Keçid linkləri

Təcili xəbərlər
2020, 24 Oktyabr, şənbə, Bakı vaxtı 13:49

‘İnformasiya ombudsmanı institutuna ehtiyac var’


İllüstrasiya

Azərbaycanda informasiya ombudsmanı institutu formalaşdırılmasına ehtiyac var.

Bunu Azərbaycan Milli Elmlər Akademiyasının (AMEA) İnformasiya Texnologiyaları İnstitutunun direktoru Rasim Əliquliyev deyib.

İnstitutun məlumatına görə, o, “İnformasiya təhlükəsizliyinin aktual multidissiplinar elmi-praktiki problemləri” mövzusunda dekabrın 17-də keçirilən konfransda çıxış edib.

Rasim Əliquliyev bəzi ölkələrdə İnformasiya Ombudsmanı institutunun fəaliyyət göstərdiyini, həmin qurumun informasiya cəmiyyəti ideyasını həyata keçirdiyini ifadə edib.

“Dünya təcrübəsini nəzərə alaraq, ölkəmizdə də belə bir institutunun yaradılması, bu istiqamətdə ciddi tədbirlərin görülməsi məqsədəuyğundur”, direktor deyib. O, son zamanlar şəxsi həyatının toxunulmazlığı və fərdi məlumatların qorunması sahəsində boşluqların olduğunu, sosial şəbəkələrdə təhdidlərin vüsət aldığını da qeyd edib.

Dronlardan istifadə qanunla tənzimlənsin

Rasim Əliquliyev həmçinin, Azərbaycanda pilotsuz uçuş aparatlarından istifadənin qanuni tənzimlənməsinin də zəruri olduğunu ifadə edib.

“Azərbaycanda pilotsuz uçuş aparatları – dronlardan istifadə sahəsində problemlər var. Bu sahədə qanunvericilik bazasının mövcud olmaması dronların ölkəyə gətirilməsi və bu aparatlardan istifadə ilə bağlı problemlərə səbəb olur. Dronları sertifikatlaşdıran hüquqi sənədin hazırlanması vacib məsələlərdəndir”, deyən direktor qeyd edib ki, bu sahədə inkişaf etmiş ölkələrin təcrübəsi nəzərə alınmaqla qanunlar qəbul edilməlidir.

Xatırlatma

Azərbaycanın “İnformasiya əldə edilməsi haqqında” qanun ilk dəfə qəbul ediləndə, 2005-ci ildə 3 il ərzində informasiya məsələləri üzrə ombudsman institutunun yaradılmasını nəzərdə tuturdu. Ancaq həmin tələb 2010-cu ildə qanundan çıxarıldı.

Informasiya əldə edilməsi ilə bağlı mübahisələrin həll edilməsi vəzifə və səlahiyyətləri İnsan Haqları üzrə Müvəkkilə verildi.

Bəzi ekspertlər də dronların ölkəyə gətirilməsi, istifadəsi ilə bağlı da Azərbaycanda problemlərin olduğu bildirilir. Qanunvericilikdə bu məsələ ilə bağlı müddəaların aydın olmadığı qeyd edilir.

Təcrübədə bir neçə dəfə müstəqil jurnalistlər, sosial şəbəkə fəalları Azərbaycana dron gətirilməsində çətinliklər yaşadıqlarını açıqlayıblar.

XS
SM
MD
LG