Oktyabrın 10-da Kataloniya lideri bölgənin İspaniyadan tam müstəqillyinin elan edilməsi mövqeyindən geri çəkilib.
O bildirib ki, bu addımı regionun gələcək statusu məsələsinin Madridlə müzakirə edilməsinə imkan yaratmaq məqsədilə atır.
Reuters bildirir ki, Carles Puigdemont-un muxtar regionun parlamentində verdiyi bu bəyanat Kataloniyanın müstəqilliyinə tərəfdar olan minlərlə insanı məyus edib.
Onlar parlament binasının qarşısına toplaşaraq tezliklə müstəqillik bəyannaməsinin elan edilməsini gözləyirdilər.
Puigdemont bütün tərəflərdən təzyiq altında idi. İspaniya hökuməti müstəqillyin elan ediləcəyi təqdirdə bölgənin birbaşa Madriddən idarə ediləcəyinə dair xəbərdarlıq vermişdi.
Həm İspaniyanın baş naziri Mariano Rajoy, həm də Avropa Şurasının prezidenti Donald Tusk Puigdemont-a müstəqlliyin elan edilməməsini tapşırmışdı.
Puigdemont-un hökuməti oktyabrın 1-də keçirilmiş müstəqillik referendumundan bəri Madridlə qarşıdurmada idi.
İspaniya məhkəməsi bu referendumun qanunsuz olması barədə qərar qəbul etmişdi.
Katalan hökuməti bildirirdi ki, referndumda bölgə seçicilərinin 43 faizi iştirak edib, lakin onların 90 faizi muxtar bölgənin İspaniyadan ayrılmasına səs verib.
Puigdemont Barselonanın regional məclisinə bildirib ki, referendumun nəticəsi müstəqillik üçün mandat verir.
O habelə bildirib ki, referendumun nəticələri barədə aktı bölgə rəsmiləri imzalayıblar.
Bu sənəddə bütün dövlətlər və beynəlxalq təşkilatlar Kataloniya Respublikasının rəsmən tanınmasına çağırılır.
Reuters yazır ki, Kataloniya qarşıdurması 1981-ci ildə baş tutmamış hərbi çevrilişdən bu yana İspaniyanın siyasi həyatında ən böyük böhrandır.
İndi Rajoy-un mühafizəkar hökuməti bütün tərəflərlə birlikdə atılacaq növbəti addımları müzakirə etməyə hazırlaşır.
