“Rusiya Ermənistan ordusunun təkmilləşdiriməsinə kömək etməyə hazırdır”.
AzadlıqRadiosu erməni xidmətinin məlumatına görə, bunu Rusiyanın müdafiə naziri Sergey Şoyqu avqustun 11-də Moskvada ermənistanlı həmkarı Arşak Karapetyanı qəbul edərkən deyib.
“Həm ikitərəfli formatda, həm də Kollektiv Təhlükəsizlik Müqaviləsi Təşkilatı (KTMT) çərçivəsində hərbi əməkdaşlığın inkişafına böyük önəm veririk. Eyni zamanda, Ermənistan ordusunda islahatların davam etdirilməsinə kömək etməyə hazırıq. Bu, asan məsələ deyil, amma düşünürəm ki, sizin təcrübənizlə buna nail ola biləcəyik”, - deyə Şoyqu bildirib.
Sergey Şoyqu qeyd edib ki, hazırda Ermənistan ərazisində Rusiyanın yaxşı təhciz olunmuş 102 saylı hərbi bazası yerləşir və bu baza regionda təhlükəsizliyə təminat verir.
“ Ermənistan Cənubi Qafqazda təhlükəsizliyin təmin edilməsində Rusiyanın vacib müttəfiqidir və biz bu regionda sabitliyin qorununmasında olduqca maraqlıyıq”,deyə Rusiyanın müdafiə naziri vurğulayıb.
Ermənistanın müdafiə naziri Arşak Karapetyansa bildirib ki, Rusiya bu gün sərhəddəki problemlər də daxil olmaqla, Ermənistan xalqının təhlükəsizliyi sahəsində ən böyük tövhə verən yeganə dövlətdir.
O, ölkəsinin Rusiya ilə sıx və səmərəli əməkdaşlığa hazır olduğunu vurğulayıb.
