Milyarder və xeyriyyəçi Ross Perot 90 yaşında vəfat edib.
Bu barədə Reuters agenliyi xəbər verir. Kompüter biznesindən 4 milyard dollar qazanmış Ross Perot Amerika tarixində prezidentliyə ən uğurlu müstəqil namizəd hesab olunurdu.
1992-ci ilin seçkisində Perot seçicilərin 19 faizinin səslərini qazansa da, seçici kollegiyası ona bircə səs də verməmişdi.
Perot 1930-cu ildə Texasda doğulmuş, elə buradaca ictimai kolleci bitirmişdi.
Donanmda hərbi xidmətindən sonra Perot IBM şirkətində menecer olmuşdu.
O 1962-ci ildə öz biznesini qurmuş, 20 il sonra bu biznesi 2, 5 milyard dollara avtomobilqayırma nəhəngi General Motors şirkətinə satmışdı.
Bundan sonra o daha bir şirkət yaratmış və Steve Jobs-un NeXT şirkətinin investoru olmuşdu. Jobs buradan getdikdən sonra özünün Apple şirkətini qurmusdu.
Apple kompüterlərində və iPhone telefonlarında bugünədək istifadə olunan Mac OS X və iOS əməliyyat sistemləri məhz NeXT şirkətinin araşdırmaları nəticəsində yaradılıb.
1992-ci ildə Perot ABŞ prezidenti seçkisində müstəqil namizədliyini elan etmişdi.
İlkin rəy sorğularının nəticələrinə görə o həm respublikaçı ata Bush-a, həm də demokrat namizəd Bill Clinton-a qalib gələ bilərdi.
O seçkiqabağı kampaniyanı tərk etmiş, lakin kampaniyaya qayıdaraq seçicilərin 19 faizinin səsini qazanmışdı. Perot buna görə də Amerika tarixinin prezidentliyə ən uğurlu müstəqil namizədi sayılır. Buna baxmayaraq ABŞ-da seçkilərin taleyini həll edən seçici kollegiyaları ona bir səs də verməmişdi.
Bill Clinton bu seçkidən qalib çıxmışdı.
Ross Perot-un bundan sonrakı siyasi karyerası daha az uğurlu olmuşdu. O 1996-cı ilin seçkisində səslərin 9 faizini yığmışdı. Bunun özü də kifayət qədər yüksək göstərici sayılırdı.
Bundan sonra Perot öz siyasi partiyasını yaratmağa cəhd göstərmiş, biznes və xeyriyyəçiliklə məşğul olmuşdu.