərəfli bəyanatın müddəalarına uyğun olaraq Ermənistan ordusunun qalıqlarının və qeyri-qanuni erməni silahlı dəstələrinin Azərbaycanın beynəlxalq birlik tərəfindən tanınmış ərazilərindən tam olaraq çıxarılmasını təmin etməyi, Azərbaycan silahlı qüvvələrinin ölkəmizin suveren əraziləri daxilində hərəkətini təhrif edilmiş formada qələmə verməməyi, “Dağlıq Qarabağ” ifadəsi işlətməməyi və Azərbaycan ərazilərinin adını düzgün olaraq göstərməyi xahiş edir"-deyə Azərbaycan Müdafiə Nazirliyinin bəyanatında deyilir.
***
Rusiya müdafiə nazirliyinin məlumatından sonra Rusiyanın xarici işlər nazirliyi də tərəfləri təmkinli olmağa çağırıb.
"Biz tərəfləri təmkin nümayiş etdirməyə və mövcud üçtərəfli sazişlərə ən yüksək səviyyədə ciddi əməl olunmasını təmin etməyə çağırırıq"
****
"Martın 24-dən 25-dək Azərbaycan Respublikasının silahlı qüvvələri Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub. Dağlıq Qarabağ ərazisində müşahidə məntəqəsi qurub. “Bayraktar-TB 2” tipli pilotsuz uçuş aparatı Furux (Fərux-A.) yaşayış məntəqəsi ərazisində Dağlıq Qarabağ silahlı birləşmələrinin bölmələrinə 4 zərbə endirib".
Belə bir məlumat martın 26-da Rusiya Müdafiə Nazirliyinin Qarabağdakı Rusiya sülhməramlı kontingentinin fəaliyyəti haqqında dərc etdiyi bülletenində yer alıb.
Məlumatda deyilir ki, "hazırda Rusiya sülhməramlı kontingentinin komandanlığı vəziyyətin həlli və qoşunların ilkin mövqelərinə qaytarılması üçün tədbirlər görür. Qoşunların çıxarılması üçün Azərbaycan tərəfinə müraciət göndərilib".
Xatırlatma
Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. Amma 2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağda Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.
Bütün xəbərləri izləyin
Harris sorğularda Trampla fərqi azaldır
Yeni rəy sorğuları ABŞ-nin vitse-prezidenti, 5 noyabr prezident seçkisində demokratların potensial namizədi Kamala Harrisin respublikaçı rəqibi Donald Trampla (Donald Trump) aralarındakı fərqi azaltdığını göstərir.
"Reuters" yazır ki, 81 yaşlı prezident Co Bayden (Joe Biden) seçki yarışından çəkiləndən Harris onun varisi kimi dərhal kampaniyaya başlayıb və bununla da durğun seçki marafonu silkələnib
İyulun 25-də Hyustonda Amerika Müəllimlər Federasiyası qarşısındakı çıxışında 59 yaşlı Harris iqtisadi siyasət, işçi hüquqlarından, əlçatan səhiyyə və uşaq təminatı planlarından danışıb. O, respublikaçıları məktəblərdə silahlı insidentlər fonunda silahlara məhdudiyyətləri önlədiyinə görə tənqid edib.
Bayden iyulun 21-də seçki yarışından çəkildiyini açıqlayıb. "Reuters/Ipsos" sorğusu daxil olmaqla o vaxtdan bəri keçirilən sorğuların bəziləri Harrisin, digərləri Trampın mövqeyinin yaxınlaşdığını, təxminən bərabərləşdiyini göstərir. Bu isə üç ay yarımlıq seçki marafonunda sərt mübarizənin aparılacağını göstərir.
İyulun 25-də dərc olunmuş "The New York Times/Siena College" sorğusuna görə, qeydiyyata alınmış seçicilər arasında Tramp 48, Harris 46 faiz səs yığıb. İyulun əvvəlində Tramp-Bayden nisbəti 49-41 faiz idi. Bayden iyunun sonunda Trampla debatda uğursuz performans göstərmişdi. Ondan sonra demokratlardan onun seçkidən çəkilməsi çağırışları güclənib.
Tərəddüdlü ştatlar
Bu sorğular amerikalıların siyasi namizədlərə dəstəyinin vacib göstəricisi sayılır. Ancaq bir sıra ştatlarda rəqabət güclü olur, seçkidə kimin qalib gəldiyinə qərar verən ABŞ Seçkiçilər Kollegiyasında balansı dəyişə bilir.
"Emerson College/The Hill"in dərc etdiyi sorğu isə Harrisin beş kritik ştatda belə Trampla arasındakı fərqi azaltdığını üzə çıxarıb. Söhbət Arizona, Corciya, Miçiqan, Pensilvaniya və Viskonsin ştatlarından gedir.
Ümumilikdə isə rəy sorğuları 78 yaşlı Trampın cüzi fərqlə Harrisdən önə çıxdığını ortaya qoyub.
Sentyabrın 10-na Trampla Bayden arasında növbəti debat planlaşdırılırdı. Harris həmin gün Trampla debata çıxmağa hazır olduğunu deyib. Amma Trampın seçki qərargahı iyulun 25-də bildirib ki, demokratlar namizədlərinin adını rəsmən elan etməyincə debatın detalları yekunlaşdırıla bilməz.
Demokratların qurultayı avqustda keçirilməlidir.
Rusiyada YouTube videolarının sürətini azaldacaqlar
Rusiyada Dövlət Dumasının üzvü Aleksandr Xinşteyn iyulun 25-də deyib ki, gələn həftənin sonunadək Rusiyada YouTube videolarının yüklənmə sürəti 70 faiz azaldılacaq. Deputat Telegram-da süni azaldılmanı "məcburi addım" adlandırıb, bu sosial platformanın "qanunu pozması və cəzasız qalması" ilə əlaqələndirib. Onun sözlərinə görə, bu tədbir yalnız videohostinqin desktop versiyasına aid olacaq, mobil versiyaya toxunmayacaq.
Xinşteyn YouTube-u anti-Rusiya hostinq siyasəti aparmaqda, mövqeyi Qərbin baxışından fərqlənən ictimai xadimlərin kanallarını silməkdə ittiham edib.
Dövlət Dumasının deputatı Rusiyada YouTube videopaylaşım platformasının sürətinin azaldılmasında Moskvanın iştirakını açıq şəkildə təsdiqləyən ilk rəsmi şəxsdir. Daha öncə problemlərin texniki xarakterli olduğu deyilirdi. Bu versiyanı Kremlin sözçüsü Dmitri Peskov da irəli sürmüşdü.
İyulun əvvəlində YouTube Rusiyanın bir sıra müğənni və aktyorlarının kanallarını Ukraynadakı müharibəyə verdikləri aktiv dəstəyə görə bloklayıb. Onların sırasında Şaman, Qriqori Leps, Polina Qaqarina, Oleq Qazamnov, Yuliya Çiçerina vardı. Bloklanma ABŞ və Aİ-nin 14-cü sanksiya paketi ilə bağlı atılan məhdudlaşdırıcı tədbirlər çərçivəsində tətbiq edilib.
Rusiya ərazisində YouTube-un işində problemlərlə bağlı ilk dəfə iyulun 11-də "Rostelekom" şirkəti məlumat yayıb.
"Meduza"nın telekommunikasiya sahəsində mənbəyi isə hakimiyyətin artıq videopaylaşım platformasının işini məhdudlaşdırmağa başlaması ehtimalını irəli sürmüşdü.
Qazeta.ru prezident administrasiyasına yaxın mənbəyə istinadla yazırdı ki, sentyabrda Rusiyada YouTube bloklanacaq, iyul-avqustda "müəyyən deqradasiya olacaq, ayrı-ayrı regionlarda YouTube-un işi pisləşəcək".
Rusiya 2022-ci il fevralın sonunda Ukraynaya qarşı genişmiqyaslı müdaxiləyə başlayandan sonra ölkədə bir sıra sosial şəbəkələrə və populyar saytlara çıxış məhdudlaşdırılıb. Ancaq YouTube hələlik bloklanmayıb, bir ehtimal bu videohostinqə Rusiyada adekvat alternativin olmamasıdır.
Bayden Netanyahu ilə görüşüb
İyulun 25-də ABŞ prezidenti Co Bayden (Joe Biden) Ağ evdə İsrailin baş naziri Benyamin Netanyahu ilə görüşüb. ABŞ administrasiya rəsmilərinin dediyinə görə, görüşün əsas mövzusu Qəzzada atəşkəslə bağlı razılaşma, ABŞ və Aİ-nin terrorçu kimi tanıdığı HƏMAS radikal qruplaşmasının girovları azad etməsi barədə olub.
