Prezident Vladimir Putin sentyabrın 25-də Həştərxan vilayətinin Kapustin Yar poliqonunda “Qafqaz 2020” strateji komanda-qərargah təliminin “əsas epizodunu” müşahidə edib.
“Qafqaz 2020” Rusiyada son vaxtlarda keçirilən ən böyük manevrlərdən biridir. Bu təlimlərdə Rusiya Cənub hərbi dairəsinin 80 min hərbçisi iştirak edir.
Manevrlərə 6 xarici ölkənin minədək əsgəri də qatılıb.
Bunlar Ermənistan, Belarus, İran, Çin, Birma və Pakistandır.
Bu təlimlərdə Rusiya və sözü gedən ölkələrin qoşunlarından ibarət koalisiya adı çəkilməyən “düşmənə” qarşı döyüşürlər.
Rusiya Müdafiə Nazirliyi bildirib ki, bu manevrlərdə Rusiya və onun “müttəfiqləri” “şərti” düşmənə qarşı əks-hücum əməliyyatında onun qüvvələrini “tamamilə darmadağın” ediblər.
Məlumatda deyilir ki, “koalisiya” qoşunları “güclü atəş zərbəsi” endirərək “düşməni” mühasirəyə alıb.
“Şərti düşmənin” adı çəkilmir
AzadlıqRadiosunun Rus xidməti yazır ki, Rusiya bu manevrlərdə iştirak üçün çox sayda xarici ölkəni dəvət etmişdi, amma bunlardan bəziləri iştirakdan imtina ediblər.
Bu da xəbər verilir ki, Qazaxıstan, Azərbaycan və Hindistan bu təlimlərə qatılmaq istəməyiblər.
Məlumatlarda deyilir ki, təlimlərdə ilk dəfə olaraq TOS-2 (Tosoçka) raketlərindən istifadə olunub.
TOS-2 “Solntsepek” kimi tanınan TOS1A raketlərinin xələfidir. Bu raketlərdən Suriyada geniş istifadə olunub.
Manevrləri müşahidə edənlərin arasında Belarus müdafiə naziri Viktor Xrenin də vardı.
Belarusun özündə sentyabrın 25-də “Slavyan qardaşlığı” manevrləri başa çatıb. Bu manevrlərdə 900 Rusiya hərbçisi iştirak edirdi.
Rusiya bildirib ki, onun bu manevrlərdə iştirak edən qoşunları dislokasiya yerlərinə qaytarılır.
Rusiya və Belarusun birgə keçirdiyi “Qərb 2017” adlı təlimlərdə şərti düşmənin uydurma “Veyşnoriya” ölkəsi olduğu bildirilmişdi.
O vaxt bu ad sosial medialarda lağlağı və zaraftlara səbəb olmuşdu.
“Qafqaz 2020” hərbi manevrlərində şərti düşmənə heç bir ad verilmədiyi deyilir.
