İllər öncə MTN əməkdaşlarının Nabranda ona məxsus «Qafqaz» istirahət mərkəzində əməliyyat keçirib həbs etdiyi işadamı Tapdıq Namazov haqqında avqustun 26-da yeni hökm çıxarılıb. Bu dəfə o, Bakı Ağır Cinayətlər Məhkəməsinin hölmüylə 10 il azadlıqdan məhrum edilib. İşadamı yeni tikilən binalarda mənzil almaq istəyən vətəndaşları aldadıb, onların pulunu mənimsəməkdə suçlu sayılıb. Hərçənd, o, özünü təqsirli bilmir.
T.Namazov birinci həbsdən azadlığa buraxılandan bir müddət sonra ölkəni tərk etmişdi. Cinayət işinin materiallarında yazılıb ki, T.Namazov ölkədən qaçıb, onu Dövlət Sərhəd Xidmətinin əməkdaşları saxlayıb. Ancaq T.Namazov bununla razılaşmır, qaçmadığını, sadəcə, xaricdəki biznesi ilə əlaqədar 2013-cü ildə ölkədən getdiyini deyir. Bildirir ki, 6 il sonra - 2019-cu ilin əvvəlində Bakıya könüllü şəkildə qayıdıb:
«Mən işlə əlaqədar xaricdə idim. Şəriklərim mənim başıma bu oyunu açdı. Bir nəfərin şikayətçi olduğunu dedilər. 50 minə yaxın puldan söhbət gedirdi. Oradan göndərdim, amma iş bağlanmadı. Mən də qayıtdım ki, bu işin nə olduğunu aydınlaşdırım. Məndən şikayətləndiyini deyənlər şəriklərimin qohumlarıdır».
Zərərçəkmişlər şikayətlənir ki, 2012-ci ildə pulunu ödədikləri mənzili hələ də ala bilməyiblər, çünki bina təhvil verilməyib, bəzi mənzillər də bir neçə nəfərə satılıb. Onlar ya pullarının o dövrün məzənnəsinə uyğun dollarla hesablanıb geri qaytarılmasını, ya da mənzillərinin təhvil verilməsini tələb edirlər: «O vaxt kvadratmetri 600 dollara satırdılar. Amma pulu bizdən manatla hesablayıb 460-470 manat aldılar. İndi həmin pulla ev almaq olar? Ya pulumuz indi ev alacağımız dəyərlə qaytarılsın, ya da mənzillər verilsin».
T.Namazov məhkəmədə deyib ki, pulu ödəməyə hazırdır, amma kvadratı 460 manatdan hesablamaqla: «Bu işdə mənim zərrə qədər də günahım yoxdur. Bu insanların çoxundan pul almamışam. Pul aldıqlarıma da ev verəcəkdim. Sonradan bu problemlər çıxdı».
İttihamda yazılıb ki, T.Namazov Bakıda «Omaks-3» Mənzil-Tikinti Kooperativinin rəhbərlərindən biri olub. Bu şirkət vasitəsilə 18 nəfərə 568 min manat ziyan dəydiyi bildirilir.