Netanyahu Baydenə İsrail dövlətinə "50 illik" dəstəyinə görə təşəkkür edib. İlk dəfə 1972-ci ildə Senata seçilən Bayden 50 ildən çoxdur siyasətdədir. O, noyabrın 5-də keçiriləcək prezident seçkisində Demokratlar Partiyasından namizəd olmaqdan imtina edərək vitse-prezident Kamala Harrisi dəstəkləyib.
Netanyahuya müraciət edən ABŞ prezidenti deyib ki, onlar çox məsələni müzakirə etməlidirlər. Ağ evin təmsilçisi Con Körbi (John Kirby) daha sonra bildirib ki, görüşdə prezident bir daha Qəzza sektorunda atəşkəsin tezliklə, azından altı həftəliyə əldə olunmasının vacibliyini qeyd edib.
Harris daha qəti danışıb
Baydenlə Netanyahu HƏMAS-ın girov kimi saxladığı, ABŞ və İsrail vətəndaşlığı olan şəxslərin ailələri ilə də görüşüblər.
ABŞ-nin vitse-prezidenti Kamala Harris isə Netanyahu ilə görüşündə onu HƏMAS-la tezliklə atəşkəs sazişi əldə etməyə çağırıb. Onun sözlərinə görə, Netanyahu ilə "səmimi və konstruktiv" danışıq aparıb, İsrailin özünümüdafiə hüququnu vurğulamaqla yanaşı, Qəzzada doqquz aydır gedən müharibədə yüksək ölü sayı, ağır humanitar vəziyyətlə bağlı dərin narahatlığını bildirib.
Demokratlar Partiyasından prezidentliyə mümkün namizəd Harris prezident Co Baydenin Qəzzada qəddar müharibəyə son qoymağın vaxtının çatması ilə bağlı çoxdankı mesajı bir də dilə gətirib. AP Harrisin bu mesajı daha qətiyyətlə verdiyini yazır. Harris HƏMAS-ın qəddarlığını da pisləyib.
Netanyahunun Konqresdəki çıxışı
Bir gün öncə isə Netanyahu Konqresdəki çıxışında Qəzzadakı müharibəni müdafiə edib, HƏMAS-a qarşı "qətiyyətli qələbə" çalacaqlarını söyləyib, atəşkəs danışıqlarına nisbətən az toxunub. Netanyahu İranı Yaxın Şərqdə, bütün dünyada təhlükəsizliyə başlıca hədə adlandırıb. O, Birləşmiş Ştatları İsraillə birlikdə İran təhdidinə qarşı hərbi alyans yaratmağa çağırıb. Netanyahu həmçinin Vaşinqtonu İsrailə hərbi yardımı gücləndirməyə səsləyib.
Oktyabrın 7-də HƏMAS İsrailə hücum edərək 1200 nəfəri qətlə yetirib, 250 nəfəri girov götürüb. Girovlardan bəziləri sonradan azad olunub, bəziləri vəfat edib.
Qəzzadakı əməliyyatlarda isə azı 35 min fələstinlinin öldürüldüyü bildirilir.
Vaşinqtonda Netanyahunun səfərinə etiraz aksiyası keçirilib. Kapitoli binasının ətrafına yığışanlar Fələstini müdafiə, İsraili Qəzzada dinc əhalini öldürməkdə ittiham ediblər. Konqresin onlarla üzvü isə Netanyahunun çıxışı zamanı etiraz əlaməti olaraq zalda iştirak etməyiblər.
Eyni vaxtda Vaşinqtonda İsrail tərəfdarlarının da nümayişləri keçirilib. Onlar Netanyahu hökumətini girovların azad olunmasından ötrü yetərincə səy göstərməməkdə ittiham ediblər.
Həyat yoldaşlarının telefonlarına izləmə tətbiqi quraşdırıblar
Ukrayna şirkətinin hazırladığı "mSpy" tətbiqini minlərlə rusiyalı istifadə edib. Əslində bu tətbiq mobil cihazlar və kompüterlərdə uşaqlara valideyn nəzarəti üçün yaradılıb, ancaq bəlli olub ki, bir çoxları onu gizlicə həyat yoldaşlarının telefonlarına yerləşdiriblər.
2024-cü ilin iyununda "mSpy" dəstək xidmətinin databazası internetə sızıb. Databazada yüz minlərlə elektron poçt ünvanı, telefon nömrələri, digər şəxsi məlumatlar vardı.
Rusca yazılmış azı 2 min 500 dəstək xahişində istifadəçilər ya tətbiqin silinməsini istəyirlər, ya da xəyanətdən şübhələndiklərini dilə gətirirlər.
AzadlıqRadiosunun "Sistema" rusdilli araşdırma layihəsi Rusiyanın hüquq-mühafizə orqanlarının "mSpy"dan istifadə etmədiyini üzə çıxarıb. Bircə yerdə Rusiya hökumətinin adı keçir. Başqırdıstanda kənd kitabxanasından göndərilən e-mail-də xidmətin keyfiyyətindən şikayət, hüquqi addım atılacağı barədə təhdid yer alır.
"mSpy" çex şirkətinə mənsub olduğunu bildirsə də, sızmada onun arxasında Ukrayna şirkətinin durduğu bəlli olur. Həmin şirkətin "Brainstack_" olduğu müəyyənləşib. Şirkət özü bunu təkzib edib, "Ukrayna ordusuna dəstək verən Ukrayna biznesinə qarşı informasiya hücumu" olduğunu iddia edib.
'Talış Milli Akademiyasının xəbərləri'nin baş redaktoru həbs edilib
İyulun 24-ü axşam saatlarında Səbail rayon Məhkəməsi "Talış Milli Akademiyasının xəbərləri"nin baş redaktoru İqbal Əbilov barəsində 4 ay müddətinə həbs-qətimkan tədbiri seçib. O, Cinayət Məcəlləsinin 283 (milli ədavətin qızışdırılması) və 274 (dövlətə xəyanət) maddələri ilə ittiham olunur.
Bu barədə onun atası Şahin Əbilov məlumat verib.
Ş.Əbilovun sözlərinə görə, İ.Əbilov ona qarşı irəli sürülən ittihamları qəbul etmir.
O əlavə edib ki, oğlu uşaqlıqdan Belarusda yaşayıb: "Oğlum siyasətlə məşğul olmayıb. O, geniş elmi araşdırmalar aparıb. Onun tədqiqatları təkcə talışlarla bağlı deyil, Çindən Türkiyəyə qədər bütün geniş regiona aid olub".
Bəzi yaxınları isə onun həbsini müxtəlif milli azlıqlar, o cümlədən Azərbaycan talışları ilə bağlı araşdırmaları ilə izah edirlər.
Atasının və yaxınlarının bu açıqlamasına, hələlik, rəsmi qurumlardan münasibət almaq mümkün olmayıb.
Amma yerli saytlarda yer alan iddialara görə, İ.Əbilov üçüncü ölkə ərazisində məskunlaşıb xarici xüsusi xidmət orqanının tapşırıqlarını icra etməklə dövlətə xəyanətdə, Azərbaycan ərazisində etnik zəmində nifrət və düşmənçiliyin salınmasına yönələn hərəkətlərdə təqsirləndirilir.
Belarusdan Azərbaycana məzuniyyətə gələn Azərbaycan vətəndaşı İ.Əbilovu iyulun 22-də Masallı rayonunun Bala Kolatan kəndində Dövlət Təhlükəsizliyi Xidmətinin (DTX) əməkdaşları saxlayıb.
35 yaşlı İ.Əbilov virtual "Talış Milli Akademiyası"nın mətbu orqanı olan "Talış Milli Akademiyasının xəbərləri"nin baş redaktorudur. Saytda talış folklor nümunələri, talışlarla bağlı nəşr olunmamış tarixi sənədlər, tədqiqatlar dərc edilib.
İ.Əbilov Belarus Dövlət Universitetinin Beynəlxalq münasibətlər ixtisası üzrə 2012-ci ildə bakalavr, 2013-cü ildə isə magistraturasını bitirib. 2016-cı ildə həmin universitetin aspiranturasına daxil olub.
'Naxçıvanbank'ın lisenziyası ləğv edilib
Azərbaycan Mərkəzi Bankı (AMB) İdarə Heyətinin qərarı ilə "Naxçıvanbank" ASC-nin lisenziyası ləğv edilib.
