Rusiya prezidenti Vladimir Putin deyib ki, Şimali Koreya lideri Kim Jong Un Birləşmiş Ştatlar və Cənubi Koreya ilə qarşıdurmanın “bu raundunda qalib gəlib”.
Rusiya prezidenti deyib: “O özünün strateji öhdəliyini başa çatdırıb: Onun nüvə silahı var, 13 min kilometrədək qlobal uçuş mənzili olan raketləri var. Bu raketlər Yer kürəsinin istənilən nöqtəsinə çata bilər”.
Putin deyib ki, özünün bir çox məqsədlərinə çatdıqdan sonra, indi Kim vəziyyəti sakitləşdirməyə çalışır: “O artıq çox hiyləgər və yetkin siyasətçidir”.
Putinin bu qeydlərindən əvvəl, yanvarın 9-da iki Koreyanın liderləri 9-25 fevralda keçiriləcək Pxençan Qış Olimpiadası ərəfəsində gərginliyi azaltmaq məqsədilə görüş keçiriblər.
Şimali Koreya 1988-ci ildə Seulda keçirilən Yay Olimpiadasını boykot etmişdi, lakin qarşıdan gələn Olimpiya Oyunlarına idmançılarını göndərəcəyini bildirib.
Birləşmiş Ştatlar artıq aylardan bəridir ki, onun üzərinə nüvə və ballistik raket proqramlarına görə qoyulmuş BMT sanksiyalarına məhəl qoymayan Pxenyanla söz müharibəsindədir.
Rusiya BMT-də bu sanksiyaları nəzərdə tutan qətnamələri dəstəkləsə də, ABŞ-ı Pxenyana münasibətdə güc nümayişindən çəkinməyə çağırıb.
