Bakı Şəhəri İcra Hakimiyyəti (BŞİH) Milli Şuranın Ukraynaya dəstək məqsədi ilə keçirmək istədiyi mitinqə müsbət cavab verməyib.
Təşkilatçılara bununla bağlı bu gün, martın 30-da cavab gəlib.
"Müraciətinizdə qeyd etdiyiniz məsələ ilə əlaqədar bildiririk ki, Azərbaycan dövləti tərəfindən bu istiqamətdə müvafiq qaydada əhəmiyyətli humanitar xarakterli addimlar atılıb və atılmaqda davam edir", - cavabda yazılıb.
Bakı Şəhər İcra Hakimiyyəti habelə koronavirus pandemiyası ilə bağlı ölkə ərazisində karantin rejiminin davam etdiyini xatırladaraq aprelin 2-nə planlaşdırılan aksiyanı məqsədəuyğun saymayıb.
Təşkilatçılar isə bildirmişdilər ki, aksiya şəhər rəhbərliyi ilə razılaşdırılacağı təqdirdə keçiriləcək.
Amma bundan əvvəl, fevralın 27-də Bakıda ictimai fəalların Ukrayna səfirliyi önündə eyni məqsədlə rəsmi razılaşdırma olmadan keçirdiyi aksiyaya hər hansı müdaxilə olmamışdı.
Xatırlatma
Bu il fevralın 24-də Rusiya Ukraynaya yenidən təcavüzə başlayıb. Altı il əvvəl də Rusiya Ukraynanın bir hissəsini-Krımı ilhaq etmişdi. Onda Rusiyaya sanksiyalar tətbiq edilməyə başlanmışdı. Yeni müharibədən sonra Qərb və dünyanın bir sıra ölkələri Rusiyaya sanksiyaları genişləndirib. Amma Azərbaycan bu sanksiyalara qoşulmur.