Bu barədə məlumatı bu gün, iyulun 25-də Mərkəzi Bank yayıb.
Məlumata görə, "Naxçıvanbank" ASC-nin müraciəti əsasında onun lisenziyası ləğv edilib, bunun əvəzində lisenziya bankın bazasında yaradılmış "E-Kredit" MMC bank olmayan kredit təşkilatına (BOKT) verilib: "Cari ilin ötən dövrünün maliyyə hesabatlarına əsasən, "Naxçıvanbank" ASC-nin maliyyə göstəriciləri qənaətbəxş olub, likvid aktivləri kreditor öhdəliklərini dəfələrlə üstələyib".
Açıqlamaya görə, yenidən təşkil prosesi çərçivəsində onun öz əmanətçiləri və digər kreditorları qarşısında öhdəliklərinin yerinə yetirilməsi planı təsdiq edilərək icrasına başlanıb: "Bu çərçivədə hesablarında olan vəsaitlərin əldə edilməsi üçün müraciət etməyən fiziki və hüquqi şəxslərin hesabları üzrə qalıqlar (342 min 858.16 manat) Mərkəzi Bankda açılmış xüsusi hesaba köçürülüb".
Hazırda Azərbaycanda 23 bank var. Son 10-15 ildə ölkədə 20-dən çox bankın lisenziyası müxtəlif səbəblərdən ləğv edilib. Bu daha çox onların öz öhdəliklərini yerinə yetirə bilməmələri ilə izah edilib. Onların elə 10-dan çoxunun bağlanması dünyada neftin qiymətinin kəskin düşməsi və 2015-ci ildə ölkədə baş verən iki devalvasiyadan sonraya təsadüf edib.
Həmin banklardakı sığortalanan əmanətlər, əsasən, qaytarılsa da, qorunmayan əmanətlərlə bağlı şikayətlər hələ də qalmaqdadır.
Rusiyada vertolyot qəza edib, ekipaj həlak olub
Rusiyanın qərbi Kaluqa vilayətində hərbi Mi-28 vertolyotu qəza edib. Müdafiə Nazirliyi ekipaj üzvlərinin həlak olduğunu bildirir. Vertolyotda neçə nəfərin olduğu deyilməsə də, Mi-28 ekipajı adətən iki nəfərdən ibarət olur.
Nazirlik qəzanın ilkin səbəbi kimi texniki nasazlığı göstərib. Vertolyotun planlaşdırılmış uçuş həyata keçirdiyi qeyd olunur.
Region qubernatoru Vladislav Şapşa Telegram-da yazıb ki, hadisə yerində xilasedicilər işləyir.
Vertolyotun Kaluqa ilə Bryansk vilayətlərinin sərhədindəki Jizdrinsk rayonunda əhali yaşamayan, meşə ərazisinə düşdüyü, həmin yerdə dağıntıya səbəb olmadığı bildirilir.
Mi-28 zərbə vertolyotu zirehli texnikanın, hava hədəflərinin, düşmənin canlı qüvvəsinin axtarışı və məhvi üçün nəzərdə tutulub. O, həmçinin ərazilərdə keşik çəkmək və kəşfiyyat aparmaq xüsusiyyətinə də malikdir.
2023-cü il mayın 12-də Rusiyanın Ukraynadan ilhaq etdiyi Krımda Mi-28 vertolyotu qəza etmiş, hər iki pilot həlak olmuşdu. Onda Rusiya Müdafiə Nazirliyi aviaqəzanın səbəbi kimi texniki nasazlığı göstərmişdi.
Moskvada avtomobil partlayıb, Türkiyə şübhəlini saxladığını bildirir
Türkiyə daxili işlər naziri Ali Yerlikaya iyulun 24-də deyib ki, Türkiyə polisi Moskvada az əvvəl avtomobilin partladılmasında şübhəli bilinən rusiyalını saxlayıb.
Yerlikayanın verdiyi məlumata görə saxlanmış şəxs – Rusiya vətəndaşı Yevgeni Serebryakov Moskvada terrorçu akt törədərək avtomobili partlatmaqda şübhəli bilinir.
Nazir X platformasında yazır ki, Serebryakov Moskvadan təyyarə ilə gəlib və Türkiyə polisi tərəfindən Muğla vilayətində saxlanıb.
Yerlikayanın dərc etdiyi videoda Türkiyə polisinin bir nəfəri ağ mikroavtobusdan düşürdüyü və qollarını qandalladığı görünür.
***
Bundan əvvəl verilən xəbərlərdə deyilirdi ki, Moskvanın şimalında avtomobilə yerləşdirilmiş qurğunun partladılması nəticəsində iki nəfər xəsarət alıb.
Rusiya Daxili İşlər Nazirliyinin (DİN) sözçüsü İrina Volk deyib ki, bir kişi və bir qadın park edilmiş "Toyota Land Cruiser" avtomobilinə minəndə partlayış baş verib.
Volk həmin şəxslərin xəstəxanaya yerləşdirildiyini, cinayət işi açıldığını bildirib.
Rusiya təhlükəsizlik xidmətləri ilə əlaqələndirilən BAZA Telegram kanalının yazdığına görə, qurbanlardan birinin Rusiya Baş Kəşfiyyat İdarəsinin (QRU) zabiti olduğu güman edilir.
"Astra" Telegram kanalı ordu radiomərkəzinin rəis müavini Andrey Torqaşov və arvadının avtomobilinin partladıldığını yazır.
Daha beş park edilmiş avtomobilə ziyan dəyib.
Məlumata görə, DİN-də mümkün sui-qəsdin Torqaşovun peşəkar fəaliyyəti ilə əlaqəli ola biləcəyini ehtimal edirlər.
"Kommersant"ın yazdığına görə, partlayışla əlaqədar adam öldürməyə cəhd maddəsi ilə cinayət işi açılıb, ancaq sonradan maddəni terakta dəyişə bilərlər.
Torqaşovun həyat yoldaşı Maya "360" telekanalına deyib ki, onun ərinə heç nə olmayıb, avtomobildə başqası olub.
Emin İbrahimov 4 aylıq həbs edildi
İyulun 24-də Nizami rayon Məhkəməsi keçmiş diplomat Emin İbrahimov barəsində 4 aylıq həbs-qətimkan tədbirinin seçilməsi ilə bağlı qərar qəbul edib.
Bununla da məhkəmə istintaq orqanı olan Nizami rayon Polis İdarəsinin vəsatətini təmin edib.
Məhkəmə qərarına etiraz edən E.İbrahimov aclıq aksiyasına başladığını bildirib.
Müdafiə tərəfi məhkəmə qərarından şikayət verəcəyini qeyd edib.
+++
Keçmiş diplomat Emin İbrahimova Cinayət Məcəlləsinin 126.2.4 (xuliqanlıq niyyəti ilə sağlamlığa qəsdən ağız zərər vurmaq) və 221.-cı (xuliqanlıq) maddələri ilə ittiham elan edilib.
Bu barədə vəkil Aqil Layıc bu gün, iyulun 24-də məlumat verib.
Vəkilin sözlərinə görə, E.İbrahimov özünü təqsirli bilmir: "Özü qeyd edir ki, onu izləyiblər və bu qeyd olunan cinayət qondarmadır, onun tənqidi mövqeyi ilə bağlıdır".
Vəkilin açıqlamasına, hələlik, Daxili İşlər Nazirliyindən münasibət almaq mümkün olmayıb.
+++
23 iyul
Keçmiş diplomat, ictimai fəal Emin İbrahimov iyulun 22-də saxlanıb. Onun yaxınlarının bildirdiyinə görə, axşam saatlarında E.İbrahimov zəng edərək Nizami polis İdarəsində olduğunu deyib: "Dedi ki, onu saxlayıblar. Guya adam bıçaqlayıb. Amma özü bunun olmadığını və günahsız olduğunu söylədi".
Daxili İşlər Nazirliyinin (DİN) mətbuat xidmətindən də E.İbrahimovun saxlanması ilə bağlı məlumatı təsdiqləyiblər. Xidmətdən "Turan"a bildirilib ki, E.İbrahimov ilə bir vətəndaş arasında şəxsi zəmində mübahisə yaranıb: "Nəticədə Emin İbrahimov vətəndaşa bıçaqla xəsarət yetirib. Emin İbrahimov saxlanılıb. Bıçaq xəsarəti yetirdiyi şəxs xəstəxanaya yerləşdirilib. Araşdırma aparılır".
