İkinci Dünya Müharibəsində nasistlərə xidmət etmiş sonuncu sağ qalan şəxs Birləşmiş Ştatlardan Almaniyaya deport edilib.
Müharibədən sonra 70 il Nyu Yorkda yaşamış 95 yaşlı Jakiw Palij-i gətirən təyyarə avqustun 21-də Düsseldorf hava limanına enib.
Ədliyyə Nazirliyi bildirir ki, Palij nasistlərin işğalı altında olan Polşadakı Travniki ölüm düşərgəsində silahlı keşikçi olub.
Milliyyətcə ukraynalı Palij hazırda Ukraynanın ərazisi olan, lakin o vaxt Polşaya aid ərazidə doğulub. O ABŞ-a 1949-cu ildə mühacirət edib və 1957-ci ildə ABŞ vətəndaşlığı alıb. Lakin o bütün bu müddət ərazində Travniki ölüm düşərgəsində qulluq etdiyini gizlədib.
Avqustun 21-də Ağ Ev bildirib ki, prezident Donald Trump “bu hərbi caninin Birləşmuiş Ştatların torpağından çıxarılmasını prioritet” elan etmişdi:
https://publicpool.kinja.com/subject-statement-from-the-press-secretary-1828483398
"Uzun danışıqlar və əsas Avropa müttəfiqi ilə birgə səylər nəticəsində prezident Trump və onun komandası Palij-in Almaniyaya deportasiyasına nail olub”.
2003-cü ildə Palijin keçmişi məlum olanda o ABŞ vətəndaşlığından məhrum edilmiş və onun deportasiyası barədə 2005-ci ildə məhkəmə hökmü çıxarılmışdı.
Lakin onun deportasiyası uzun illər həyata keçmirdi, çünki nə Polşa, nə də Ukrayna bu şəxsi qəbul etmək istəmirdilər.
Almaniya da Palij-in heç vaxt Almaniya vətəndaşı olmadığını əsas gətirərək onu qəbul etməkdən imtina edirdi.
Palij-in Almaniyada məhkəmə qarşısına çıxarılıb-çıxarılmayacağı bilinmir.
