Keçid linkləri

Təcili xəbərlər
2018, 24 Sentyabr, Bazar ertəsi, Bakı vaxtı 01:32

Özbəkistanda mələk rəsmini ‘abır-həyaya’ salıblar


AzadlıqRadiosunun Mərkəzi Asiya müxbirləri yazırlar ki, Özbəkistanın qədim Kokand şəhərindəki divarlardan birini onilliklərdir bəzəyən mələk şəkli “abır-həyaya” salınıb.

Yerli teatrın divarına sovet dövründə çəkilmiş freska sözün əsl mənasında məhv edilib.

Özbəkistan sənətşünaslarından biri freskaya “hansısa rəngsazın” etdiyi düzəlişi tənqid atəşinə tutub.

Məsələ burasındadır ki, köhnə divar rəsminin kim tərəfindən “redaktə” edildiyi bilinmir. İstər sənət adamları, istərsə də özbək rəsmilər belə bir dəyişikliyi hiddətlə qarşılayıblar.

Özbəkistan hökuməti divar rəsminin bərpa edilməsi üçün rəssam Bahodir Jalolov-u təcili olaraq Kokanda ezam edib.

Lakin bu divar rəsmində düzəlişə məruz qalan təkcə mələk obrazı deyil.

Sənətşünas Akmal Rizayev deyib ki, freskadakı sovet hərbi formalarının üstündən rəng çəkilib və əvəzində rəsmdəki hərbçilər çobanlara çevrilib.

Rizayev AzadlıqRadiosuna bildirib ki, bu düzəlişlər 2017-ci ildə bölgəyə prezident Shavkat Mirziyoevin səfəri ərəfəsində Kokandın keçmiş merinin göstərişi ilə edilib.

AzadlıqRadiosu keçmiş mer Rahmatali Jalilovla əlaqə saxlaya bilməyib.

Divar rəsminin müəllifi, 70 yaşlı Jalolov deyib ki, o sözü gedən dəyişikliklərdən bu yaxınlarda xəbər tutub: “Mən hələ sağam. Ölməmişəm. Mən onların mənim işimə qarşı törətdikləri qəssablığı başa düşə bilmirəm. Mən prezidentə məktub yazaraq bu vandalizm aktından şikayət etmişəm”.

Özbəkistan Mədəniyyət Nazirliyi AzadlıqRadiosuna əsərin “məhv olduğunu” etiraf edib və bunun günahını tamamilə keçmiş Kokand merinin üzərinə qoyub.

Nazirliyin sözçüsü Mavluda Askarkhojaeva AzadlıqRadiosuna deyib ki, insidentin araşdırılması üçün Kokanda təhqiqat qrupu göndərilib.

Askarkhojaeva-nın sözlərinə görə keçmiş mer yarıçılpaq mələyin üstünü ona görə örtüb ki, onun firkincə bu rəsm özbək mənəvi standartlarına uyğun olmayıb:

"Nazirlik onun mühafizəsi altında olan bu mədəniyyət irsinə ziyan vurmuş hərəkəti pisləyir”.

Şəhər meriyasının yeni administrasiyası bildirib ki, divarüstü rəsmlərin bərpası üçün Mədəniyyət Nazirliyi ilə tam əməkdaşlıq edir.

Bu arada rəssam Jalolov öz əsərinin bərpası üçün iyunun 25-də Kokanda gəlib:

“Bu obrazlar tariximizin bir parçasıdır”.

Günün bütün mövzuları

XS
SM
MD
LG