Avropa Parlamenti Polşadan olan mühafizəkar deputat Janusz Korwin-Mikke ilə bağlı araşdırmaya başlayıb. Səbəb onun qadınlarla bağlı ayrıseçkilik bəyanatlarıdır.
“QADINLAR DAHA AZ PUL QAZANMALIDIRLAR”
Brüssel amfiteatrında çıxış edən 74 yaşlı deputat kişilərin qadınlar üzərində təbii üstünlüyündən danışıb.
“Aydındır ki, qadınlar daha az pul qazanmalıdırlar, çünki onlar daha zəif, daha kiçik və daha ağılsızdırlar", – deyə o bildirib.
O əlavə edib ki, 100 ən yaxşı şahmat oyunçusu arasında zəif cinsin bircə təmsilçisi də yoxdur.
Polşalı deputatın bu sözlərinin cavabında İspaniyadan olan sosialist qadın deputat Iratxe García Pérez bildirib ki, Janusz Korwin-Mikke-nin məntiqinə görə, onun Avropa Parlamentində oturmağa haqqı yoxdur. García Pérez artıq on ildən çoxdur ki, qadın hüquqları və gender bərabərliyi sahəsində qanunvericilik məsələləri ilə məşğul olur. O, 2014-cü ildən Avropa Parlamentinin qadın hüquqları komitəsinə rəhbərlik edir.
SANKSİYALAR QOYULA BİLƏR
"Ancaq siz qadınların assambleyada vətəndaşları təmsil etməsinə və eynən kişilər qədər hüquqlara malik olmasına qarşı nə qədər çıxış etsəniz də, mən məhz qadınların hüquqlarını sizin kimilərdən qorumaqdan ötrü buradayam!" – deyə deputat qəzəblə cavab verib.
Janusz Korwin-Mikke cərimə, yaxud da Avropa Parlamentinin işindən müvəqqəti kənarlaşdırılma kimi sanksiyalarla üzləşə bilər.
Bəs Janusz Korwin-Mikke kimdir?
Janusz Korwin-Mikke Polşadan olan publisist və liberal-libertariandır.
İxtisasca riyaziyyatçı olan deputat həm də bric üzrə Polşa çempionu, ölkəsinin milli bric komandasının üzvüdür. Korwin-Mikke katolikdir. Onun 3 arvaddan 8 uşağı var.
İLK QALMAQAL DEYİL
Onun sonuncu arvadı özündən 44 yaş kiçikdir.
Bu, Janusz Korwin-Mikke-nin ilk qalmaqalıdırmı?
2016-cı ilin iyulunda polşalı mühafizəkarın maaşından 3 min avro tutulmuş, özü isə 5 günlüyünə işdən azad edilmişdi. Səbəb Korwin-Mikke-nin Avropaya gələn kütləvi miqrant axınını "zibil axını" adlandırması idi.
2015-ci ildə Korwin-Mikke müvəqqəti olaraq Avropa Parlamentinin deputatı vəzifəsindən kənarlaşdırılmışdı. Bundan öncə o, çıxışını bitirəndən sonra qolunu nasistsayağı qabağa uzadaraq "Ein volk, ein Reich" ("Bir xalq, bir dövlət") şüarını sələndirmişdi. Bu, Hitler dövrünün nasist partiyasının ən məşhur şüarlarından biridir. Amma onun nitqinin faşizmə heç bir dəxli yox idi. Həmin vaxt Avropa İttifaqında nəqliyyat islahatları müzakirə olunurdu.
