Almaniya kansleri Angela Merkel Ukrayna prezidenti Volodymyr Zelenskiy ilə Berlində görüşərkən deyib ki, o Rusiyaya qarşı sanksiyaların müddətinin uzadılmasını dəstəkləyir.
İyunun 18-də birgə mətbuat konfransında danışan Merkel deyib ki, Rusiya üzərinə Krımın ilhaqına və Ukraynanın şərqindəki separatçı münaqişəyə görə qoyulmuş sanksiyalar Ukrayna suverenliyinin bərpasınadək davam etdirilməlidir:
"Bu istiqamətdə irəliləyiş əldə olunmasa, sanksiyalar qaldırıla bilməz, Krımla əlaqədar qoyulmuş sanksiyalar isə yalnız Krım Ukraynaya qaytarıldıqdan sonra qaldırıla bilər”.
Berlinə səfərindən əvvəl Zelenskiy Almaniyanın Bild qəzetinə demişdi ki, Rusiyaya qarşı sanksiyaların miqyası “genişləndirilməlidir”.
O bildirmişdi ki, sanksiyalar “işğal olunmuş ərazilərin azad olunması və Ukraynanın ərazi bütövlyünün bərpası üçün yeganə vasitədir”.
Zelenskiy əlavə etmişdi ki, sanksiyalar təsir göstərmirsə, onların miqyası genişləndirilməlidir.
Bu da xəbər verilir ki, Almaniyada Zelenskiy ilə görüşən Merkelin mərasimlərdən birində aşkar şəkildə titrədiyi görünürdü. Bu hadisə kanslerin sağlıq durumu ilə bağlı narahatlığa səbəb olub.
Daha sonra bu barədə suala cavab verərkən Merkel deyib ki, “mən üç stəkan su içdim, çünki görünür buna ehtiyacım vardı, amma indi yaxşıyam”.
