Reuters xəbər verir ki, Kateriana Tixonovanın Dünya Rock‘n‘Roll Konfederasiyasındakı (World Rock‘n‘Roll Confederation - WRRC) həmkarı onun Rusiya prezidenti Vladimir Putinin kiçik qızı olduğunu təsdiq edib.
WRRC-nin hüquqi məsələlər üzrə vise-prezidenti Manfred Mohab noyabrın 26-da verdiyi müsahibədə deyib ki, Tixonovanı konfederasiyanın rəyasət heyətindəki birgə işi ilə əlaqədar tanıyıb.
Müsahibədə “Tixonovanın Putinin qızı olduğunu bilibmi” sualına Mohab “bəli, əlbəttə, mən onu tanıyıram” cavabını verib. O ikinci dəfə verilən eyni sualın cavabında da “bəli” deyib.
Reuters bildirir ki, Kreml və Tixonova bu barədə sorğulara şərh verməyiblər.
2015-ci ilin yanvarında RBK Tixonova haqqında yazan ilk Rusiya media qurumu olmuşdu. Buna baxmayaraq Kreml prezidentin ailəsi ilə bağlı heç bir məlumat vermir.
31 yaşlı Tixonova deyilənə görə, nənəsinin soyadını daşıyır. O WRRC-də genişlənmə və marketinq üzrə vise-prezidentdir.
Bu da deyilir ki, Tixonova Moskva Universitetində dövlət tərəfindən maliyyələşdirilən layihələrə başçılıq edir.
O Putinin köhnə dostunun oğlu Kiril Şamalovun arvadıdır.