Emin İbrahimov: "Quramadır"
Vəkil Aqil Layıc bildirib ki, E.İbrahimov Cinayət Məcəlləsinin 126.1-ci (Qəsdən sağlamlığa ağır zərər vurma) maddəsi ilə şübhəli şəxs qismində saxlanıb.
Vəkil əlavə edib ki, E.İbrahimovun sözlərinə görə, baş vermiş hadisə quramadır: "Emin bəy deyir ki, axşam saatlarında Bakıda evindən çıxanda tanımadığı bir şəxs ona hücum edib, dərhal da mülki geyimli şəxslər yaxınlaşaraq onu polis bölməsinə aparıb. Emin İbrahimovun deməsinə görə, Nizami rayon 24-cü polis bölməsində ondan telefon parolunu tələb ediblər, imtina edəndə isə elektroşok veriblər".
Hələlik, bu deyilənlərə DİN-dən münasibət almaq mümkün olmayıb.
E.İbrahimov Azərbaycanın Birləşmiş Ştatlardakı səfirliyində və başqa qurumlarda çalışıb.
O, ötən il, sentyabrın 20-də də saxlanmışdı. E.İbrahimov onda "ziyanlı" informasiya yaymaqda ittiham olunaraq 30 sutkalıq həbs olunmuşdu. Yaxınları isə onun həbsini Rusiya əleyhinə statuslar yazması ilə əlaqələndirmişdilər.
İyulun 22-də qlobal istilik rekordu yenə təzələnib
İyulun 22-si dünya boyunca qeydiyyatların aparıldığı dövrdə, yəni 1940-cı ildən bəri ən isti gün olub.
Avropa İttifaqının Copernicus İqlim Dəyişikliyi Xidmətinin məlumatına görə həmin gün bütün Yer səthi boyunca temperatur 17.15 dərəcəyə çatıb.
Xidmət bundan əvvəl ən isti günün 21 iyul olduğunu bildirmişdi. Həmin gün orta qlobal temperatur 17.09 dərəcə olmuşdu.
Son günlərdə rekord istilər Yaponiya, İndoneziya və Çinin şəhərlərində qeydə alınıb. Antarktida, Afrikanın bir neçə rayonu, ABŞ və Kanadada da anomal istilər müşahidə olunur.
Fars körfəzi ölkələrində rütubəti də nəzərə alan istilik indeksi 60 dərəcəni keçib.
Avropanın bəzi hissələrində temperatur 45 dərəcəyə çatıb.
***
Avropa İttifaqının Copernicus İqlim Dəyişikliyi Xidmətinin məlumatına görə ötən bazar günü, iyulun 21-də indiyədək qlobal miqyasda qeydə alınmış ən isti gün olub.
Həmin gün Yer səthi üzrə orta temperatur müsbət 17.09 dərəcəyə çatıb. Bu, ötən il iyulun 17-də qeydə alınmış 17.08 dərəcədən azacıq çoxdur.
Ötən həftə isti hava dalğaları Birləşmiş Ştatların, Avropa və Rusiyanın böyük ərazilərinə yayılıb.
Copernicus xidməti Reuters agentliyinə bildirib ki, iyulun 21-də, belə görünür, ötən ilin orta temperatur rekordu aşılıb.
Xidmət Yer üzrə temperatur qeydlərini 1940-cı illərdən aparır.
Bəzi alimlər 2024-dən yeni rekord gözləyirlər
Bu da xəbər verilir ki, ötən il, iyulun 3-dən 6-dək, dalbadal dörd gün ərzində rekord istilik qeydə alınıb.
Alimlər bunu mədən yanacağından istifadə nəticəsində Şimal yarımkürəsində baş verən iqlim dəyişikliyi və ekstremal istilərlə izah edirlər.
2023-ci ilin iyunundan 13 ay müddətində keçən dövr qeydiyyat aparılandan bəri əvvəlki illərlə müqayisədə planetin ən isti dövrü sayılır.
Bəzi alimlərin təxminlərinə görə 2024-cü il ən isti il kimi 2023-cü ilin rekordunu təzələyə bilər.
Buna səbəb olaraq iqlim dəyişikliyi və apreldə başa çatmış El Nino adlı təbii hava fenomeni göstərilir.
Almaniyada İrana bağlılıqda ittiham olunan qruplar qadağan edilir
Almaniya hökuməti iyulun 24-də bildirib ki, Hamburqda mənzillənən, İran rəhbərliyinin ideologiyasını yaymaqda, Livanın "Hizbullah" silahlı qruplaşmasını dəstəkləməkdə ittiham olunan təşkilatı qadağan edib. Polisin ölkə boyunca 53 yerdə reydlər keçirdiyi xəbər verilir.
Qadağan olunan təşkilatlar Hamburq İslam Mərkəzi (IZH) və Almaniyada daha beş altqurumdur. Noyabrda həmin təşkilatlarda axtarışlar aparılmışdı.
Daxili işlər naziri Nensi Fezer deyib ki, təhqiqat zamanı yığılmış sübut-dəlil "ciddi şübhələri o dərəcədə təsdiqlədi ki, bu gün qadağanı elan etdik".
Almaniyaya "islam inqilabı" gətirmək istəyir
"IZH Almaniyada islamçı-ekstremist, totalitar ideologiyanı yayır, özü və altqurumları isə "Hizbullah" terrorçularına dəstək verir, aqressiv antisemitizmi təbliğ edir", - Fezer bəyanatında vurğulayıb.
Nazirlik IZH-in "İranın ali dini liderinin birbaşa təmsilçisi" olaraq islam inqilabının ideologiyasını aqressiv və silahlı yolla yaydığını, Almaniya Federativ Respublikasına belə bir inqilab gətirmək istədiyini bildirir.
1962-ci ildə təsis olunmuş təşkilatın üzvlərinin və tərəfdarlarının sayına dair etibarlı rəqəmlər yoxdur. İllərdir onu qadağan etməklə bağlı çağırışlar səslənir.
IZH ötən payız bildirmişdi ki, "zorakılıq və ekstremizmin istənilən formasını pisləyir, daim sülh, dözümlülük, dinlərarası dialoqu təşviq edib".
Dörd şiə məscidi də qapadılır
Nazirlik bu qadağadan dolayı Almaniyada dörd şiə məscidinin də qapadılacağını bəyan edib. IZH-in aktivləri də müsadirə olunur.
"Hizbullah" Almaniyada qadağan edilib. İranın dəstəklədiyi bu qruplaşma və İsrail ötən ilin oktyabrda İsrail-HƏMAS müharibəsindən bəri, demək olar, hər gün atışır.
Ötən ilin oktyabrında HƏMAS İsrailə hücum edərək 250 nəfəri girov götürüb, min 200-dən çox ölən olub. Girovların bir qismi sonradan azad olunub, bəziləri vəfat edib.
İsrailin bu hücumdan sonra Qəzzaya endirdiyi zərbələrdən isə azı 38 min nəfərin həlak olduğu xəbər verilir.
Dövlət Duması miqrantların hüquqlarını kəskin məhdudlaşdırır
İyulun 23-də Dövlət Duması Rusiyada miqrantlara nəzarəti sərtləşdirən qanun layihələri paketini qəbul edib. Polisə əcnəbiləri ölkədən çıxarmaq qərarı vermək icazəsi verilib. Miqrantlar üçün onların hüquqlarını kəskin məhdudlaşdıran xüsusi "deportasiya rejimi" tətbiq olunur.
Yaşayış izni, yaxud viza olmadan ölkədə qalma müddəti 180 gündən 90 günə salınıb.
Bu qanun layihələri qəbul olunanadək ölkədən çıxarılma barədə yalnız məhkəmələr və sərhəd xidməti qərar verə bilərdi. Rusiyada hüquqi əsaslar olmadan qalan, yaxud cinayətlər törətməkdə təqsirləndirilən əcnəbilər üçün xüsusi hüquqi rejim tətbiq olunur.
"Deportasiya rejimi"ndə olan əcnəbilərin bank hesabları və biznes açması, avtomobil idarə etməsi, nikah bağlaması, digər regiona köçməsi qadağan olunacaq. Polis onların yaşayış yerinə ordersiz gedə bilər. Məhkəmənin sanksiyası olmadan onları texniki nəzarət qurğuları vasitəsilə izləməyə icazə verilir.
Xüsusi rejim miqrantları hüquqsuz edəcək
Polis əməkdaşları bu şəxslər barəsində hətta kommersiya sirri sayılan informasiyanı, bank, vergi məlumatlarını istəyə bilər.
