Saakashvili-ni qürur duyduğu iki şeydən məhrum ediblər
Ukraynanın Odessa vilayətinin qubernatoru Mikael Saakashvili inzibati xidmətlər mərkəzinin bağlanmasından Kiyev hakimiyyətini suçlu bilib. Üstəlik, ona xas olan emosional tərzdə kəskin ifadələr işlədib:
“Onlar mənim ağzımı bağlaya bilməzlər! Mən istəyirəm, onlar bu uşaqlara baxsınlar. Siz onları işsiz qoyursunuz!”.
Bu xidmət Saakashili-nin qubernator vəzifəsində olduğu müddətdə başlıca uğurlarından sayılırdı. İnzibati xidmətlər mərkəzində vilayət və şəhər sakinləri növbəyə dayanmadan, qısa zaman içində gərəkli sənədləri əldə edə bilirdilər. Burada pasport, sürücü vəsiqəsi, torpaq və başqa əmlaka dair sənədləri almaq imkanı yaradılmışdı və 60-dan çox inzibati xidmət göstərirdi.
Buna da bax: Prezident: «2016-ci il islahatlar ili olacaq»
Saakashvili həmin mərkəzi açarkən, buna bənzər xidmətin Gürcüstanda çoxdan uğurla işlədiyini vurğulamışdı. Amma Ukraynada durum fərqlidir. Odessadakı mərkəz, vur-tut, bir il işlədi, o da tam yox. Və mülkiyyət hüququnun qeydə alınmasına dair yeni qanunun qəbulundan sonra bağlanmalı oldu. Qanunda ukraynalılara daşınmaz əmlakın qeydiyyatını və mülkiyyətin qorunmasını asanlaşdırmaq niyyətiylə dəyişikliklər edilmişdi. Amma Odessa qubernatoru iddia edir ki, əslində, vəziyyət ziddiyyətlidir. Qanun, sadəcə, belə müəssisələrin maliyyə mənbələrini qapadıb.
“Ona görə pis yaşayırıq ki, islahat getmir!”
“Bu qanun bir il əvvəl pilotlaşdırılan və həyata keçirilən islahatların Odessa paketindəki inzibati xidmət sahəsində bir yox, on addım geriyə atılmış addımdır”, - vətəndaşlara xidmət mərkəzinin kuratoru Artur Amirov belə deyir və sözünü tamamlayır: “Biz bunu fəlakət sayırıq”.
Saakashvili inadla bildirir:
“İnsanları aldadırlar ki, islahatlar gedir, ona görə pis yaşayırsınız! Yox, biz ona görə pis yaşayırıq ki, bu islahatlar getmir! Elə götürək polisi. Biz çoxlu sayda gəncləri cəlb etdik, yoxladıq və onlar Ukrayna polisinə qəbul olundu. Amma onlara cüzi maaş verirlər və bu maaş heç nəyə çatmır!”.
“Ani nikah evi” də bağlanır
Vətəndaşlara Xidmət Mərkəzinin ardından ""Ani nikah evi" də bağlanır. Bu Saakashvilinin daha bir uğurlu layihəsi idi. Nikaha girmək istəyən cütlər bir gün içində öz münasibətlərini rəsmiləşdirə bilirdilər. Çevikliyə isə elə sözügedən Vətəndaşlara Xidmət Mərkəzi təminat verirdi.
İndi odessalılar onlara vəd edilən islahatların qızğın müzakirəsinə başlayıblar.
“Mən belə anlayıram ki, Vətəndaşlara Xidmət Mərkəzi olmalıdır və işləməlidir! Bunlar ciddi işlərdir. Orada insanlara lazım olan geniş diapazonlu işlər görülürdü”, - narazı şəhər sakinlərindən biri “Currenttime tv”-yə belə deyir.
Daha bir sakin əlavə edir: “Bu, insanlar üçün rahatdır! Gəldiniz, qol çəkdiniz, vəssalam”.
Amma bəziləri mərkəzin bağlanmasını problem saymır. “Sistem yaxşıdır, amma bircə onu deyim ki, çox bahadır. İndiki zamanda insanlardan bu qədər pul almaq – bu, lap çoxdur!” – deyə şikayətlənənlər də var.
“Amma burada bağlayıblarsa, başqa yerdə açarlar! Necə deyərlər, müqəddəs yer boş qalmaz!” – bir başqa odessalı da belə düşünür.
Hər iki layihə “Odessa islahatlar paketi”nin tərkib hissəsi idi. Saakashvili-nin niyyətinə görə, məhz beləcə, Ukraynada sistemli yenilənmələr başlamalıydı. Əvvəlcə bir vilayətdə, sonra bütün ölkədə. Odessa qubernatoru təşəbbüsünün üstündən xətt çəkilməsinə görə ABŞ-ın Ukraynadakı səfirliyi artıq təəssüfünü dilə gətirib.