Bu gün, martın 27-də şair Mikayıl Müşfiqin heykəli onun adını daşıyan parkdakı yerinə bərpa olunub.
Bu haqda AzadlıqRadiosuna «Azəravtoyolsevis» Açıq Səhmdar Cəmiyyətindən bildiriblər.
Artıq heykəl yenilənməli olan parkda yerləşdirilib.
Bu gündən başlayaraq parkda yenidənqurma işlərinə də start verildiyi bildirilir.
XATIRLATMA
Bu il fevralın 27-si Bakının Yasamal rayonunda Mikayıl Müşfiq adına parkda onun büstü götürülmüşdü. «Azəravtoyolservis» ASC-nin mətbuat xidməti büstün yenidənqurma işləri səbəbindən müvəqqəti götürüldüyünü açıqlamışdı.
Abidənin sökülməsi sosial şəbəkələrdə narazılığa səbəb olmuşdu.
Bir gün sonra prezident İlham Əliyev olayın araşdırılması və günahkarların cəzalandırılması barədə tapşırıq vermişdi. Ardınca da «8 N-li Xüsusi Təyinatlı Yol İstismarı» MMC-nin iş icraçısı Ramiz Rəhimov işindən kənarlaşdırılmışdı.
Azərbaycanın tanınmış şairlərindən olan Mikayıl Müşfiq 1937-ci ildə həbs edilib. 1938-ci ilin yanvarında, hələ 30 yaşı tamam olmamış güllələnib.
1970-cı ildə qoyulmuş büstün müəllifi Azərbaycanın yeganə qadın heykəltəraşı Münəvvər Rzayevadır.