Cənubi Koreyanın Moskvadakı səfiri Rusiyanın Xarici İşlər Nazirliyinə dəvət olunub və ondan Rusiya yük gəmisinin Busan portundan “dərhal” buraxılması tələb edilib.
Nazirliyin oktyabrın 1-də verdiyi bəyanatda deyilir ki, Sevastopol gəmisi Busan limanında “qanunsuz” olaraq saxlanır və onun saxlanması səbəbi barədə heç bir məlumat verilməyib.
Rusiyanın xəbər agentlikləri Cənubi Koreya səfiri Woo Yoon-keun-a istinadən bildirir ki, bu məsələ oktyabrın 2-də həll olunacaq:
"Biz Rusiya və Cənubi Koreya arasındakı münasibətlərin bundan sonra da uğurla davam edəcəyinə inanırıq”.
Rusiya mediası xəbər verir ki, Sevastopol gəmisi Busan limanına təmir üçün avqustun ortalarında yan alıb. Onun göyərtəsində 14 Rusiya dənizçisi var.
Sevastopol ABŞ tərəfindən sanksiya siyahısına salınmış 6 gəmidən biridir. ABŞ bildirir ki, bu gəmi Şimali Koreyanın BMT sanksiyalarından yayınmasına kömək edir.
Gəminin əməliyyatçısı olan Gudzon Shipping Co. şirkəti üzərinə də Şimali Koreya ilə qanunsuz ticarətə görə sanksiya qoyulub.
Rusiya ABŞ-ın inddialarını rədd edir və bildirir ki, Vaşinqtonun bu hərəkətlərinə cavab tədbirləri hazırlayır.
