ABŞ rəsmiləri ötən həftə ərzində İslam Dövləti adlandırılan təşkilatın bir sıra liderlərinin öldürüldüyünü bəyan ediblər.
Onlardan biri də təşkilatın vəzifə nərdivanında ikinci şəxs sayılan, milliyyətcə türkman Abdul Rahman Mustafa al-Qaduli-dir.
ABŞ müdafiə naziri Ashton Carter deyib ki, Qaduli və başqa liderlərin məhv edilməsi İŞİD-in əməliyyatlarına ciddi əngəl yaradacaq.
NBC News kanalı bildirib ki, həm də Hacı İman kimi tanınan al-Qaduli cümə axşamı ABŞ xüsusi qüvvələrinin Suriyada keçirdiyi reyd zamanı öldürülüb.
Müdafiə rəsmilərinin verdiyi məlumata görə ABŞ əsgərləri helikopterlərdən atılaraq Qadulinin pusqusuna yatıblar.
Onlar al-Qadulini diri ələ keçirmək üçün onun maşınının yaxından keçməsini gözləyiblər. Lakin əməliyyat qəlizləşib və baş verən atışmada al-Qadulinin maşınındakı daha üç silahlı da öldürülüb.
“Xarici işlər və qəsdlər naziri”
ABŞ hökuməti al-Qadulinin başına 7 milyon dollar mükafat qoymuşdu.
Cənab Carter Vaşinqtonda keçirdiyi mətbuat konfransında bildirib ki, ABŞ “İŞİD-in hökumət kabinetini sistematik olaraq sıradan çıxarır”.
O deyib ki, İD-in maliyyə naziri kimi fəaliyyət göstərən al-Qaduli, həm də “xarici işlər və qəsdlər” sahəsinə cavabdeh idi.
Milliyyətcə Türkmən olan bu şəxs 1957 və ya 1959-cu ildə Mosulda doğulub.
Onun 2004-cü ildə Abu Musab al-Zarqawi-nin başçılıq etdiyi əl-Qaedaya qoşulduğu və müavin vəzifəsini icra etdiyi bildirilir.
O 2012-ci ildə həbsxanadan buraxılıdıqdan sonra Suriyada İD qüvvələrinə qoşulub.
Ötən il yayılmış bəzi məlumatlarda deyilirdi ki, daha bir adı “Əbu Əla əl-Afri” olan Qaduli İŞİD lideri Abu Bakr al-Baghdadi yaralı olarkən onun vəzifəsini icra edib.
