REAL Hərəkatının icra katibi Natiq Cəfərli yanvarın 30-da Baş Prokurorluğun Ağır Cinayətlərə Dair İşlər üzrə İstintaq İdarəsində dindirilib.
O, AzadlıqRadiosuna deyib ki, dindirilmə 2 saat yarım davam edib: «Əsas suallar İranın Azərbaycandakı səfirliyinin katibinin yanvarın 19-da REAL-ın ofisinə gəlməsi, danışıqların məzmunu, bir də pul alıb-almamağımızla bağlı idi. Biz də sualları cavablandırdıq».
N.Cəfərli dindirilmənin təfərrüatları haqda geniş danışa bilməyəcəyini söyləyib: «Bir şər-böhtan yazıya görə dindirilirik. Mənə qədər Azər Qasımlı dindirilib. Bu bizə, yəni REAL-a təzyiqlərin davam etməsidir. REAL sədri İlqar Məmmədov həbsdədir, indi də təzyiqlər davam edir».
XATIRLATMA
Yanvarın 27-də haqqin.az və virtualaz.org saytlarında Eynulla Fətullayevin imzası ilə «İran xəfiyyəsi Bakıda İlqar Məmmədovun adamları ilə görüşdü, REAL-a pul ayırdı» başlıqlı məqalə dərc edilmişdi.
Məqalədə yanvarın 19-da İranın Azərbaycandakı səfirinin ikinci katibi Mehdi Arefzadeh-nin REAL Hərəkatı rəhbərləri ilə görüşündən bəhs edilirdi. İddia olunurdu ki, görüşdə gizli sövdələşmə olub, İran səfirliyinin nümayəndəsi REAL Hərəkatına pul verib. «REAL İrandan ilk maliyyə yardımını qəbul edib! Bax bu, nəinki müxalif milli-demokratlar, eləcə də liberalyönümlü müxalifət üçün inkişaf mərhələsində yeni dönüşdür», - məqalədə yazılırdı.
REAL rəhbərliyi isə bunu onlara növbəti əsasız təzyiq kampaniyası kimi dəyərləndirmişdi.
Bunun ardınca da baş prokuror Zakir Qaralovun tapşırığına əsasən, bu məsələ ilə bağlı araşdırmalara başlandığı bildirilirdi.
Respublika Prokurorluğunun mətbuat xidməti bəyan edirdi ki, araşdırmaları Ağır Cinayətlərə Dair İşlər üzrə İstintaq İdarəsi aparacaq.
Yanvarın 29-u REAL rəhbərliyindən Azər Qasımov idarəyə çağırılaraq 5 saat dindirilmişdi.
