Realliq.info saytının redaktoru İkram Rəhimovun yeri bilinmir.
Bu haqda AzadlıqRadiosuna redaktorun yaxınları danışıblar.
Onların dediyinə görə, bu gün, oktyabrın 26-da İkram Rəhimovu Azadlıq prospektində mülki geyimli şəxslər saxlayıblar. Onun naməlum istiqamətə aparıldığı bildirilir.
Hazırda İkram Rəhimovun telefonu cavab vermir. Hələlik, əlaqəli rəsmi qurumlardan redaktorla bağlı məlumat almaq mümkün olmayıb.
Bir qədər əvvəl isə o, özünün Facebook səhifəsində təqib edilməsi barədə məlumat yaymışdı.
“Turan” agentliyin məlumatına görə isə, redaktor bu gün, oktyabrın 26-da saat 14:40 radələrində zəng edib, BMW markalı 90 EM 525 nömrəli avtomobilini Masazır yolunda ağ rəngli Hyundai Sonata markalı avtomobildəki naməlum şəxslərin təqib etdiklərini bildirib.
İkram Rəhimov daha sonra “Turan” agentliyinin ofisinə gəlib.
O, agentliyin direktoru Mehman Əliyevlə danışıb.
Agentliyin xəbərinə görə, o deyib ki, Azərbaycan prezidentinin ictimai-siyasi məsələlər üzrə köməkçisi Əli Həsənovun ünvanına tənqid yer alan açıq məktub dərc etdiyinə görə, təqib edilir. Həmin müraciət onun rəhbəri olduğu reallıq.info saytında bu gün, oktyabrın 26-da yayılıb.
Agentliyin xəbərində vurğulanır ki, hüquq-mühafizə orqanlarına müraciət etməkdən ötrü redaksiyadan çıxan İkram Rəhimovu S.Rəhimov küçəsində mülki geyimli 4 nəfər saxlayıb. Onların heç bir izahat vermədən redaktoru naməlum istiqamətə apardıqları qeyd edilir.
Ancaq bütün bu açıqlamalara, hələlik, nə Azərbaycan prezidentinin ictimai-siyasi məsələlər üzrə köməkçisi Əli Həsənovdan, nə də başqa rəsmi qurumlardan münasibət almaq mümkün olub.
Xatırlatma
Realliq.az saytının redaktoru İkram Rəhimov 2016-cı ildə Sumqayıtdakı “Ucuz market” ticarət mərkəzi rəhbərinin xüsusi ittiham qaydasında şikayəti əsasında həbs olunmuşdu.
İkram Rəhimov saytda Rəhman Novruzov soyadlı bir şikayətçinin məktubunu dərc edib.
Məktubda iddia olunub ki, həmin ticarət rəhbəri şəhərin icra hakimiyyəti başçısına rüşvət verib.
Sumqayıt Şəhər Məhkəməsi 2016-cı ilin noyabrında həm redaktoru, həm də ona şikayət məktubu yazan Rəhman Novruzovu Cinayət Məcəlləsinin 147.1-ci (böhtan) maddəsi ilə günahkar bilərək, bir il azadlıqdan məhrum edib.
Redaktor mühakimə edildikdən sonra vəkili vasitəsilə, hələ polisdə saxlanarkən şəhər rəhbərliyinin göstərişi ilə ona işgəncə verildiyini açıqlamışdı.
Daxili İşlər Nazirliyi, eləcə də, Sumqayıt şəhər İcra Hakimiyyəti redaktorun bu iddiasını təkzib etmişdilər.
Sumqayıt Apellyasiya Məhkəməsi 2017-ci il martın 1-də böhtanda təqsirləndirilərək həbs edilmiş redaktoru və mediaya müraciət yazmış Rəhman Novruzovu vaxtından əvvəl azadlığa buraxıb.