Hüquq müdafiəçilərinin fikrincə, bu rejim miqrantları Rusiya ərazisində hüquqsuz edəcək.
Qanun layihələri Dövlət Dumasına "Crocus City Hall" mərkəzinə hücumdan sonra təqdim olunub. Həmin hücumda 145 nəfər həlak olub, azı 500 nəfər yaralanıb. Hadisəyə görə Orta Asiya ölkələrindən bir neçə nəfər ittiham olunur.
Bu hücumun ardınca Rusiyada hakimiyyətin miqrantlara qarşı ritorikası kəskin dəyişib. Orta Asiya ölkələri vətəndaşlarına Rusiyaya getməmək tövsiyə olunur.
Dumanın spikeri Vyaçeslav Volodin deyib ki, hazırda deputatlar 25 miqrasiya layihəsinə baxır.
AXCP-nin bir üzvü də narkotik ittihamı ilə cəzalandırılıb
Azərbaycan Xalq Cəbhəsi Partiyasının (AXCP) üzvü, iki ildən çoxdur həbsdə olan Razi Alışova 5 il 6 ay həbs cəzası kəsilib. İyulun 22-də Gəncə Ağır Cinayətlər Məhkəməsində ona hökm oxunub. R.Alışov satış məqsədilə narkotik əldə etməkdə və Gəncə sakini Vüqar Cəfərovla əlbirlikdə suçlanır. Eyni hökmlə V.Cəfərova da 6 il 6 ay həbs cəzası verilib.
R.Alışov narkotik satışı ittihamını qəbul etmir.
Psixi xəstəlikdən əziyyət çəkdiyi bildirilən V.Cəfərov əvvəllər xəstəxanada müalicə alıb.
R.Alışovun yaxınları AzadlıqRadiosuna hökmdən apellyasiya şikayəti verəcəklərini bildiriblər.
R.Alışovdan bir neçə ay öncə AXCP-nin Gəncə şöbəsinin başqa bir fəalı, şahmat məşqçisi Şahin Hacıyev də narkotik ittihamı ilə həbs olunmuş, ona 6 il həbs cəzası kəsilmişdi.
Ş.Hacıyev təqsirsiz olduğunu, Facebook hesabındakı paylaşımlarına görə şərləndiyini bildirib.
Xatırlatma
Hazırda AXCP-nin 10 nəfərə yaxın üzvü həbsdədir.
Son illərdə onlarla ictimai-siyasi fəal narkotik ittihamı ilə həbs edilib. Onlar ittihamı qəbul etmir, hökumətin ünvanına səsləndirdikləri tənqidlərə, sosial mediadakı paylaşımlara görə şərlənərək cəzalandırıldıqlarını deyirlər. Üstəlik, narkotiki ciblərinə polislərin atdığını, işgəncə altında etiraf ifadəsi verməyə məcbur qaldıqlarını vurğulayırlar.
Daxili İşlər Nazirliyi fəalların narkotiklə şərlənməsi, işgəncəyə məruz qalmaları haqda dediklərini təkzib edir. Nazirliyin mətbuat xidməti iddia edir ki, onlar konkret faktlar əsasında saxlanılıblar.
Rusiyaya miqrant axını son 10 ildə minimuma enib
Rusiyaya miqrant axını son 10 ildə ən aşağı həddə düşüb. AzadlıqRadiosunun rus xidməti bunu 2008-ci il böhranı, 2014-cü ildə Krımın ilhaqı və COVID-19 pandemiyasından bəri dördüncü azalma dalğası adlandırır.
Rusiya statistika orqanının məlumatına görə, 2023-cü ildə ölkəyə 560 min nəfər gəlib. Bu isə Ukraynada müharibə başlayan 2022-ci ildəkindən 23 faiz azdır: onda Rusiyaya 730 min nəfər gəlmişdi.
Rusiyaya gələnlərin 1/3-i Tacikistandan, 10 faizi Qırğızıstandan, 9 faizi Ukraynadan, Ermənistan və Qazaxıstandan, 4 faizi isə Özbəkistandandır. Belarus, Çin, Türkmənistan, Hindistan və digər ölkələrdən gələn miqrantlar da var.
2023-cü ildə Rusiyaya gələnlərin 55 faizi kişilər, 45 faizi qadınlar olub. Onların əksəriyyəti (76 faiz) əmək qabiliyyəti yaşında gəlib. Miqrantların 11 faizi yaşlılar, 13 faizi isə yaşı 16-dan aşağı olanlardır. Ancaq miqrantların cəmi 1/3-i işləmək məqsədilə gəldiyini bildirib.
Miqrantların çoxunun Moskva və Tümen vilayətlərinə, həmçinin Xantı-Mansi muxtar dairəsinə gəldiyi açıqlanıb, ümumi miqrant sayının 57 faizi bu ərazilərin payına düşür.
Bundan öncə Tomsk vilayətində miqrantların 20 sahədə, o cümlədən taksi, ticarət, ərzaq təchizatı, təhsil, idman, mühafizə, mehmanxana, personal seçimi sahələrində işləməsi qadağan edilib.
Miqrantlara qadağalar
"Agentstvo"nun hesablamasına görə, Rusiya regionlarının 1/3-də, o cümlədən Ukraynadan ilhaq olunmuş Krımda miqrantların işləməsinə məhdudiyyətlər tətbiq edilib.
2023-cü ilin oktyabrında Dövlət Dumasına təqdim olunmuş qanun layihəsində xarici vətəndaşların məktəblərdə, əczaçılıq sahəsində, dövlət tibb ocaqlarında, taksi və yük daşımalarında işləməsinin yasaqlanması təklif olunur.
"Crocus City Hall"da teraktın Tacikistan vətəndaşları tərəfindən törədilməsi haqda rəsmi versiya yayılandan sonra Rusiyada miqrantlara ksenofob münasibət kəskinləşib. Bəzi regionlarda hüquq-mühafizə orqanları əcnəbi işçilərin yaşayış və iş yerlərində reydlər keçiriblər. Bəzi hallarda miqrantları hərbi komissarlıqlarda qeydiyyata salıblar.
Moskva əməkçi miqrantları ölkədən çıxmağa vadar etməkdən ötrü onları Ukraynadakı müharibəyə göndərir. Bunu Peterburqda beynəlxalq hüquq forumunda İstintaq Komitəsinin sədri Aleksandr Bastrıkin söyləyib. Dediyinə görə, Rusiya vətəndaşlığı ala bilmiş 10 minə yaxın miqrant orduya cəlb olunub.
2024-cü ilin əvvəlindən DİN Rusiyadan azı 65 min əcnəbini çıxarıb, 120 min miqrantın ölkəyə girişini önləyib.
Azərbaycan mətbuatı 149 yaşında. Azı 10 jurnalist həbsdədir
İyulun 22-də Azərbaycan milli mətbuatının 149 yaşı tamam olur. Builki mətbuat günü ölkədə ən çox jurnalistin həbsdə olması ilə yadda qalır.
Ötən ilin noyabrından bəri 10-dan çox jurnalist və media işçisi valyuta qaçaqmalçılığı ittihamı ilə saxlanılıb. Amma onlar ittihamları qəbul etmir, həbslərini peşə fəaliyyətləri ilə əlaqələndirirlər. Hakimiyyət təmsilçiləri ölkədə heç bir jurnalistin məhz işinə görə həbs olunmadığını deyir. Ancaq saxlanan jurnalistlər və media işçiləri, əsasən, hakimiyyətdə korrupsiyanı ifşa edən araşdırmaları ilə tanınan AbzasMedia, gündəlik bir neçə saat canlı proqramları ilə cəmiyyətə ölkə gündəmi ilə bağlı alternativ fikirləri çatdıran ToplumTV-nin əməkdaşlarıdır.
Yerli müstəqil jurnalistlər, beynəlxalq media qurumları hakimiyyəti jurnalistlərə qarşı qorxutma taktikasını dayandırmağa çağırır.
ABŞ səfirliyindən çağırış
"Biz Azərbaycanı beynəlxalq insan hüquqları öhdəliklərinə əməl etməyə və haqsız yerə həbs olunmuş bütün şəxsləri azadlığa buraxmağa çağırmaqda davam edirik", - Bakıdakı ABŞ səfirliyinin Azərbaycanda Milli Mətbuat Günü ilə bağlı açıqlamasında vurğulanır.
