Keçid linkləri

Təcili xəbərlər
2019, 15 Oktyabr, çərşənbə axşamı, Bakı vaxtı 23:45

Moskva ABŞ casusu olduğu deyilən Smolenkovu axtarışa verir


Rusiyanın Daxili İşlər Nazirliyi bildirir ki, mətbuatda adı ABŞ Mərkəzi Kəşfiyyat Agentliyinin (MKA) xəbərçisi kimi hallandırılan keçmiş Kreml rəsmisi rəsmən axtarışa verilir.

Nazirlik sentyabrın 23-də bəyan edib ki, 1969-cu il təvəllüdlü Oleg Smolenkovun adı itkin düşənlərin siyahısına salınıb və onun axtarışına başlanıb.

Bu ayın əvvəllərində Reuters, CNN, The New York Times və The Washington Post xəbər verirdi ki, MKA-nın Rusiya hökumətindəki agenti 2017-ci ildə Rusiyadan çıxarılaraq Birləşmiş Ştatlara gətirilib.

Bəzi məlumatlarda deyilirdi ki, adı çəkilməyən rusiyalı Vladimir Putinin Kremlindən 2016-cı il ABŞ seçkisinə müdaxilə barədə informasiyaları ABŞ-a ötürürmüş.

MKA, Dövlət Departamenti və Ağ Ev bu xəbərlərin səhih olmadığını bildirmişdi.

Rusiya hökumət administrasiyasının 2008-2010-cu illər arasındakı qeydiyyat məlumatları göstərir ki, Putin administrasiyasında çalışan Oleg Smolenkov o vaxt baş nazir olan Putinin administrasiyasında işləyib.

2010-cu ildə Smolenkov ovaxtkı prezident Dmitry Medvedevin sərəncamı ilə daha yüksək vəzifəyə irəli çəkilmişdi.

Smolenkovun bundan əvvəl Rusiyanın Vaşinqtondakı səfirliyində ikinci katib kimi çalışdığı məlumdur.

O vaxt Rusiyanın ABŞ-dakı səfiri Yury Ushakov idi. O sonra Moskvaya qaytarılmış və Vladimir Putinin xarici siyasət müşaviri təyin edilmişdi. Ushakov indiyədək bu vəzifədə işləyir.

Rusiyanın Vedomosti qəzeti yazırdı ki, Smolenkov Ushakov-un Kremldəki baş məsləhətçisi idi.

New York Times sentyabrın 11-də Kremlin daxili telefon kitabçasının səhifəsini göstərən tvit dərc etmişdi.

Rusiya hökuməti Smolenkovun Kremldə işlədiyini təsdiq edib, lakin Putinin sözçüsü Dmitry Peskov sentyabrın 10-da demişdi ki, Smolenkov “işdən bir neçə il əvvəl çıxarılıb”.

Rusiya mediasının verdiyi xəbərlərə görə Smolenkov və arvadı Antonina 2017-ci ildə yoxa çıxanda onlar ailəliklə Monteneqo kurortlarından birində istirahət edirdilər.

Şərhlər

Günün bütün mövzuları

XS
SM
MD
LG