Beynəlxalq insan haqları təşkilatı Amnesty International İranda 15 yaşında olarkən qətlə görə ölüm cəzasına məhkum edilmiş gəncin edamını hiddətlə pisləyən bəyanat yayıb.
Təşkilatın yanvarın 30-da yaydığı bəyanatda deyilir ki, 22 yaşlı Ali Kazemi Buşəhr əyalətinin həbsxanasında səhərin sübh saatlarında asılmaqla edam edilib.
Amnesty bunu da bildirir ki, Kazeminin edam vaxtı barəsində nə vəkilinə, nə də ailəsinə məlumat verilməmişdi.
Amnesty International təşkilatı direktorunun Yaxın Şərq üzrə müavini Magdalena Mughrabi deyib ki, “İran bu qanunsuz edamı həyata keçirməklə dünyanın aparıcı cəlladı kimi rüsvayçı adını saxlamaq niyyətində olduğunu nümayiş etdirib”.
Kazemi cinayəti törədəndə və ölüm cəzasına məhkum ediləndə uşaq idi və xanım Mughrabi onun edamını uşaq haqlarınıın və beynəlxalq qanunların kobud pozuntusu kimi dəyərləndirib.
O bildirib ki, bu qanunlara görə yaşı 18-dən az olanlar barəsində ölüm hökmü çıxarıla bilməz.
Kazemi 2011-ci ilin martında dava-dalaş əsnasında bir nəfəri bıçaqla öldürmüşdü.
Xanım Mughrabi deyib ki, İran ədliyyəsi yeniyetmələrin barəsində çıxarılmış edam cəzalarının icrasına moratorium qoymalı idi.
O həmçinin qeyd edib ki, İran parlamenti bununla əlaqədar Cinayət Məcəlləsinə düzəliş etməlidir.
İran rəsmiləri Amnesty İnternational təşkilatının bəyanatına reaksiya verməyiblər.