Həbsdəki jurnalistlər Şuşada yada düşmədi
Noyabrda keçiriləcək COP29 iqlim konfransı ərəfəsində bu çağırışların sayı artır. Hakimiyyət isə Milli Mətbuat Gününü Şuşada "Yalan məlumatların ifşası: Dezinformasiyaya qarşı mübarizə" mövzusunda 2-ci Qlobal Media Forumu ilə qeyd edir. Hökumətin siyasi kursunu dəstəkləyən yerli media təmsilçilərinin, xarici qonaqların qatıldığı tədbirdə ölkə başçısına müstəqil mediaya basqılarla bağlı sual verilməyib. Əvəzində "Reuters" və "Politico" kimi nəşrlər prezident Əliyevin Forumdakı çıxışında Fransanın müstəmləkə altında saxladığı ərazilərlə bağlı fikirlərinə yer verib.
Azərbaycanda son illər müstəqil mediaya təzyiqlər artıb. 2014-cü ildə ABŞ Konqresinin maliyyələşdirdiyi AzadlıqRadiosunun ofisi möhürlənib. 2017-ci ildə bir sıra saytlara Azərbaycandan giriş məhdudlaşdırılıb. Onların arasında AzadliqRadiosu, MeydanTV və "Azadlıq" qəzetinin saytları da var.
Bu il iyunun 13-də Avropa İnsan Haqları Məhkəməsi (AİHM) bir neçə məzmuna görə bütün saytın blok edilməsini ifadə azadlığı hüququnun pozuntusu kimi tanıyıb.
Azərbaycan 2024-cü ildə Sərhədsiz Reportyorlar Təşkilatının mətbuat azadlığı indeksində 13 pillə geriləyərək 180 ölkə içində 164-cü olub. Ötən il 151-ci idi.
Müqayisə üçün, Ermənistan indeksdə 43-cü, Gürcüstan 103-cü pillədə yer tutub.
1875-ci il iyulun 22-də Həsən bəy Zərdabi "Əkinçi" qəzetini nəşr etdirməklə milli mətbuatın əsasını qoyub. 1877-ci ildə fəaliyyəti dayandırılan qəzetin yalnız 56 sayı işıq üzü görüb.
XX əsrin əvvəllərində Azərbaycanda "Ziya", "Kəşkül", "Şərqi-rus", "İrşad", "Molla Nəsrəddin" kimi qəzet və jurnallar "Əkinçi" ənənələrini davam etdirib.
Zelenski Trampa zəng edib
Ukrayna prezidenti Volodimir Zelenski ABŞ prezidentliyinə respublikaçı namizəd Donald Trampla danışıb və Rusiya ilə davamlı sülhün müzakirə edilməsi üçün atılmalı olan addımları üzbəüz müzakirə etməyə hazır olduğunu bildirib.
Bu telefon söhbəti iyulun 19-da Tramp öz partiyasının prezidentliyə namizədlik üçün nominasiyasını qəbul edəndən bir gün sonra baş tutub.
Zelenski telefon söhbəti barəsində X platformasında yazıb:
“Mən Donald Trampla danışdım ki, onu respublikaçı nominasiyası münasibəti ilə təbrik edim və Pensilvaniyada baş vermiş sui-qəsd cəhdini pisləyim. Mən ona gələcəkdə güc və tam təhlükəsizlik arzu etdim”.
Trampın sülh vədi
Zelenski qeyd edib ki, o Trampla şəxsən görüşərək “ədalətli və davamlı sülh üçün atılmalı olan addımları müzakirə etməyə hazır olduğunu” bildirib.
Tramp iyulun 19-da Truth Social platformasında yazıb ki, Zelenski ilə etdiyi “çox yaxşı telefon söhbətində” Rusiyanın Ukraynaya müdaxiləsini müzakirə edib.
Tramp danışıqlar vasitəsilə “dünyaya sülh gətirəcəyini və çox sayda insanın həyatına son qoymuş müharibəni bitirəcəyini” vəd edib:
"Hər iki tərəf bir araya gəlib zorakılığa son qoyacaq və firavanlığa doğru yol açacaq razılaşma barədə danışıqlar apara biləcəklər”.
Narahat dövrdə...
Rusiyanın Ukraynaya tammiqyaslı müdaxiləsi ərzində hər iki tərəfdən on minlərlə insan həlak olub.
29 aydır ki, davam edən müharibənin hələ ki, sonu görünmür. Rusiya hazırda Ukrayna ərazisinin 17 faizini işğal edib.
Şərhçilər bildirirlər ki, Zelenskinin Trampa telefon zəngi Kiyevdə və Avropa paytaxtlarında onun daha bir dörd il üçün Ağ Evə qayıtmaq ehtimalından narahatlığın olduğu bir vaxtda yer alıb.
ABŞ prezidenti Co Bayden ötən ay Trampla debatda zəif çıxış etdikdən sonra respublikaçıların 2024-cü ilin noyabr seçkisində qələbə şansları artıb.
Sözü gedən debat Baydenin fiziki və psixi sağlamlığına dair çoxsaylı suallar yaradıb.
Ermənistanda təyyarə qəza edib, iki pilot həlak olub
Ermənistanda "Yak-52" təlim təyyarəsi Yerevandan 20 km şimalda yerləşən kiçik Yeğvard şəhəri yaxınlığında qəzaya uğrayıb, iki pilot həlak olub. Bunlar baş leytenant Armen İsaxanyan və kursant Armen Xaçatryandır. Onların meyitləri təyyarənin qalıqları arasından tez aşkarlanıb.
Hadisənin səbəbi aydın deyil. Ermənistanın İstintaq Komitəsi bildirir ki, uçuş təhlükəsizlik qaydalarının ciddi şəkildə pozulması ilə bağlı araşdırma aparılır.
Rusiyada ABŞ jurnalistinə 16 il həbs verildi
Rusiyada məhkəmə "The Wall Street Journal" qəzetinin müxbiri Evan Qerşkoviçi (Evan Gershkovich) casusluqda təqsirli bilərək 16 il həbsə məhkum edib.
Kremlin sözçüsü Dmitri Peskov məhkəmənin belə sürətlə hökm çıxarmasının səbəbi ilə bağlı jurnalistin sualını cavablandırmayıb, bu durumla bağlı şərh verə bilməyəcəyini deyib. O əlavə edib ki, Qerşkoviçin məhkəməsinin qapalı keçirilməsi "işin həssaslığı" ilə əlaqədardır.
+++
Rusiyada prokurorlar "The Wall Street Journal"ın jurnalisti Evan Qerşkoviçi (Evan Gershkovich) casusluqda təqsirli bilməyi, ona 18 il həbs verilməsini təklif ediblər. Qəzet və ABŞ hökuməti bu ittihamları rədd edir.
İyulun 19-da məhkəmədə son arqumentlər səsləndirilib. Bundan bir gün öncə isə Qerşkoviçin çalışdığı qəzet və ABŞ Dövlət Departamenti jurnalisti azadlığa buraxmağa çağırmışdı.
İyunun 26-da başlamış məhkəmə Yekaterinburq şəhərində qapalı keçirilir.
Qerşkoviç 2023-cü ilin martında Yekaterinburqda reportaj hazırlayarkən saxlanılıb. Ona Rusiyanın Ukraynadakı müharibəsi üçün tanklar hazırlanan zavod barədə informasiya əldə etməyə cəhd ittihamı irəli sürülüb. Jurnalist məlumatı daha sonra Mərkəzi Kəşfiyyat İdarəsinə (CIA) ötürmək niyyətində şübhəli bilinir. O, soyuq müharibə bitəndən Rusiyada casusluq ittihamları ilə saxlanan ilk ABŞ jurnalistidir.
32 yaşlı amerikalı keçmiş Sovet İttifaqından mühacirlərin övladıdır.
"The Wall Street Journal" və ABŞ hökuməti casusluq ittihamlarını qətiyyətlə rədd edir, Qerşkoviçin akkreditə olunmuş jurnalist kimi yalnız öz işini gördüyünü bildirirlər.
Hazırda Qerşkoviçdən savayı, AzadlıqRadiosunun veteran jurnalisti, ikili vətəndaşlığı olan Alsu Kurmaşeva da Rusiyada həbsdədir. O, oktyabrda Kazanda saxlanılıb, "xarici agent" kimi qeydiyyatdan keçməməkdə ittiham olunub. AzadlıqRadiosu və ABŞ hökuməti jurnalistin peşə fəaliyyətinə görə saxlanıldığını deyir.
