Birləşmiş Ştatlar Kremlin tənqidçisi Aleksey Navalnının zəhərlənməsinə görə Rusiyaya yeni sanksiyalar hazırlayır. Bunu ABŞ-ın milli təhlükəsizlik müşaviri Ceyk Sallivan iyunun 20-də deyib.
“Bu işdə də tətbiq olunacaq daha bir sanksiya paketi hazırlayırıq”, – Sallivan CNN-ə deyib.
Sonra da kimyəvi silahlara görə sanksiyalar olacaq
Onun sözlərinə görə, ABŞ düzgün qurumların hədəfə alınmasından əmin olandan sonra sanksiyalar tətbiq olunacaq.
“Bundan sonra kimyəvi silahlara görə əlavə sanksiyalar tətbiq edəcəyik”, – Sallivan vurğulayıb.
Navalnı bu ilin əvvəlində Almaniyadan Rusiyaya qayıdarkən saxlanıb. O, ötən avqustda Sibirdə sovet dövrü sinir qazıyla zəhərlənəndən sonra Berlində müalicə olunurdu. Navalnı hücuma görə birbaşa Putini ittiham edib, Kreml isə iddianı rədd edib.
ABŞ Prezidenti Co Bayden rusiyalı həmkarı Vladimir Putinlə ötən həftəki sammitində insan haqlarının həmişə masada olacağını, bu məsələni, eləcə də Navalnının həbsini qaldıracağını deyib.
Baydenin sözlərinə görə, o həm də Putinə Navalnının həbsxanada mümkün ölümünün fəsadları haqda xəbərdarlıq edib, bu fəsadların “Rusiya üçün dağıdıcı” olacağını deyib.
Səfirlər qayıdır
Bayden administrasiyası martda Rusiyanın yeddi aparıcı rəsmisinə sanksiyalar açıqlayıb. Eyni vaxtda Avropa Birliyi də Rusiyanın aparıcı rəsmilərinə sanksiyalar elan edib.
Rusiya buna qəzəbli reaksiya verərək “tamamilə qəbuledilməz” adlandırıb, ölkənin ABŞ və AB ilə onsuz da pis durumda olan münasibətlərinə dağıdıcı təsir göstərəcəyini deyib.
Bayden martda Putinin “qatil” olmasına inandığını deyəndən sonra Rusiyanın ABŞ-dakı səfiri Anatoli Antonov geri çağrıldı.
Apreldə münasibətlər daha da pisləşdi, Birləşmiş Ştatlar Rusiyanın onlarla fərdi və qurumuna sanksiyalar açıqladı, Rusiyanın 10 diplomatını ölkədən çıxardı.
ABŞ-ın Rusiyadakı səfiri Con Sallivan da məsləhətləşmələr üçün Birləşmiş Ştatlara qayıtdı.
16 iyun sammitindən sonra liderlər səfirlərin tezliklə postlarına qayıdacağını açıqlayıblar.
Antonov iyunun 20-də Moskvadan Vaşinqtona yola düşüb. Sallivanın qayıdacağı tarix isə açıqlanmayıb.