Qerşkoviçdən fərqli olaraq Kurmaşevanı ABŞ hökuməti "qanunsuz saxlananlar" kateqoriyasına salmayıb, baxmayaraq ki, radio və jurnalistin ailəsi buna dəfələrlə çağırış edib. Bu kateqoriya işin ABŞ Dövlət Departamentində girovlarla iş üzrə xüsusi elçinin ofisinə verilməsini mümkün edir. Yəni iş siyasi yöndən dəyərləndirilir, ABŞ administrasiyası məhbusun buraxılmasına nail olmaqdan ötrü əlavə resurslar ayırır.
Qlobal kiber-nasazlığa görə onlarla şirkət işini dayandırmalı olub
"Windows"un işində qlobal miqyasda kəsinti yaranıb, dünyanın müxtəlif ölkələrində aeroportlar, vağzallar, banklar, digər qurumlar işi dayandırmalı olublar.
ABŞ, Türkiyə, Hindistan, Avstraliya aviaşirkətləri, Almaniya və İspaniyada aeroportlar, Böyük Britaniyada dəmiryol vağzalları nasazlığın təsirinə məruz qalıb. "Sky News" telekanalı efiri davam etdirə bilməyib.
İspaniya bütün aeroportlarında kompüter insidentinin yaşandığını bildirib.
Avropanın sərnişin sayına görə ən böyük aviaşirkəti olan "Ryanair" sərnişinlərə mümkün pozuntularla bağlı xəbərdarlıq edib.
Avstraliya media, banklar və telekommunikasiya şirkətlərindəki problemin "CrowdStrike" qlobal kibertəhlükəsizlik şirkəti ilə bağlı olduğunu deyib.
"Microsoft" şirkətinin məlumatına görə, "Windows 10" əməliyyat sistemində nasazlıq "CrowdStrike" antivirus proqramının yenilənməsi zamanı baş verib. Şirkət bunun kiberhücum olmadığını, fəsadların yumşaldılmasından ötrü tədbirlər görüldüyünü açıqlayıb.
Bakıda taksilər iki dəfə azalıb
Paytaxt Bakıda hazırda 35 minə yaxın taksi fəaliyyət göstərir və onların sayı iki dəfəyə qədər azalıb.
Bu barədə rəqəmsal inkişaf və nəqliyyat nazirinin müavini Rəhman Hümmətov iyulun 19-da mobillik sahəsində qanunvericiliyin təkmilləşdirilməsinə dair brifinqdə bildirib.
Nazir müavininin sözlərinə görə, taksi sahəsində tənzimləmələr davam etdiriləcək.
Son illər Azərbaycanda taksi fəaliyyəti sahəsində qanunvericiliyə bir sıra dəyişikliklər edilib. Bu il iyulun 1-dən isə Nazirlər Kabinetinin qərarı ilə taksi fəaliyyəti ilə bağlı əlavə tələblər müəyyən edilib. Həmin tələblərə görə, dövlət qeydiyyat şəhadətnaməsində buraxılışından 15 ildən artıq keçən avtomobil taksi kimi sərnişin daşımalarında istifadə oluna bilməz. Üstəlik, sərnişin daşımalarında istifadə olunan şəhərlərarası avtonəqliyyat vasitələri ağ, şəhərdaxili qırmızı olmalıdır. Taksi minik avtomobilləri isə ağ və ya qırmızı rənglərdə olacaqlar.
Digər tələblərə əsasən, taksilər ABS əyləc sistemi, tam hava tənzimləyicisi (sərinlətmə və isitmə funksiyalı), sürücü və bütün sərnişinlər üçün təhlükəsizlik kəməri ilə təchiz edilməlidir.
Bundan əlavə, onlarda bütün salonu əhatə edən və qeydə aldığı məlumatları ən azı 1 ay saxlaya bilən videokameralar quraşdırılmalıdır.
Taksi avtomobilləri ən azı "Avro-5" ekoloji standartına uyğun olmalıdır.
Son aylar bütün bunların fonunda Azərbaycanda taksilərdə qiymət artımı müşahidə edilir.
Ukrayna 'Lukoil' neftinin Macarıstan və Slovakiyaya nəqlini dayandırıb
Ukrayna Rusiyanın Lukoil şirkətinə aid neftin nəqlini dayandırıb. Slovakiyanın TAST xəbər agentliyi bildirir ki, bu, Bratislavadakı “Slovnaft” neftayırma zavodunun işini ciddi təsirləndirəcək.
Bu da xəbər verilir ki, məhdudiyyətlər Ukraynanın Lukoil şirkətinə qarşı sanksiyaları ilə bağlı olduğuna görə yalnız bu neft şirkətinin təchizatını əngəlləyəcək.
Slovakiya İqtisadiyyat Nazirliyi bildirib ki, Rusiyanın başqa neft şirkətlərinə aid neftin nəqli dayandırılmayıb.
Bununla belə ekspertlər deyirlər ki, uzunmüddətli məhdudiyyətlər Bratislavadakı neft emalı zavodunun işini çətinləşdirə bilər.
Ölkənin tədricən başqa alternativ enerji resurslarına keçidinə baxmayaraq Bratislava zavodunun emal etdiyi neftin üçdə ikisi hələ də Rusiya mənşəlidir.
Slovakiyanın iqtisadiyyat naziri deyib ki, hazırda ukraynalı partnyorlarla birlikdə problemin çözülməsi ilə məşğuldur.
Budapeşt problemi Moskva ilə müzakirə edir
Bundan əvvəl Lukiol neftinin nəqlinin dayandırılması barədə məlumatı Budapeşt vermişdi.
Macarıstanın Xarici İşlər Nazirliyi bildirirdi ki, Rusiya ilə birlikdə problemin hüquqi həllinin tapılması istiqamətində işləyir.
Macarıstan və Slovakiyaya Rusiya nefti “Drujba” kəməri vasitəsilə nəql olunur.
Bu kəmər Belarus ərazisindən keçir. Mozır məntəqəsində boru kəməri iki qola ayrılır. Şimal boru kəməri ilə neft Polşa və Almaniyaya nəql edilir. Kəmərin cənub qolu isə Ukrayna ərazisindən keçərək Slovakiya, Çexiya və Macarıstana gedir.
Lukoil şirkəti 2018-ci ildən Ukraynanın sanksiyaları altındadır, lakin məhdudiyyətlər heç vaxt neftin nəqlinə şamil edilməyib. 2024-cü ilin iyunundan Kiyev sanksiyaları sərtləşdirib. O cümlədən neftin tranzitinə qadağan qoyulub.
İranda Aşura mərasimində hicabsız görünən qadınlar polisə çağrılır
İranın Alborz vilayətində polis rəisi iyulun 17-də deyib ki, Kərəc şəhərində Aşura mərasimində hicabsız iştirak edən qadınlar müəyyənləşdirilərək çağrılır.
Instagram-da yayılan videoda bir neçə gənc qadın qara geyimdə, amma baş örtüksüz görüntülənib. Onlar Məhəmməd peyğəmbərin nəvəsi İmam Hüseynin qətl günü Aşura mərasiminə qatılıblar.
Aşura gününü qeyd edən şiələr adətən qara geyinir, Hüseynə kömək edə bilmədiklərinə görə peşmançılıq əlaməti olaraq kürəklərinə zəncir vururlar.
İyulun 16-da Kərəcdəki mərasimdən yayılmış video sosial mediada böyük reaksiya doğurub.
Təşkilatçının lisenziyası ləğv olunub
Alborz vilayətinin polis rəisi Həmid Hədavənd iddia edib ki, bu və digər videoların yayılması ölkə boyunca "Hüseyn üçün ağlayanların hisslərinə toxunur".
Hədavənd videoda görünənləri küfrdə ittiham edərək deyib ki, onların hamısı müəyyənləşdirilərək Alborz vilayət polisinə çağrılıb. Amma o, neçə nəfərin çağrıldığını, yaxud kimliyinin müəyyənləşdirildiyini açıqlamayıb.
Bundan başqa, dini qurumlarla iş üzrə təşkilat gənc qadınların hicabsız qatıldığı Aşura mərasimini təşkil edən qurumun lisenziyasını ləğv edib.
Həmin təşkilatın rəhbəri də polisə çağrılıb.
Aşura müsəlman təqviminin birinci ayı olan Məhərrəm ayının 10-cu günü keçirilir. Ötənilki Məhərrəm ayında da İranda məcburi baş örtüyü hicabsız qadınların müəyyənləşdirilərək saxlanılması xəbərləri gəlib.
Qadınlar reydlərə meydan oxuyur
Son iki ildə rəsmi orqanları hicab qadağasına qarşı çıxanlarla mübarizəni sürətləndirib. 2022-ci ildə Məhsa Əmini guya hicabı düzgün bağlamadığına görə saxlanandan sonra vəfat etmişdi. Ondan sonra ölkəni kütləvi etirazlar bürüyüb. Güc strukturları etirazları zorakılıqla yatırdıb.
Son aylar əxlaq polisi hicab qaydasını pozanlara qarşı reydlərə başlayıb, belə qadınlara qarşı zorakılıq halları baş verib.
Ancaq bütün bu tədbirlərə baxmayaraq, son iki ildə İranda ictimaiyyət arasında hicabsız görünən qadın və qızların sayı azalmayıb.
Gələn ayın əvvəlində islahatçı Məsud Pezeşkian prezident kimi and içməlidir. Pezeşkianın mövqeyincə, hicab qanununa əmək olunmalıdır, amma "qadınlara qarşı müdaxilə, qeyri-insani hərəkət baş verməməlidir".
Avropa İttifaqı Ermənistanla viza sərbəstləşdirilməsi danışıqlarına başlayacaq
Avropa İttifaqı iyulun 17-də bütün üzv ölkələrin səfirləri səviyyəsində Ermənistanla viza rejiminin sərbəstləşdirilməsinə dair danışıqlara başlanmasına razılıq verib.
Bu barədə məlumatı Brüsseldən AzadlıqRadiosunun Avropa müxbiri Rikard Jozviyak verib.
Müxbirin sözlərinə görə qərar rəsmi təsdiq üçün Avropa İttifaqı Şurasına təqdim oluncaq.
Şura isə öz növbəsində danışıqlara başlanmasının dəqiq vaxtını və Ermənistanın qarşısına qoyulmuş şərtləri elan edəcək.
Jozviyak AzadlıqRadiosunun Erməni xidməti – Azatutyuna deyib ki, bundan sonra illərlə davam edə biləcək proses başlanacaq.
Məsələn, Moldova ilə danışıqlar 3-4, Gürcüstanla 5, Ukrayna ilə 9 il çəkib. Türkiyə artıq 10 ildir ki, danışıqların davam etdirilməsini gözləyir.
Çoxsaylı tələblər
Müxbir qeyd edir ki, danışıqlar prosesində Ermənistanın icra etməli olacağı yüzlərlə səhifəlik şərt və tələblər açıqlanacaq.
Brüsselin belə bir sənədi hazırlaması adətən yarım ilə qədər çəkir. Odur ki, hərəkət planı Ermənistana ya bu ilin sonlarınadək, ya da gələn il təqdim oluna bilər.
Jozviyakın sözlərinə görə hazırda Avropada miqrasiya qaydaları sərtləşdirilir. Məsələn iki il əvvəl Gürcüstanla vizasız gediş-gəliş rejiminə başlanıb. Bu müddət ərzində Gürcüstan vətəndaşlarının Avropaya gəldikdən sonra burada qalmağa çalışmasından, gürcü əsilli kriminal qruplaşmaların fəaliyyətindən narazılıqlar olub.
Hazırda 60 ölkənin vətəndaşları Avropa İttifaqına vizasız səfər edə bilərlər. Onlar Şengen zonasında 180 gün ərzində yalnız 90 günədək qalmaq hüququna malikdirlər.
Bu da qeyd olunur ki, Brüssel vizasız rejimi istədiyi vaxt ləğv etmək hüququnu özündə saxlayır.
Belarus 35 Avropa ölkəsi üçün vizasız rejim elan edir
Belarusun hakimiyyət orqanları Avropanın 35 ölkəsinin vətəndaşları üçün vizasız gediş-gəliş rejimi elan ediblər.
Bundan əvvəl, 2022-ci ildən etibarən Polşa, Litva və Latviyanın vətəndaşları Belarusa vizasız səfər edə bilərdilər.
Belarus Dövlət Sərhəd Komitəsinin məlumatında deyilir ki, bu qərarı ölkənin avtoritar başçısı Alyaksandr Lukaşenko təsdiqləyib.
Xəbər verilir ki, Minskin bu addımı birtərəflidir, belə ki, Avropa ölkələri Belarus vətəndaşları üçün vizasız rejim elan etməyiblər.
Qərara görə iyulun 19-dan Avropa İttifaqının bütün ölkələri, habelə Britaniya, Norveç, İsveç və bir sıra Balkan ölkələrinin vətəndaşları Belarusa vizasız səfər edə və burada 30 gün müddətində qala biləcəklər.
Rusiyadan başqa
Qərarda deyilir ki, Belarusa vizasız gəlmiş əcnəbilər buradan, Rusiya xaric başqa ölkələrə səfər edə bilərlər.
Belarusun vizasız rejim elan etdiyi ölkələrin demək olar hamısının vətəndaşları Rusiyaya yalnız viza ilə gələ bilərlər.
Rusiya ilə viza rejimi Ukraynaya müdaxilədən sonra daha da sərtləşdirilib.
Moskva hələ ki, Belarusun qərarını şərh etməyib. Rusiya ilə Belarus arasındakı keçid məntəqələrində sərhədçilər yoxdur.
Şərhçilər bildirirlər ki, Minsk bu addımı Belarusla Aİ arasında münasibətlərin ən gərgin vaxtında atıb.
Aİ Ukraynaya müdaxilədə Rusiyaya dəstək verən Belarusa qarşı çoxsaylı sanksiyalar elan edib.
Eyni zamanda Polşa və Baltik ölkələri Belarusla sərhədlərini daim möhkəmləndirirlər.
Bu ölkələr bildirirlər ki, Belarus onların ərazisinə qanunsuz miqrant axınına bilərəkdən rəvac verir.
“Gərginliyi azaltmaq addımları”
Vizasız rejim Belarusun öz təbiri ilə deyilərsə, “gərginliyi azaltmağa yönəlik” yeganə addımı deyil.
Alyaksandr Lukaşenka bundan bir neçə gün əvvəl bəyan etmişdi ki, Belarus ordusu Ukrayna ilə sərhəddən geri çəkiləcək.
O əlavə etmişdi ki, “Ukraynada normal adamlar kifayət qədərdir” və sülh barədə danışıqlara başlamaq lazımdır.
Belarusun xarici işlər naziri Maksim Rıjenkov iyulun 15-də demişdi ki, Minsk Varşava ilə münasibətlərindəki gərginliyin aradan qaldırılması üçün dialoqa hazırdır.
Polşa XİN buna cavab olaraq bildirmişdi ki, o da dialoqa hazırdır, amma hələlik Belarus tərəfindən siyasətin strateji dəyişikliyini yox, yalnız qısamüddətli siyasi məqsədləri görür.
Rusiya və Ukrayna daha bir əsir mübadiləsi ediblər
Rusiya və Ukrayna 95-95-ə formatında daha bir əsir mübadiləsi ediblər.
Rusiya Müdafiə Nazirliyinin məlumatına görə bu mübadilədə vasitəçiliyi Birləşmiş Ərəb Əmirlikləri (BƏƏ) edib.
Bu da xəbər verilir ki, rusiyalı əsirlər Rusiya hərbi kosmik qüvvələrinin hərbi nəqliyyat təyyarələri ilə Moskvaya gətiriləcəklər.
Ukrayna prezidenti Volodimir Zelenski əsir mübadiləsinin keçirildiyini təsdiq edib.
Onun sözlərinə görə Kiyevə Ukrayna silahlı qüvvələrinin, milli qvardiyasının və sərhəd qoşunlarının əsgərləri qaytarılıb:
"Nə qədər mürəkkəb olsa da, əsirlikdə ola biləcək hamını axtarırıq. Hamını qaytarmalıyıq”.
Bundan əvvəl verilən xəbərlərdə deyilirdi ki, Moskva və Kiyev BƏƏ-nin vasitəçiliyi ilə əsir mübadiləsinə hazırlaşır.
Ötən həftə Verxovna Radanın insan haqları üzrə nümayəndəsi də “böyük mübadilə” gözləndiyini demişdi.
Rusiyanın Ukraynaya tammiqyaslı müdaxiləsi başlanandan bəri Moskva və Kiyev bir neçə əsir mübadiləsi ediblər.
Yenə də BƏƏ-nin vasitəçşilyi ilə keçirilmiş bundan əvvəlki mübadilədə hər iki tərəfdən 90 əsir dəyişdirilmişdi.
Ümumilikdə isə bu il ərzində tərəflər 1500-dək əsirin mübadiləsini həyata keçiriblər.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.